alii ma taavale solofanua

C. C. A. Christensen (1831–1912), Zion’s Camp, c. 1878, tempera on muslin, 78 × 114 inches. Falemataaga o Faatufugaga a le Iunivesite a Polika Iaga, meaalofa a le fanau a fanau a C. C. A. Christensen, 1970

13–19 Setema

Mataupu Faavae ma Feagaiga 102–105

“A Mavae Puapuaga e Tele … Ona Oo mai lea o Faamanuiaga”

Ao e saunia e aoao atu le Mataupu Faavae ma Feagaiga 102–5, faalogo i uunaiga a le Agaga. Atonu na te taitaia oe i mataupu faavae e le o taua i lenei otootoga o le a faamanuia ai tagata o loo e aoaoina.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai e tagata o le vasega ona tusi i lalo se fuaiupu pe lua mai le Mataupu Faavae ma Feagaiga 102–5 latou te iloaina e aoga ia i latou lava. Ona mafai lea ona latou fesuiai fuaiupu ma se isi tagata o le vasega ma talanoaina i le tasi ma le isi mea ua latou aoaoina mai nei fuaiupu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 103; 105

O o tatou puapuaga e aoaoina i tatou i ni lesona aoga ma tuuina mai ia i tatou ni aafiaga.

• Ao suesue e tagata o le vasega le vaega 103 ma le 105 i lenei vaiaso, atonu latou te mauaina ni mataupu faavae e mafai ona fesoasoani ia i tatou i taimi o puapuaga po o faigata; tuu atu ia i latou e faasoa mai mea na latou maua. Pe mafai foi ona e valaaulia i latou e vaavaai mo na mataupu faavae i le Mataupu Faavae ma Feagaiga 103:5–7, 12, 36; 105:5–6, 9–12, 18–19 (tagai foi “Punaoa Faaopoopo”). O a mea ua fautua mai e nei mataupu faavae e uiga i le ala e mafai ona tatou tali atu ai pe a feagai ma faigata po o faanoanoaga? Atonu e naunau tagata o le vasega e faasoa mai ni aafiaga na oo mai ai ni faamanuiaga ina ua “mavae puapuaga e tele” (Mataupu Faavae ma Feagaiga 103:12.).

• Afai e te manatu o nisi o talaaga faasolopito po o tala patino e uiga i le Tolauapiga a Siona e aoga, e mafai ona e valaaulia se tasi e iloilo se tasi o nei punaoa ae lei faia le vasega e faasoa puupuu mai mea ua latou aoaoina: Au Paia, 1:194–206; “O le Ofo ua Taliaina o le Toalauapiga a Siona” (Faaaliga i le Tusiga, 213–18); po o “Leo o le Toefuataiga: Tolauapiga a Siona” (i le otootoga o lenei vaiaso i le Sau Mulimuli Mai ia te A’u—Mo Tagata Taitoatasi ma Aiga). Afai tatou te toe foi i tua i le taimi ma talanoa i le Tolauapiga a Siona, o le a se mea e mafai ona tatou fai atu e uunaia ai i latou? O a ni mea latou te ono ta’u mai e uunaia ai i tatou?

  tamai vaitafe

  Na nonofo le Tolauapiga a Siona i atutafa o auvai o le Little Fishing River, ua pueina iinei.

Mataupu Faavae ma Feagaiga 104:11–18

O i tatou taitoatasi o “se tausimea i faamanuiaga faalelalolagi.”

• Ina ia fesoasoani i tagata o le vasega e faapatino aoaoga i le Mataupu Faavae ma Feagaiga 104:11–18), e mafai ona e valaaulia i latou e mafaufau faapea ua latou tuuina atu se mea taugata tele e tausia e se isi. O le a se latou tala e fai atu i lena tagata? O le a se mea latou te faamoemoe mai ia te ia? Ona mafai lea e tagata o le vasega ona faitau le Mataupu Faavae ma Feagaiga 104:11–18) ia iloa ai mea ua tuuina mai e le Alii i la tatou tausiga ma le mea ua Ia faamoemoe mai ia i tatou. E faapefea e nei fuaiupu ona aafia ai le ala tatou te mafaufau ai e uiga i le lalolagi, o tatou faamanuiaga, po o tagata o siomia ai i tatou?

