20–26 septiembre

Tzol’leb’ ut Sumwank 106–108

“Naq taateeliiq li choxa chiruheb’ ”

Naq taatzol Tzol’leb’ ut Sumwank 106–108, k’oxlaheb’ li musiq’ejil numsihom li naru neke’xk’ul li komon naq neke’xtzoleb’ li tasal a’in. Naq nakakawresi aawib’ re xtzolb’aleb’, maare us raj xnawb’al rub’elaj li tzolok k’a’ru na’leb’ xe’xtaw naq wan xyaalal choq’ reheb’.

Tz’iib’a li nakak’oxla

Xkanab’ankileb’ chi wotzok

Patz’ reheb’ li komon naq te’xwotz junaq raqal reheb’ li tasal a’in li naxk’ut junaq na’leb’ li naru naxkawob’resi junaq komon chi k’anjelak sa’ li Iglees.

Xk’utb’al li tzolʼlebʼ

Tzol’leb’ ut Sumwank 106; 108

Li Qaawa’ naxtzoleb’, naxwaklesi xch’ooleb’, ut naxtenq’aheb’ li ani naxb’oqeb’ chi k’anjelak.

• Naq eb’ li komon xe’xtzol Tzol’leb’ ut Sumwank 106 ut 108 chiru li xamaan a’in, maare xe’xtaweb’ ch’ol aatin li naru naxtenq’aheb’ li neke’k’anjelak sa’ li Iglees (chi’ilmanq li tusleb’ aatin re li xamaan a’in sa’ Kim, Taaqehin—Choq’ reheb’ li komon ut li junkab’al). Naru taak’e xhoonaleb’ li komon re naq tex’tz’iib’a chiru li pizarron junjunqeb’ li ch’ol aatin xe’xtaw sa’eb’ li tasal a’in, ut taapatz’ reheb’ naq te’xwotz li neke’xk’oxla chirix a’an. K’a’ru xnumsihomeb’ li wan rilom rik’in li xe’tz’iib’a?

Tzolʼlebʼ ut Sumwank 107

Li Qaawa’ naxb’eresi lix Iglees rik’in lix wankilal li tijonelil.

• Naru taatikib’ aatinak chirixeb’ li opiis re li tijonelil rik’in xpatz’b’al reheb’ li komon naq te’xtz’iib’a k’a’ut naq li Qaawa’ naxk’eheb chaq li profeet, li apostol, ut xkomoneb’ aj jolominel sa’ li Iglees. Eb’ li komon maare naru te’xtz’iib’a xkomon lix na’leb’eb’ chirix naq te’ril ru Tzol’leb’ ut Sumwank 107:18–20. Chirix a’an naru te’rileb’ li teneb’ahom naxk’e li Qaawa’ reheb’ li ani wankeb’ sa’eb’ li opiis a’in: Li Xb’eenil Awa’b’ejil (raqal 9, 21–22, 65–66, 91–92), li Kab’laju chi Apostol (raqal 23–24, 33–35, 38, 58), eb’ li Setenta (raqal 25–26, 34, 93–97), ut eb’ li obiisp (raqal 13–17, 68–76, 87–88). K’a’ru naru naqab’aanu re xxaqab’ankileb’ xwankil laj jolominel rik’in “xkawil qach’ool, li qapaab’aal, ut eb’ li qatij” (raqal 22)?

• Chan raj ru taqasume junaq qamiiw li jalan xpaab’aal wi ta tixpatz’ qe: “K’a’ru li tijonelil?” malaj “K’a’ruheb’ li laaw re li tijonelil?” Chan raj ru toohe’xtenq’a chi sumenk li k’utum wankeb’ sa’ “Xkomon chik li k’anjeleb’aal”? Eb’ li komon maare naru ajwi’ neke’xtaw chaab’il na’leb’ sa’ Tzol’leb’ ut Sumwank 107:1–4, 18–20 (chi’ilmanq ajwi’ Leales a la Fe, 163–168). Chan ru nokoxtenq’a li tijonelil re “xk’ulb’al li muqmuukil na’leb’ re li awa’b’ejihom re choxa” ut re “naq taateeliiq li choxa”? Chan ru nokoxtenq’a “chixk’ulb’al xsahil li sum-ochb’eeniik xb’aan, ut li wank chiru rilob’aal li Dios Yuwa’b’ej, ut li Jesus”? (raqal 19).

Tzol’leb’ ut Sumwank 107:27–31, 85

Lix Iglees li Qaawa’ nab’eresiman rik’ineb’ li jolomil ch’utam.

