Li santil ochoch re Kirtland, xb’aan laj Al Rounds

30 agosto–5 septiembre

Tzol’leb’ ut Sumwank 94–97

“Choq’ re xkolb’al Sion”

Chan ru naru nakatenq’aheb’ li komon chi chaab’il re naq te’rataweb’ li osob’tesihom yeehi’inb’ileb’ sa’ Tzol’leb’ ut Sumwank 94–97?

Tz’iib’a li nakak’oxla

Xkanab’ankileb’ chi wotzok

Eb’ li komon maare naru neke’xwotz k’a’ruhaq xe’xtaw sa’ Tzol’leb’ ut Sumwank 94–97 li namusiq’an reheb’ chi xik sa’ li santil ochoch chi kok’ aj xsa’. Malaj ut naru neke’xwotz jalan chik na’leb’ li kimusiq’an reheb’ naq xe’ril ruheb’ li tasal a’in.

Xk’utb’al li tzolʼlebʼ

Tzol’leb’ ut Sumwank 95:8; 97:10–17

Sa’ li santil ochoch, li Dios narosob’tesi lix tenamit.

• Chan ru naru nakawoksiheb’ li yaal neke’k’utman sa’ Tzol’leb’ ut Sumwank 95 ut 97 re xwaklesinkil xch’ooleb’ li komon chixsik’b’aleb’ li rosob’tesihom li santil ochoch chi yalb’ileb’ xq’e? Naru nakab’aanu rik’in xk’eeb’al junaq xjalam-uuch li santil ochoch sa’ xyi li pizarron ut taapatz’ reheb’ li komon k’a’ut neke’xk’oxla a’an naq li Qaawa’ naxtaqlaheb’ laj santil paab’anel chixkab’lankileb’ li santil ochoch. Eb’ li komon naru neke’xsik’ junjunqeb’ li sumehom sa’ Tzol’leb’ ut Sumwank 95:8; 97:10–17 ut te’xtz’iib’a chiru li pizarron li k’a’ru te’xtaw, sa’ xsutam lix jalam-uuch li santil ochoch. (Naru ajwi’ neke’xsik’ xkomoneb’ li sumehom sa’ “Por qué los Santos de los Últimos Días construyen templos” [temples.ChurchofJesusChrist.org]). Chan ru naq eb’ li ajom a’an xe’tz’aqlok ru sa’eb’ li qayu’am? K’a’ru naru naqab’aanu re naq li santil ochoch a’anaq jun na’ajej aajel wi’chik ru sa’ li qayu’am?

• Li Iglees naxk’e k’iila k’anjeleb’aal qe re tzolok chirix li santil ochoch. K’oxla chan ru naru nakawoksi junjunq reheb’ li k’anjeleb’aal a’an re xtz’aqob’resinkil ru li aatinak chirix Tzol’leb’ ut Sumwank 95 ut 97, ut xwaklesinkil xch’ooleb’ li komon chixsik’b’aleb’ li rosob’tesihom li santil ochoch chi yalb’ileb’ xq’e. Qayehaq, rub’elaj li tzolok naru nakapatz’ reheb’ junjunq li komon naq te’ril ru sa’ internet li perel temples.ChurchofJesusChrist.org malaj Templos de La Iglesia de Jesucristo de los Santos de los Últimos Días (Liahona, octubre 2010). Patz’ reheb’ li komon naq te’xkawresi chaq rib’ re xwotzb’al k’a’ruhaq xe’xtzol li naxk’am rib’ rik’in li na’leb’ natawman sa’eb’ li tasal 95 ut 97.

  Wi nakatzoleb’ li saaj, naru taapatz’ reheb’ naq te’ril ru: “Hagan el templo parte de su vida” (sa’ Templos de La Iglesia de Jesucristo de los Santos de los Últimos Días, 77–78) ut te’xwotz k’a’ru neke’xb’aanu re naq li santil ochoch aajel ru sa’ lix yu’ameb’.

  Li video “Dos Apóstoles dirigen un recorrido en video por el Templo de Roma, Italia” (ChurchofJesusChrist.org) naru naxtenq’aheb’ li ani yookeb’ chixkawresinkil rib’ re ok sa’ li santil ochoch.

  Naru ajwi’ nekeb’icha sa’ komonil jun li b’ich na’aatinak chirixeb’ li santil ochoch ut tex-aatinaq chirix li naxk’ut (chi’ilmanq li tusleb’aal na’leb’ sa’ Eb’ li B’ich).

Tzol’leb’ ut Sumwank 97:8–9

Naru naq k’ulub’anb’ilaqo xb’aan li Qaawa’.

