Pagbaludan ti Liberty iti Panagsusulbod, ni Al Rounds

Oktubre 18–24

Doktrina ken Katulagan 121–123

“O Dios, Sadino ti Yanmo?”

Ti kasayaatan a wagas a pangisagana a mangisuro ket agbasa kadagiti nasantuan a kasuratan, panunoten dagiti tao a sursuruam, ken surotem ti Espiritu. Mabalin nga inayon dagiti aktibidad iti daytoy a balabala iti inspirasion nga awatem.

Isuratmo dagiti Impresionmo

Yawis ti Panagbibinninglay

Awisem dagiti miembro ti klase a mangpili iti mensahe manipud iti Doktrina ken Katulagan 121–23 a kayatda nga ibingay iti maysa a tao nga agsagsagaba. Pailawlawagmo kadakuada ti pilida.

Isuro ti Doktrina

Doktrina ken Katulagan 121:1–33; 122

No maibturantayo a nasayaat dagiti pannuboktayo, itan-oknatayonto ti Dios iti ngato.

• Mabalin nga addaanka kadagiti miembro ti klase a, gapu kadagiti narigat a pannubok, addaanda iti rikna a kapada iti impeksa ni Joseph Smith iti Doktrina ken Katulagan 121:1–6. Kalpasan ti aggigiddan a panangbasa kadagitoy a bersikulo, mabalin nga awisem dagiti miembro ti klase a mangilasin ken mangibinglay kadagiti mensahe kadagiti bersikulo 7–33 a mangted kadakuada iti namnama ken liwliwa iti panawen dagiti pannubokda. Ania ti kayat a sawen ti to “agitured… a nasayaat”? (bersikulo 8). Kasano a tulongannatayo ti Mangisalakan nga agitured a nasayaat? Kasano a matulongantayo ti tunggal maysa nga agitured a nasayaat?

• Tapno matulongan dagiti miembro ti klase a mangibilang no kasano a mabalin dagiti pannubok nga “ipaayanda[tayo] iti padas” ken “agbalindanto a pagsayaatan[tayo]” (Doktrina ken Katulagan 122:7), mabalinmo nga ikkan ida iti panid ti papel ket idawat kadakuada a mangisurat iti maysa a pannubok a napasaranda. Iti sabali a bangir ti papel, mabalin nga isurat dagiti miembro ti klase dagiti balikas a “padas” ken “pagsayaatan.” Bayat ti sangkamaysa a panaglilinnawagyo iti Doktrina ken Katulagan 122, allukoyem dagiti miembro ti klase a mangisurat iti ania man a kapanunotanda maipapan iti “sabali a bangir” dagiti pannubokda: ti “padas” wenno “pagsayaatan” a nagun-odda. Mabalin a komportable ti sumagmamano a miembro ti klase iti panangibinglay no kasano a naggibus ti pannubokda iti panagbalin a pagsayaatanda. Wenno mabalinda a basaen ti padas ni Elder Koichi Aoyagi iti “Hold on Thy Way” (Ensign wenno Liahona, Nob. 2015, 126–28).

Doktrina ken Katulagan 121:34–46

Nasken nga agbalintayo a nalinteg tapno magun-odtayo dagiti “bileg ti langit.”

• Mabalin a makaay-ayo a pagdasigen ti no kasano a mapagtalinaed ti “bileg wenno impluensia” iti lubong iti no kasano nga insuro ti Apo a nasken a mapagtalinaed ti bileg wenno impluensia (kitaen iti benneg 121). Tapno makatulong iti daytoy a panaglilinnawag, mabalinmo ti agaramid iti tsart a dua ti kolumna iti pisarra a nasuratan iti Nailubongan a Bileg ken Dagiti Bileg ti Langit. Mabalin dagiti miembro ti klase a punnuen ti tsart kadagiti balikas ken ragup ti balikas manipud iti Doktrina ken Katulagan 121:34–46. Kasano a mabalbaliwan dagitoy a bersikulo ti no kasano a makitatayo dagiti pagrebbengantayo iti pamiliatayo, kas ministering brothers ken sisters, wenno iti sabali a kasasaad a namnamaentayo a mangimpluensia iti dadduma para iti pagsayaatan?