• Ina ia fesoasoani i tagata o le vasega ia malamalama atili i “le ala … Ua folafola e le Alii e faia ai mea mo [Lana] au paia” (Mataupu Faavae ma Feagaiga 104:16), mafaufau e faasoa atu le vitio “The Labor of His Hands” (ChurchofJesusChrist.org). E faalagolago i mea ua tatou aoao mai lenei vitio ma le Mataupu Faavae ma Feagaiga 104:11–18), o le a le ala a le Alii e faia ai mea mo Lana Au Paia? E mafai foi ona e faasoa atu lenei fuaitau a Peresitene Marion G. Romney: “O le Alii … E mafai ona tausia e [matitiva] e aunoa ma la tatou fesoasoani pe afai o lona faamoemoega le faia o lea. … Ae tatou te manaomia lenei aafiaga; aua e nao lo tatou iloa ona tausi o le tasi ma le isi e mafai ai ona tatou maua le alofa ma amioga moni uma faa-Keriso, e manaomia ia tatou agavaa ai tatou te toe foi atu ai i lona afioaga” (“O Le Ola e Tusa ai ma Mataupu o le Uelefea,” Liahona, Ian. 1982, 178-79). Tuu atu i tagata o le vasega ni nai minute e faamaumau ai o latou uunaiga i le ala e mafai ona latou fesoasoani e tausia isi i le ala a le Alii.

aikona o punaoa faaopoopo

Punaoa Faaopoopo

O le mana faamamā o puapuaga.

Na aoao mai Elder Orson F. Whitney: “E leai se tiga tatou te mafatia ai, leai se tofotofoga tatou te oo i ai e maimau. E aoga mo lo tatou a’otauina, i le atinaega o na uiga auaumama e pei o le onosai, faatuatua, lototoa ma le lotomaulalo. O mea uma tatou te mafatia ai, ma mea uma tatou te onosaia, ae maise lava pe a tatou onosaia ma le faapalepale, e atiina ae ai o tatou tagata, faamama ai o tatou loto, faalautele ai o tatou agaga, ma faia ai i tatou ia sili atu ona agamalu ma agaalofa, ma sili atu ona agavaa e ta’ua o fanau a le Atua … ma e ala mai i faanoanoaga ma mafatiaga, o le galulue punouai ma puapuaga, tatou te maua ai le aoaoina lea ua tatou o mai ai iinei ina ia maua, ma o le a faapea ona avea atili ai i tatou e pei o lo tatou Tama ma Tina oi le lagi” (i le Spencer W. Kimball Faith Precedes the Miracle [1972], 98).

Na saunoa mai Elder David A. Bednar: “I nisi taimi i o tatou olaga taitoatasi, o le a valaauliaina i tatou e savalia la tatou lava Tolauapiga a Siona. O le a eseese taimi o valaaulia, ma atonu o faafitauli patino tatou te feagai ai i le malaga o le a eseese. Ae o la tatou tali atu faifaipea ma le mausali i lenei valaau mautinoa o le a iu ina saunia ai le tali i le fesili ‘O Ai o i ai i le Itu a le Alii?’ “ (“I Le Itu a le Alii: O Lesona mai le Tolauapiga a Siona,” Liahona, Iulai 2017,35).

Faaleleia o Lo Tatou Aoao Atu

Galulue faatasi ma tagata o le aiga. Ona o le aiga o le totonugalemu lena o le ola i le talalelei ma aoaoga, o au taumafaiga e faamalosia tagata o lau vasega e sili atu ona mataalia pe a e galue faatasi ma [ona]… tagata o le aiga” (Aoao Atu i le Ala a le Faaola, 8–9).