• Li Awa’b’ej M. Russell Ballard kixye: “Ninnaw naq li na’leb’ank sa’ ch’utam a’an lix b’e li Qaawa’ ut naq a’an kixyo’ob’tesi chixjunil sa’ ruchich’och’ ut sa’ choxa chirix naq kik’uub’an xna’leb’ sa’ jun choxahil ch’utam” (“Ch’utameb’ re junkab’al,” Jolomil ch’utub’aj-ib’ re mayo 2016). Chan ru naru nakatenq’aheb’ li komon chixtawb’al ru chan ru te’k’uub’anq na’leb’ sa’ kab’l ut sa’ li iglees? Maare naru taapatz’ re junjunq li komon naq te’wulaq chi kawresinb’ileb’ sa’ li tzoleb’aal re xwotzb’al xnumsihomeb’ sa’ li Iglees malaj sa’ kab’l b’ar wi’ ke’roksiheb’ li na’leb’ chirix li na’leb’ank sa’ ch’utam li wankeb’ sa’ Tzol’leb’ ut Sumwank 107:27–31, 85 (malaj sa’ li raatin li Awa’b’ej Ballard li ak xyeeman chaq). K’oxla xk’eeb’al xb’oqb’aleb’ li komon chi wulak chi kawresinb’ileb’ re xch’olob’ankileb’ li na’leb’ chirix chan ru neke’b’aanuman li jolomil ch’utam chi chaab’il. Waklesi xch’ooleb’ li komon chixk’eeb’al reetal k’a’ru li na’leb’ neke’xtzol sa’ li aatinak a’in li taatenq’anq reheb’ chi tz’aqonk chi ch’olch’o ru sa’eb’ li ch’utam sa’ li junkab’al ut sa’ li iglees.

  

  Rik’in li k’uub’ank na’leb’ sa’ komonil li Qaawa’ naxk’e chi uxmank lix k’anjel.

Xkomon chik li k’anjeleb’aal

Lix wankilal li tijonelil.

Li Awa’b’ej Dallin H. Oaks kixye:

“Moko k’aynaqo ta chixyeeb’al naq eb’ li ixq wan rik’ineb’ xwankil li tijonelil sa’ lix b’oqb’aleb’ sa’ li Iglees, a’ut k’a’ chik ru chi wankilal a’an? Naq jun li ixq—us ta saaj malaj tiix—naxaqab’aman chixjultikankil li evangelio jo’ misioneer, nak’eeman re jun wankilal k’eeb’il xb’aan li tijonelil re xb’aanunkil jun k’anjel re li tijonelil. Yaal ajwi’ a’in rik’in jun li ixq li xaqab’anb’il chi k’anjelak jo’ aj k’anjel malaj jo’ aj tzolonel sa’ jun ch’utam sa’ li Iglees, chi b’eresinb’il xb’aan li ani nak’amok re xlaawil li tijonelil. Yalaq ani nak’anjelak sa’ junaq opiis malaj xb’oqb’al li naxk’ul rik’in li ani nak’amok re xlaawil li tijonelil, yoo chixk’anjelankil lix wankil li tijonelil sa’ xb’aanunkil li k’anjel k’eeb’il re, us ta ixq malaj winq” (“Eb’ li laaw ut wankilal re li tijonelil,” Jolomil ch’utub’aj-ib’ re mayo 2014).

Li Awa’b’ej M. Russell Ballard kixye:

“Li qaChoxahil Yuwa’ moko naxram ta lix wankilal. Chixjunil li winq ut chixjunil li ixq naru neke’xk’ul li wankilal a’an re xk’ulb’al xtenq’ sa’ xyu’ameb’. Chixjunileb’ li okenaqeb’ sa’ loq’laj sumwank rik’in li Qaawa’ ut neke’roxloq’iheb’ li sumwank a’an k’ulub’ejeb’ chixk’ulb’al k’utb’esinb’il na’leb’ choq’ reheb’, chi osob’tesiik rik’in xb’eresihomeb’ li anjel, chi aatinak rik’in li Dios, chixk’ulb’al lix tz’aqalil li evangelio, ut sa’ xraqik, chi wulak chireechaninkil chixjunil li k’a’ru re li qaYuwa’ rochb’een li Jesukristo” (“Hombres y mujeres en la obra del Señor,” Liahona, abril 2014, 4–5).

Xchaab’ilob’resinkil li qak’utum

Tenq’aheb’ li komon sa’ li tzoleb’aal chixwaklesinkil rib’ chirib’ileb’ rib’. “Rik’in li junjunq li wan sa’ laa tzoleb’aal naru natawman li xnawom ch’oolej, li chaab’il na’leb’, ut li k’a’ru nak’ulman rik’in xyu’aminkil li evangelio. B’oqeb’ chi wotzok ut chixwaklesinkil rib’ chirib’ileb’ rib’ ” (Li k’utuk jo’ li Kolonel, 5).