• K’a’ru naqatzol sa’ Tzol’leb’ ut Sumwank 97:8 chirix li k’a’ru naraj naxye li k’ulub’aak xb’aan li Qaawa’? Chan ru naq jalan a’an chiru chan ru naq naqasik’ kulub’aak sa’ li ruchich’och’? K’a’ruheb’ li osob’tesihom neke’yeechi’iman sa’ li raqal 9 choq’ reheb’ li ani k’ulub’anb’ileb’ xb’aan li Qaawa’? Eb’ li komon naru ajwi’ neke’ril ru li raatin li Elder Erich W. Kopischke: “Ser aceptados por el Señor” (Liahona, mayo 2013, 104–106), ut te’xye chan ru naxtenq’aheb’ chixtawb’aleb’ ru li raqal a’in. Sa’ li raqal natawman sa’ “Xkomon chik li k’anjeleb’aal” wan jun b’oqom naxk’e li Elder Kopischke re xsik’b’al lix k’ulub’ahom li Qaawa’ sa’ li qayu’am.

Tzol’leb’ ut Sumwank 97:18–28

Sion a’an “li saqeb’ ru xch’ool.”

• Re xtenq’ankileb’ li komon chixk’oxlankil k’a’ru naraj naxye Sion, naru nakatz’iib’a chiru li pizarron K’a’ru naraj naxye Sion? ut taapatz’ reheb’ naq te’xsik’ xsumenkil sa’ Tzol’leb’ ut Sumwank 97:19 ut 21 (chi’ilmanq ajwi’ Moises 7:18; Temas del Evangelio, “Sion,” topics.ChurchofJesusChrist.org). Maare us raj aatinak chirix chan ru naq li Kolonel nokoxtenq’a chi wulak chi wank chi “saq ru qach’ool.” K’a’ru noko’eek’asiik chixb’aanunkil re xk’ojob’ankil Sion sa’ li qayu’am? sa’ li qateep malaj uq’ej? sa’ li qatenamit?

  

  Xkab’lankil li santil ochoch re Kirtland kixtenq’aheb’ laj santil paab’anel chi wank chi jwal “saq ru xch’ooleb’.”

• Li Qaawa’ kik’utuk chirix Sion chirix naq kixtaqlaheb’ laj santil paab’anel chixkab’lankil jun santil ochoch “choq’ re xkolb’al Sion” (chi’ilmanq Tzol’leb’ ut Sumwank 97:12, 18–28). K’a’ut naq li santil ochoch aajel ru sa’ xk’ojob’ankil Sion? Chan ru naq neke’tz’aqlok ru lix yeechi’ihom li Qaawa’ chirix Sion sa’eb’ li raqal 18–28 sa’eb’ li qakutan?

Xkomon chik li k’anjeleb’aal

Li k’ulub’aak xb’aan li Qaawa’.

Naq ki’aatinak chirix li “ch’ina tusulal” nak’utman sa’ Tzol’leb’ ut Sumwank 97:8, li Elder Erich W. Kopischke kixye:

“Li xsik’b’al ut xk’ulb’al lix k’ulub’ahom li Qaawa’ tooxk’am sa’ xnawb’al naq sik’b’il qu ut osob’tesinb’ilo xb’aan a’an. Taqak’ul jun xnimal qoyb’enihom naq a’an tooxb’eresi ut tixk’am qab’e sa’ li k’a’ru us. Lix q’unal uxtaan tixk’utb’esi rib’ sa’ li qaam, sa’ li qayu’am, ut sa’ li qajunkab’al.

“Chi anchal inch’ool nekexinb’oq chixsik’b’al lix k’ulub’ahom li Qaawa’ ut chixyalb’al xsahileb’ li osob’tesihom yeechi’inb’ileb’. Naq taqataaqe li ch’ina tusulal kixk’ut li Qaawa’, toowulaq chixnawb’al naq k’ulub’anb’ilo xb’aan a’an, maak’a’ naxye k’a’ru li qana’aj, li qawankil, malaj qapaaltil sa’ yu’am” (“Ser aceptados por el Señor,” Liahona, mayo 2013, 106).

Xchaab’ilob’resinkil li qak’utum

Naweb’ ru li tzolb’ileb’ aab’aan. Li junjunq chi kristiaan nakatzol wan xnumsihom, xk’a’uxl, ut xseeb’al. Tijon re xnawb’al chan ru naq lix nawom li junjunq chi kristiaan naru narosob’tesiheb’ xkomoneb’ chik li komon. (Chi’ilmanq Li k’utuk jo’ li Kolonel, 7.)