Nauvoo

Nauvoo ti Napintas, ni Larry Winborg

Oktubre 25–31

Doktrina ken Katulagan 124

“Balay babaen ti Naganko”

Tapno mangipalagip ti Espiritu kadagiti prinsipio bayat ti panangisurotayo (kitaen iti Juan 14:26), nasken nga umuna a sipapasnektayo nga agadal ken agutob kadagita a prinsipio.

Isuratmo dagiti Impresionmo

icon iti panagbibinninglay

Yawis ti Panagbibinninglay

Ibilang ti panangawis kadagiti miembro ti klase a mangibinglay iti maysa a banag a nasarakanda iti Doktrina ken Katulagan 124 a nangigapu kadakuada a mangibilang iti maysa a pagbatayan ti ebanghelio iti baro a wagas. Ania ti nabasada—agmaymaysa wenno kas sangapamiliaan—a nangbalbaliw iti wagas a panagrikna, panagpanunot, ken panagbiagda?

icon iti panangisuro

Isuro ti Doktrina

Doktrina ken Katulagan 124:15, 20

Pakaragsakan ti Apo ti integridad.

• Iti benneg 124, dinayaw ti Apo da Hyrum Smith ken George Miller gapu iti integridadda. Tapno matulongan dagiti miembro ti klase a mangadal iti daytoy a kababalin a naun-uneg, mabalinmo nga awisen ida a mangbasa iti Doktrina ken Katulagan 124:15, 20 ket utoben no ania ti masursuroda maipapan iti integridad manipud kadagitoy a bersikulo. Ania pay ti masursurotayo manipud kadagiti nasantuan a kasuratan a nailista iti babaen ti “Integridad” iti Pangiwanwan iti Nasantuan a Kasuratan (scriptures.ChurchofJesusChrist.org) wenno manipud iti mensahe ni Elder Richard J. Maynes “Earning the Trust of the Lord and Your Family”? (Ensign wenno Liahona, Nob. 2017, 75–77). Nalabit a mabalin nga ibinglay dagiti miembro ti klase dagiti pagarigan dagiti tao nga am-ammoda nga addaan iti integridad. Apay a kasta kapateg ti kababalin nga integridad?

Doktrina ken Katulagan 124:22–24, 60–61

Kayat ti Apo a pasangbayen ken awatentayo dagiti dadduma.

• Mabalin a masursuruan dagiti miembro ti klasem iti maysa a banag manipud iti panangiladawan ti Apo iti Balay ti Nauvoo a makatulong kadakuada kadagiti pannakipulapolda kadagiti tao a saan a Santo iti Ud-udina nga Aldaw wenno immadayo manipud iti Simbaan. Mabalinmo ti agdrowing iti maysa a balay iti pisarra ken awisen dagiti miembro ti klase a mangsukisok iti Doktrina ken Katulagan 124:22–24, 60–61 para kadagiti balikas nga inusar ti Apo a mangiladawan kadagiti panggep ti Balay ti Nauvoo. Kalpasanna mabalinda nga isurat dagiti balikas iti lawlaw ti balay. Kasano a mayaplikar pay dagitoy a termino iti Simbaan ni Jesucristo? Ania ti maaramidtayo a mangparnuay iti kastoy met la a kultura ti panangpasangbay iti wardtayo ken kadagiti pagtaengantayo?

Doktrina ken Katulagan 124:25–45, 55

Bilinennanatayo ti Apo a mangbangon kadagiti templo tapno makaawattayo kadagiti sagrado nga ordinansa.