• Maysa a wagas a paglilinnawagan ti balakad ken dagiti nakaskasdaaw a bendision iti Doktrina ken Katulagan 121:45–46 ket bingayem ti klase iti dua a grupo ket idawat iti tunggal grupo a mangadal ken mangilawlawag iti ragup ti balikas manipud kadagitoy a bersikulo, kas iti “taraonan koma ti saguday ti pampanunotmo nga awan ressatna” wenno “kas iti linnaaw nga aggapu iti langit.” Mabalinda a kitaen dagiti kayulogan dagiti balikas, basaen dagiti mainaig a nasantuan a kasuratan kadagiti footnote, ken ilawlawag no ania ti kaipapanan kadakuada dagiti ragup ti balikas. Mabalin a kayat ti sumagmamano a grupo ti mangidrowing kadagiti ladawan a mangiladawan iti ragup ti balikasda. Awisem ti tunggal grupo a mangibinglay iti klase no ania ti nasursuroda.

Doktrina ken Katulagan 122:8–9

Bimmaba ni Jesucristo iti babaen ti amin a banag ken pinapigsanatayo kadagiti pannuboktayo.

• iti pannakaawat a ni Jesucristo ket “bimmaba iti babaen… dagiti amin a [banag]” mabalin a mangted kadagiti miembro ti klase iti panagtalek nga umasideg Kenkuana. Dagitoy nainayon a nasantuan a kasuratan makatulong a mangilawlawag no ania ti kayat a sawen daytoy a ragup ti balikas: Isaias 53:3–4; Hebreo 2:17–18; 1 Nephi 11:16–33; Alma 7:11–13. Mabalin a basaen dagiti miembro ti klase dagitoy a bersikulo, karaman ti Doktrina ken Katulagan 122:8, a mangsapsapul iti maysa a banag a mangpapigsa iti pammatida a ni Jesucristo ti makatulong kadakuada iti pannubokda. Mabalinda pay a sapulen ti inspirasion kadagiti himno maipapan iti Mangisalakan, kas iti “Where Can I Turn for Peace?” (Hymns, no. 129).

• Ti palawag iti “Dagiti Nainayon a Resources” ket mangted iti ad-adu pay a nalawag a pannakaammo ken pannakaawat maipapan no kasano a bimmaba ti Mangisalakan iti babaen ti amin a banag. Mabalinmo a panunoten ti maysa a wagas a maipakitam no kasano a ti kaadda iti “babaen” ti nadagsen a banag aramidennatayo a “naan-anay a nakapuesto a mangitag-ay iti [daytoy].” Kasano a ti pannakaammo a bimmaba ti Mangisalakan iti babaen ti amin a banag ket nakatulong kadatayo kadagiti pannuboktayo?

  

  Maawatan ni Jesus ti panagsagabatayo. Saan a ti Pagayatak, No Di ket ti Pagayatam, ni Walter Rane.

Dagiti Nainayon a Resources

Bimmaba ni Cristo iti babaen ti amin a banag.

Insuro ni Presidente Dallin H. Oaks, “Minilmilion dagiti tao nga managbuteng iti Dios ti agkararag iti Dios a makaruk-at kadagiti rigrigatda. Impalgak ti Mangisalakan ti ‘panagpababana iti amin a banag’ (D&K 88:6). Kas iti insuro ni Elder Neal A. Maxwell, ‘Ti “panagpababana iti babaen ti amin a banag,” maawatanna, a naan-anay ken personal, ti pakabuklan a sakup ti panagsagaba ti tao’ [Ensign, Nob. 1997, 23]. Mabalin uray pay no isaotayo a ti panagpababana iti babaen ti amin, naan-anay a nakapuesto a mangitag-ay kadatayo ken mangted kadatayo iti pigsa a kasapulantayo nga agibtur kadagiti rigrigattayo” (“Strengthened by the Atonement of Jesus Christ,” Ensign wenno Liahona, Nob. 2015, 64).

Panangpadur-as iti Panangisurotayo

Naparegta ti awagmo. Kas maysa a mannursuro, inawagannaka ti Apo a mangbendision kadagiti annakna. Kayatna nga agballigika, isu a no agbiagka a maikari iti tulongna, ikkannakanto iti paltiing a kasapulam (kitaen iti Panangisuro iti Wagas ti Mangisalakan, 5).