C. C. A. Christensen (1831–1912), Eb’ laj santil paab’anel neke’isiik chaq sa’ li Condado Jackson, Missouri, c. 1878, tempera en muselina, 77 ¼ × 113 pulgadas. Museo de Arte, Universidad de Brigham Young, jun maatan k’eeb’il xb’aaneb’ li ri laj C. C. A. Christensen, 1970

6–12 septiembre

Tzol’leb’ ut Sumwank 98–101

“Ch’anch’o chexwanq, ut chenaw naq laa’in li Dios”

K’a’ruhatq chi ch’a’ajkilal malaj yale’k neke’xnumsi li komon li wankeb’ sa’ laa tzoleb’aal? K’a’ruheb’ li na’leb’ ut k’ojob’ank ch’oolej neke’tawman sa’ Tzol’leb’ ut Sumwank 98–101 li naru natenq’an reheb’?

Tz’iib’a li nakak’oxla

Xkanab’ankileb’ chi wotzok

Naru taapatz’ reheb’ li komon naq te’xwotz k’a’ruhaq xe’xtzol sa’ Tzol’leb’ ut Sumwank 98–101 li xtenq’an reheb’ rik’in junaq yale’k malaj ch’a’ajkilal xe’xnumsi.

Xk’utb’al li tzolʼlebʼ

Tzol’leb’ ut Sumwank 98:1–3, 11–16, 23–30, 37; 101:2–5, 9–16

Li xyalb’al qix naru taak’anjelaq sa’ junajil choq’ re qachaab’ilal.

• Li rahob’tesiik malaj li ka’pak’aliik naqanumsi maare jalan chiru li ke’xnumsi chaq laj santil paab’anel aran Missouri sa’ 1833, a’b’an li na’leb’ naxk’e li Qaawa’ sa’ Tzol’leb’ ut Sumwank 98 toj nak’anjelak anajwan. Re xtenq’ankileb’ li komon chi tzolok chirix li na’leb’ a’an, naru nakatz’iib’a chiru li pizarron junjunq patz’om jo’eb’ a’in: Chan ru naraj li Qaawa’ naq eb’ laj santil paab’anel te’ril li ka’pak’aliik? K’a’ru naraj li Qaawa’ naq taqab’aanu sa’ li rahob’tesiik? Eb’ li komon naru neke’k’anjelak sa’ kok’ ch’uut re xsik’b’al xsumenkileb’ sa’ Tzol’leb’ ut Sumwank 98:1–3, 11–16, 23–30, ut chirix a’an te’aatinaq chirix li xe’xtzol. K’a’ruheb’ li yaal neke’qataw li naru nokohe’xtenq’a chi chaab’ilo’k jo’ xtzolom li Jesukristo? Li na’leb’ sa’ “Xkomon chik li k’anjeleb’aal” naru neke’xtz’aqob’resi ru li aatinak.

• Sa’eb’ li hoonal re rahob’tesiik ut yale’k, li na’leb’ sa’eb’ li tasal 98 ut 101 naru neke’tenq’an: li Qaawa’ tooxtenq’a wi wan qach’ool chixkanab’ankil qib’ sa’ ruq’ a’an. Re xtenq’ankileb’ li komon chixtawb’al li na’leb’ a’an, naru nakatz’iib’aheb’ li raqal a’in chiru li pizarron ut taapatz’ reheb’ naq te’xsik’ ru junjunq reheb’ re te’ril ru: Tzol’leb’ ut Sumwank 98:1–3, 11–12, 37; 101:2–5, 9–16. Patz’ reheb’ naq te’xwotz li na’leb’ te’xtaw li natenq’an reheb’ chixkanab’ankil rib’ sa’ ruq’ li Qaawa’. K’a’ru neke’xk’ut chiqu li raqal a’an chirix chan ru taqakanab’ qib’ sa’ ruq’ li Qaawa’? (Chi’ilmanq ajwi’ Linda S. Reeves “Reclamen las bendiciones de sus convenios,” Liahona, noviembre 2013, 118–120.)

Tzol’leb’ ut Sumwank 101:1–8, 43–62

Xtaaqenkil li na’leb’ naxk’e li Qaawa’ nokoxtenq’a chixkolb’al qib’.

