Far West

Far West, ni Al Rounds

Oktubre 11–17

Doktrina ken Katulagan 115–120

“Nasagsagradonto ti Sakripisiona Kaniak ngem iti Matgedanna”

Bayat ti panagsaganam a mangisuro, laglagipem a ti kangrunaan a panggepmo ket mangtulong iti dadduma a mangpapigsa iti pammati ken ni Jesucristo.

Isuratmo dagiti Impresionmo

icon iti panagbibinninglay

Yawis ti Panagbibinninglay

Sakbay nga isaritam maipapan kadasgiti prinsipio manipud kadagiti benneg 115–20 a napnuan kaipapanan kenka, idawat kadagiti miembro ti klase a mangibinglay no ania ti napnuan kaipapanan kadakuada. Kas pagarigan: mabalinmo nga awisen dagiti miembro ti klase a mangileppas iti daytoy a binatog: “Agyamanak a nabasak dagiti benneg 115–20 gapu ta …”

icon iti panangisuro

Isuro ti Doktrina

Doktrina ken Katulagan 115:4–6

Ti Simbaan ni Jesucristo dagiti Santo iti Ud-udina nga Aldaw ket maysa a salakan ken pagkamangan.

• Mabalin a sukisoken dagiti miembro ti klase ti mensahe ni Presidente Russell M. Nelson “The Correct Name of the Church” (Ensign wenno Liahona, Nob. 2018, 87–90) para kadagiti nalawag a pannakaammo ken pannakaawat kadagiti bersikulo 4–6. Apay a napateg nga usaren ti umno a nagan ti Simbaan?

• Kalpasan ti aggigiddan a panangbasa iti Doktrina ken Katulagan 115:4–6, mabalin a paglilinnawagan dagiti miembro ti klase no kasano a maipada ti Simbaan ken dagiti miembrona iti maysa a silaw wenno wagayway. Mabalinmo nga ipakita ti maysa a ladawan ti parola iti maysa a bagyo ket idawat kadagiti miembro ti klase no kasano a mainaig daytoy iti mensahe kadagiti bersikulo 5–6. Kasano a ti panaguummong iti “Zion, ken dagiti … istakana” mangted kenka iti “pagkamangan manipud iti bagyo”? (bersikulo 6).

  parola

  Makapagraniagtayo kas kadagiti silaw a mangtulong iti dadduma a mangsapul iti pagkamangan iti Simbaan.

Doktrina ken Katulagan 117

Sagrado dagiti sakripisiotayo iti Apo.

• Awisem dagiti miembro ti klase a mangipapan nga isuda ni Newel K. Whitney wenno ti asawana, ni Elizabeth, nga akinkukua iti maysa a naballigian a pagtagilakuan iti Kirtland ngem indawat ti Apo a panawanna ti kukuada ket umakar iti Missouri. Kalpasanna mabalinda a basaen dagiti bersikulo 1–11 ket ibinglay ti maysa a banag a kinuna ti Apo a makatulong kadakuada a mangaramid iti daytoy a sakripisio.

• Mabalin a makatulong dagiti visual aid kadagiti miembro ti klase a mangibilang iti “sangsangkatedted” a no dadduma pagilemantayo imbes a dagiti “napapateg a banag” (bersikulo 8). Ibilangmo ti panangipakita kadagiti banag kas iti sangkatedted a danum ken sangabotelia a danum wenno chocolate chip ken chocolate bar. Nalabit a makapanunot dagiti miembro ti klase kadagiti sabali pay a pagarigan. Mabalinmo pay nga isurat ti sangkatedted ken napapateg a banag iti pisarra ket idawat kadagiti miembro ti klase a mangilista kadagiti pagarigan dagiti banag a mabalin a kasapulantayo a “mapalusot … koma” (bersikulo 5) tapno umawat iti “naruay” (bersikulo 7).

