C. C. A. Christensen (1831–1912), Lix Teepal Sion, c. 1878, tempera en muselina, 78 × 114 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

13–19 septiembre

Tzol’leb’ ut Sumwank 102–105

“Chirix xnumsinkil naab’al li rahilal … nachal li osob’tesink”

Naq nakakawresi aawib’ re xk’utb’al Tzol’leb’ ut Sumwank 102–105, k’e aach’ool chirab’inkil lix hasb’ li Musiq’ej. A’an naru naxk’am aab’e chixtawb’aleb’ na’leb’ li ink’a’ yeeb’ileb’ sa’ li tusleb’ aatin a’in ut li taarosob’tesiheb’ li komon.

Tz’iib’a li nakak’oxla

Xkanab’ankileb’ chi wotzok

Eb’ li komon naru neke’xtz’iib’a jun malaj wiib’ li raqal re Tzol’leb’ ut Sumwank 102–105 li wan xyaalal choq’ reheb’. Chirix a’an naru neke’xwotz li raqal a’an rik’in junaq chik komon, ut te’aatinaq chirib’ileb’ rib’ chirix li neke’xtzol sa’eb’ li raqal a’an.

Xk’utb’al li tzolʼlebʼ

Tzol’leb’ ut Sumwank 103; 105

Eb’ lix yalb’al qix neke’xk’ut chaab’il na’leb’ chiqu ut neke’xk’e qanawom.

• Naq xe’xtzol li tasal 103 ut 105 chiru li xamaan a’in, eb’ li komon maare xe’xtaw na’leb’ li naru nokohe’xtenq’a sa’ li hoonal re yale’k malaj ka’pak’aliik; kanab’eb’ chixwotzb’al li xe’xtaw. Malaj naru taapatz’ reheb’ naq te’xsik’ li na’leb’ a’an sa’ Tzol’leb’ ut Sumwank 103:5–7, 12, 36; 105:5–6, 9–12, 18–19 (chi’ilmanq ajwi’ “Xkomon chik li k’anjeleb’aal”). K’a’ru neke’xye li na’leb’ a’an chirix chan ru naru neke’qanumsi li ch’a’ajkilal malaj li rahil ch’oolejil? Eb’ li komon maare te’raj xwotzb’al xnumsihomeb’ b’ar wi’ xe’xk’ul rosob’tesinkileb’ “chirix xnumsinkil naab’al li rahilal” (Tzol’leb’ ut Sumwank 103:12).

• Wi nakak’oxla naq junaq seraq’ malaj resilal junaq kristiaan chirix lix Teepal Sion naru nak’anjelak, naru taapatz’ re junaq li komon naq taaril ruheb’ li perel a’in rub’elaj li tzolok, ut tixwotz li k’a’ru tixtzol: Santos, 1:198–210; “La ofrenda aceptable del Campo de Sion” (Revelaciones en Contexto, 229–234); malaj “Eb’ li xyaab’ kuxej re li k’ojob’ank wi’chik: Lix Teepal Sion” (sa’ li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Wi ta tooruuq chi q’ajk sa’ li najter ut too’aatinaq rik’in lix Teepal Sion, k’a’ raj ru taqaye reheb’ re xwaklesinkil xch’ooleb’? K’a’ raj ru te’xye qe eb’ a’an re xwaklesinkil qach’ool?

  

  Lix Teepal Sion ke’wan chire li nima’ Little Fishing, li nak’utb’esiman arin.

Tzol’leb’ ut Sumwank 104:11–18

Li junjunq qe laa’o a’an “mertoom sa’ xb’een li ruchich’och’il osob’tesihom.”

• Re xtenq’ankileb’ li komon chiroksinkileb’ choq’ reheb’ li k’utum wan sa’ Tzol’leb’ ut Sumwank 104:11–18, naru nakakanab’eb’ chixk’oxlankil naq te’xkanab’ k’a’ruhaq nim xloq’al choq’ reheb’ rik’in junaq chik kristiaan. K’a’ raj ru te’xye re li kristiaan a’an? K’a’ raj ru te’royb’eni rik’in a’an? Chirix a’an, eb’ li komon naru neke’ril ru Tzol’leb’ ut Sumwank 104:11–18 re xtawb’al k’a’ru xteneb’ahom sa’ qab’een li Qaawa’, ut li k’a’ru naroyb’eni a’an qik’in. Chan ru naqil li ruchich’och’, eb’ li qosob’tesinkil, malaj eb’ li kristiaan wankeb’ sa’ qasutam rik’in li neke’xk’ut li raqal a’an?