• Chan ru naru nakatenq’aheb’ li komon chixk’eeb’al reetal li kolok-ix nachal xb’aan “ab’ink chiru lix yaab’ xkux li Qaawa’ ”? (raqal 7). Maare naru taapatz’ re junjunq reheb’ li komon naq te’xk’utb’esi li jaljookil ru aatin wan sa’ Tzol’leb’ ut Sumwank 101:43–62, naq junaq chik li komon yooq chixyaab’asinkil. Chirix a’an naru nekex’aatinak chirixeb’ li patz’om jo’eb’ a’in: K’a’ raj ru naru neke’reetali li junjunq chi na’leb’ sa’ li jaljookil ru aatin? K’a’ut naq kisach li awimq chiruheb’ li moos? K’a’ru naqatzol rik’in lix b’aanuhomeb’ li moos? K’a’ru naqatzol chirix li Qaawa’ xb’aaneb’ lix b’aanuhom li xnimal ru winq? Maare us raj xjuntaq’eetankileb’ li raqal 1–8 rik’ineb’ li raqal 47–51, ut aatinak chirix chan ru naru nokowan “chi tiik ut chi wan qana’leb’ ” sa’ li qak’anjel re xk’ojob’ankil Sion sa’ li qayu’am, sa’ li qochoch, ut jo’ Iglees.

  

  Xcha’al li jalam-uuch Li Kristo ut li saaj aj b’ihom, xb’aan laj Heinrich Hofmann

Xkomon chik li k’anjeleb’aal

Xk’eeb’al lix ka’pak’alil li ko naraj ru xkawil xch’ool aj Kristiano.

Li Elder Robert D. Hales kixye:

“Junjunqeb’ li kristiaan neke’xk’oxla chi ink’a’ us naq li ch’anaak, li tuulanil, li kuyuk maak, ut xwotzb’al tuulanil xnawom ch’oolej a’aneb’ sumehom yal maak’a’eb’ aj-e ut q’uneb’ xmetz’ew. A’b’an, “xraab’aleb’ li neke’pleetink qe, rosob’tesinkileb’ li neke’majewank qe, xb’aanunkil li us choq’ reheb’ li xik’ neke’ilok qe, ut tijok chirixeb’ li neke’hob’ok qe ut li neke’rahob’tesink qe” (Mateo 5:44) naraj ru li paab’aal, li kawilal, ut, mas wi’chik, li kawil ch’oolej. …

“Naq ink’a’ nokosumen—naq naqak’e xjunpak’alil chik li qako ut nokonumta sa’ xb’een li qajosq’il—naqataaqe ajwi’ lix b’aanuhom li Kolonel. Naqak’utb’esi lix rahom, a’an li wankilal li naru nanumta sa’ xb’een laj tza ut naxk’e xsumenkileb’ li neke’jitok qe chi ink’a’ naqajiteb’ a’an. Moko q’unil metz’ew ta a’an. A’an li xkawil xch’ool aj Kristiano” (“Valor cristiano: El precio del discipulado,” Liahona, noviembre 2008, 72).

Li kuyuk maak moko naraj ta naxye naq taqak’ulub’a.

Li Elder Kevin R. Duncan kixye: “Ex was wiitz’in, b’aanuhomaq usilal meesach ru. Li kuyuk maak moko naraj ta naxye naq taqak’ulub’a. Moko naraj ta naxye naq taqak’ulub’a li yib’ aj b’aanuhom malaj taqak’ulub’a naq toohe’xmajewa jalaneb’ xb’aaneb’ lix ch’a’ajkilal, lix rahilal, malaj q’unal xmetz’ew. A’b’an laa’o naru naqak’ul xnimal xtawb’al ru ut tuqtuukilal wi noko’ilok chi najt. … Li kuyuk maak a’an jun xnimal ru na’leb’ nak’irtesin. Moko tento ta naq toowanq chi rahob’tesinb’il wiib’ sut. Nokoru chi kuyuk maak” (“Li yulb’il b’an aj k’irtesinel re li kuyuk maak,” Jolomil ch’utub’aj-ib’ re abril 2016).

Xchaab’ilob’resinkil li qak’utum

Tenq’aheb’ li wankeb’ xch’a’ajkilal. Wan naq eb’ li komon wankeb’ xch’a’ajkilal ka’ajwi’ neke’raj ru naq te’k’ehe’q chi tz’aqonk re naq te’reek’a naq raab’ileb’. K’oxla xk’eeb’al xb’oqb’aleb’ chixk’ulb’al junaq ch’ina teneb’ahom sa’ junaq tzolok chalel, xk’eeb’aleb’ xb’oqb’al chi chalk chi tzolok, malaj xk’eeb’al reetal naq wan k’a’ru te’xik wi’ sa’ li iglees. Milukta aach’ool wi sa’ xtiklajik ink’a’ mas neke’ab’in chiru lix yalb’al aaq’e (chi’ilmanq Li k’utuk jo’ li Kolonel, 8–9).