• No adda ania man nga impresion dagiti miembro ti klase bayat ti panangbasa kadagiti balikas ti Apo maipapan ken ni Oliver Granger kadagiti bersikulo 12–15, awisen ida a mangibinglay. Apay a mabalin a nasagsagrado iti Apo dagiti sakripisiotayo ngem iti matgedantayo?

Doktrina ken Katulagan 119–20

Babaen ti panangbayad iti apagkapullo, tumulongtayo a mangbangon ken “mangpasanto iti daga ti Zion.”

• Ipapanmo ti naespirituan a pigsa a mabalin nga umay manipud iti panangibinglay dagiti miembro ti klase iti tunggal maysa kadagiti bendision nga inawatda iti panagtungpal iti linteg ti apagkapullo. Mabalinda pay a basaen ti Doktrina ken Katulagan 119:6 ken paglilinnawagan no kasano a mabalin daytoy a linteg ti “mangpasanto iti Zion” ken mangaramid iti ward wenno branchtayo “a daga ti Zion [kadatayo].” Mabalinda pay a basaen ti Malakias 3:8–12 tapno ilasin dagiti bendision nga ikari ti Apo iti panagbayad iti apagkapullo.

• No adda dagiti saludsod dagiti miembro ti klase maipapan no kasano ti pannakausar ti apagkapullo, mabalinmo nga awisen ida a mangbasa iti benneg 120 ken ti pannakailawlawag iti “Dagiti Nainayon a Resources.” (Ited pay ni Elder David A. Bednar ti makatulong a panangiladawan iti “The Windows of Heaven” [Ensign wenno Liahona, Nob. 2013, 19–20].) Kasano a makatulongtayo iti dadduma a mangpadakkel iti pammatida iti linteg ti Apo iti apagkapullo?

dagiti nainayon a resources icon

Dagiti Nainayon a Resources

Ti Konseho iti Disposision dagiti Apagkapullo.

Kinuna ni Elder Robert D. Hales:

“Kas impalgak ti Apo, ti pannakausar ti apagkapullo ket inkeddeng ti konseho a buklen ti Umuna a Panguluen, ti Korum dagiti Sangapulo-ket-dua nga Apostol, ken ti Presiding Bishopric. Kinuna ti Apo a ti aramid ti konseho ket iturong ‘ti bukodko a timek kadakuada’ [Doktrina ken Katulagan 120:1]. Ti konseho ket maawagan iti Konseho iti Disposision dagiti Apagkapullo.

“Nakaskasdaaw a mangsaksi iti daytoy a konseho a dumngeg iti timek ti Apo. Ammo ti tunggal miembro ken makiraman iti amin a pangngeddeng ti konseho. Awan ti pangngeddeng a maaramid agingga a di agkaykaysa ti konseho. Mabusbos ti amin a pondo ti apagkapullo para kadagiti panggep ti Simbaan, agraman iti pagimbagan—mangaywan kadagiti napanglaw ken agkasapulan—dagiti templo, pasdek ken panangpatalinaed kadagiti balay a pagmimitingan, edukasion, kurikulum—iti ababa a pannao, ti aramid ti Apo. …

“… Paneknekak maipapan iti Konseho iti Disposision dagiti Apagkapullo. Nagtugawak iti daytoy a konseho iti uneg ti 17 a tawen, kas Presiding Bishop ti Simbaan ket itan kas miembro ti Korum ti Sangapulo-ket-dua nga Apostol. Awan pakailaksidanna, maus-usar dagiti pondo ti apagkapullo daytoy a Simbaan para kadagiti panggep ti Apo” (“Tithing: A Test of Faith with Eternal Blessings,” Ensign wenno Liahona, Nob. 2002, 28).

Panangpadur-as iti Panangisurotayo

Awisem dagiti agad-adal nga agsisinnuro iti tunggal maysa. “Mabalin a maitutop nga awisen dagiti agad-adal nga agtitinnulong a mangsapul kadagiti sungbat dagiti saludsodda. No tinignaynaka ti Espiritu, mabalinmo nga ikeddeng nga aramiden daytoy uray no mariknam nga ammom ti sungbat (Teaching in the Savior’s Way, 24).