• Re xtenq’ankileb’ li komon chixtawb’al ru chi us “li na’leb’ li kixtaqla xyeeb’al … li Qaawa’, re xk’eeb’al li taak’anjelaq reheb’ lix santil paab’anel” (Tzol’leb’ ut Sumwank 104:16), naru teeril li video “El trabajo de sus manos” (ChurchofJesusChrist.org). Rik’in li naqatzol sa’ li video ut sa’ Tzol’leb’ ut Sumwank 104:11–18, chan ru naq li Qaawa’ naxk’e li nak’anjelak reheb’ laj santil paab’aanel? Naru ajwi’ nakawotz li raatin li Awa’b’ej Marion G. Romney: “Li Qaawa’ … naru narileb’ li neb’a’ chi ink’a’ taaraj ru li qatenq’, wi a’an ta raj li naraj xb’aanunkil. … A’b’anan, laa’o naqaj ru li numsihom a’an, xb’aan naq ka’ajwi’ rik’in xtzolb’al chan ru rilb’al qib’ chiqib’il qib’ naq naniman qik’in li rahok jo’ li Kristo ut li qajom re naq k’ulub’ejaqo re q’ajk sa’ rilob’aal a’an” (“Vivir los principios del plan de Bienestar,” Liahona, febrero 1982, 165–166). K’e junjunq k’asal reheb’ li komon re te’xtz’iib’a li neke’reek’a chirix chan ru naru neke’tenq’an chixk’eeb’al reheb’ jalan chik kristiaan li taak’anjelaq reheb’ jo’ naraj li Qaawa’.

Xkomon chik li k’anjeleb’aal

Lix wankil li yale’k re saqob’resink.

Li Elder Orson F. Whitney kixye: “Maajun li rahilal taqanumsi chi moko li yale’k yal maak’a’aq aj-e. Neke’k’anjelak b’an re qatzolb’al, re xtawb’aleb’ chaab’il na’leb’ jo’ li kuyuk, li paab’aal, li kawil ch’oolej, ut li tuulanil. Chixjunil li rahilal naqanumsi ut chixjunil li k’a’ru naqakuy, mas wi’chik naq nawan qakuyum, naxk’ojob’ li qana’leb’, naxsaqob’resi ru li qach’ool, naxnujob’resi li qaam ut nokoxq’unob’resi ut naxk’e qarahom, naxk’e qak’ulub’ re took’ab’a’iiq ralal xk’ajol li Dios … ut a’an rik’in li rahilal, li tawaak, ut eb’ li ch’a’ajkilal naq naqatzol li k’a’ru tento taqatzol arin, ut li tooxk’e chi wulak chanchan li qana’ qayuwa’ li wankeb’ sa’ li choxa” (chi’ilmanq Spencer W. Kimball, La fe precede al milagro, 1983, 97–98).

Li Elder David A. Bednar kixye: “Sa’ jun xcha’al li qayu’am, li junjunq qe laa’o toob’oqe’q chi b’eek sa’ li qaTeepal Sion. Lix hoonal li b’oqe’k jalan jalanqaq, ut eb’ li ch’a’ajkilal te’qataw jalan jalanqaqeb’. A’b’an, li qana’leb’ sa’ xnumsinkileb’ li k’a’ru tento te’qanumsi tixk’e xsumenkil li patz’om “Ani nataaqen re li Qaawa’?”(“¿Quién sigue al Señor? Las lecciones del Campo de Sion,” Liahona, julio 2017, 23).

Xchaab’ilob’resinkil li qak’utum

K’anjelan sa’ komonil rik’ineb’ li komon sa’ li junkab’al. “Rik’in naq li ochoch a’an li na’ajej q’axal nim xwankil re xyu’aminkil ut xtzolb’al li evangelio, k’a’jo’ wi’chik naq tatruuq chixk’eeb’al xkawilal jun komon sa’ li tzoleb’aal naq nakatk’anjelak sa’ komonil rik’in … li wankeb’ sa’ li junkab’al” (Li k’utuk jo’ li Kolonel, 8–9).