• Nalabit a mabalin nga ipapan dagiti miembro ti klase nga agnanaedda iti Nauvoo idi 1841 ken agtartrabahoda iti Templo ti Nauvoo idi agsaludsod ti maysa a gayyem, “Apay nga agtultuloytayo nga agbangon kadagitoy a templo?” Ania koma ti isungbattayo iti daytoy a gayyem? Mabalin a sapulen dagiti miembro ti klase dagiti kapanunotan iti Doktrina ken Katulagan 124:28–30, 37–42, 55. No saan pay a pamiliar dagiti miembro ti klase kadagiti ordinansa a nadakamat kadagitoy a bersikulo, ibilang ti panangiladawan kadagiti panggep ken bendision dagitoy nga ordinansa. Kitaen iti temples.ChurchofJesusChrist.org para iti panangiwanwan maipapan no ania ti siuumno a mapaglilinnawagan iti ruar ti templo ken para kadagiti ladawan dagiti templo a mabalinmo nga ipakita iti klase.

  Ni Joseph Smith a kaduana dagiti lallaki a mangipatpatakder iti Templo ti Nauvoo

  Ni Joseph Smith iti Templo ti Nauvoo, ni Gary E. Smith

Doktrina ken Katulagan 124:45–55

Bendisionanto ti Apo dagiti agkagumaan nga agtungpal kadagiti bilinna.

• Nabilin dagiti Santo a mangbangon iti templo iti Jackson County ngem “tinubeng ida dagiti kabusorda” (Doktrina ken Katulagan 124:51). Kadagiti bersikulo 49–55, a nangisawangan ti Apo daytoy a situasion, mabalin nga adda pangpatalged a mensahe para kadagiti tao nga agtarigagay nga agtungpal kadagiti bilin ti Dios ngem malapdanda iti panangaramid iti dayta gapu iti pamilia wenno dadduma pay a kasasaad. Mabalinmo a basaen dagitoy a bersikulo kadagiti miembro ti klase ket idawat kadakuada a mangpanunot kadagiti situasion a mabalin a saan a kabaelan dagiti tao ti mangipatungpal kadagiti nalinteg a tarigagayda gapu kadagiti kasasaad a saanda a mapengdan. Ania a balakad a masarakantayo kadagitoy a bersikulo a makatulong iti maysa a tao iti kasta a situasion? Ania ti isuro kadatayo dagitoy a bersikulo maipapan iti panagtungpal?

Doktrina ken Katulagan 124:91–92

Matarabaynatayo ti Apo babaen kadagiti bendision ti partriarkatayo.

• Mangted pagimbagan kadi kadagiti miembro ti klasem ti panaglilinnawag maipapan kadagiti patriarka ken bendision ti patriarka? Mabalinmo a rugian babaen ti panangawis kadagiti miembro ti klase a mangbasa iti Doktrina ken Katulagan 124:91–92, a mangsapsapul iti nakaawagan nga aramiden ni Hyrum Smith. Kalpasanna mabalinmo nga isurat iti pisarra ti Ania ken Apay ken awisem dagiti miembro ti klase a mangbasa iti “Patriarchal Blessings” (True to the Faith, 111–13) tapno ammuen no ania dagiti bendision ti patriarka ken no apay a napategda. Kasano a makapagsagana ti maysa a tao nga umawat iti maysa a bendision ti patriarka? Ibilang ti panangawis iti sumagmamano a tao a nakaawat iti bendisionda ti patriarka tapno ibinglayda no apay nga agyamanda para kadagitoy. (Palagipan ida a saanda nga ibinglay ti ania man a banag a personal wenno sagrado unay manipud kadagiti bendisionda.) Kasano a maipakitatayo nga ipatpategtayo dagiti bendisiontayo ti patriarka?

Panangpadur-as iti Panangisurotayo

Ikararagam dagiti miembro ti klasem. Ikararagam babaen iti nagan dagiti tao a sursuruam. Makapagkararagka tapno maawatam dagiti kasapulanda ken mangammo no ania ti isurom tapno maipaaymo dagita a kasapulan. Mabalinmo pay nga idawat iti Nailangitan nga Ama a “mangisagana iti puspusoda” (Alma 16:16) nga umawat kadagiti kinapudno nga isuromto. (Kitaen iti Panangisuro iti Wagas ti Mangisalakan,6.)