ua susulu atu le la i ao

20–26 Setema

Mataupu Faavae ma Feagaiga 106–108

“E Tatala Mai ai le Lagi!

A o e suesueina le Mataupu Faavae ma Feagaiga 106–8, mafaufau i aafiaga faaleagaga atonu na oo i ai lau vasega ao latou suesueina nei vaega. Ao e sauni e aoaoina atu i latou, atonu e fesoasoani le iloa o mea na latou maua e taua ae tou te lei feiloai.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai se fuaiupu mai nei vaega ua aoao ai se mataupu faavae e mafai ona faamalosia ai se tasi ia latou auaunaga i le Ekalesia.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 106; 108

E faatonuina, uunaia, ma lagolagoina e le Alii i latou Na te valaaulia e auauna atu.

• A o suesue e tagata o le vasega le Mataupu Faavae ma Feagaiga 106 ma le 108 i lenei vaiaso, atonu latou te maua ni fuaiupu e mafai ona fesoasoani ia i latou o loo auauna atu i valaauga i le Ekalesia (tagai otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga). Mafaufau e tuu atu i tagata o le vasega e tusi fuaitau na latou maua i nei vaega i le laupapa ma fai ia i latou e faasoa mai o latou manatu. O a aafiaga na latou maua e fesootai pe faaalia ai nei fuaitau?

Mataupu Faavae ma Feagaiga 107

E taitai e le Alii Lana Ekalesia e ala mai i le pule o le perisitua.

• E mafai ona e amataina se talanoaga e uiga i tofi o le perisitua i le valaaulia o tagata o le vasega e fai se lisi o pogai ua tuuina mai ai e le Alii ia i tatou ni perofeta, aposetolo, ma isi taitai o le Ekalesia. Atonu e mafai e tagata o le vasega ona faaopoopo i le latou lisi pe a uma ona faitau i le Mataupu Faavae ma Feagaiga 107:18–20). Ona mafai lea ona e faaalu sou taimi e iloilo ai tiutetauave ua tuuina atu e le Alii ia i latou e umia nei tofi: Au Peresitene Sili (fuaiupu 9, 21–22, 65–66, 91–92), o Aposetolo e Toasefululua (fuaiupu 23–24, 33–35, 38, 58), o Fitugafulu (fuaiupu 25–26, 34, 93–97), ma epikopo (fuaiupu 13–17, 68–76, 87–88). O le a se mea e mafai ona tatou faia e lagolago ai o tatou taitai e ala i lo tatou “talitonuga, faatuatua, ma tatalo”? (fuaiupu 22).

• E faapefea ona tatou tali atu pe a fesili mai se uo lē lotu ia i tatou, “O le a le perisitua?” po o “O a ki o le perisitua?” E ono faapefea ona aafia a tatou tali i aoaoga i le “Punaoa Faaopoopo”? Atonu e mafai foi e tagata o le vasega ona maua ni manatu aoga i le Mataupu Faavae ma Feagaiga 107:1–4, 18–20 (tagai foi Faamaoni i le Faatuatua, 124–28). E faapefea ona fesoasoani le perisitua ia i tatou e maua “mea lilo o le malo” ma “tatala mai ai le lagi ia i [tatou]”? E faapefea ona fesoasoani ia i tatou ia “olioli i le mafutaga ma le afio ai o le Atua le Tama ma Iesu Keriso”? (fuaiupu 19).

Mataupu Faavae ma Feagaiga 107:27–31, 85

E pulea e le Alii Lona malo e ala i aufono.

• Na saunoa mai Peresitene M. Russell Ballard, “Ou te iloa o aufono o le ala lea a le Alii ma na Ia foafoaina ai mea uma i le lalolagi e ala i se aufono faalelagi “ (“Aufono Faaleaiga,” Ensign po o le Liahona, Me 2016, 63). E mafai faapefea ona e fesoasoani ia i latou o e aoaoina ina ia iloa le auala e fefautuaai faatasi ai i le aiga ma i le lotu? Atonu e mafai ona e fai atu i ni nai tagata e o mai saunia e faasoa mai o latou aafiaga i le lotu po o le aiga na latou faaaogaina ai mataupu faavae o le fono faatasi i le Mataupu Faavae ma Feagaiga 107:27–31, 85 (po o le savali a Peresitene Ballard o loo i luga). Mafaufau e valaaulia tagata o le vasega i le vaiaso e o mai saunia i le vasega e faasoa mai ni manatu i mea e anoa ai se aufono. Uunaia tagata o le vasega e faailoa mai mataupu faavae na latou aoao mai lenei talanoaga o le a fesoasoani ia i latou ia sili atu le aoga ao latou auai i aufono a aiga ma le ekalesia i le lumanai.

  fonotaga a aufono a faiaoga

  O le fefautuaai o se tasi o ala e faia ai e le Alii Lana galuega.

aikona o punaoa faaopoopo

Punaoa Faaopoopo

Pule o le Perisitua

Na aoao mai Peresitene Dallin H. Oaks:

“E le masani ona tatou talanoa i tamaitai i le i ai o le pule o le perisitua i o latou valaauga faale-Ekalesia, ae o le a se isi pule o i ai? Pe a vaetofiaina se tamaitai—talavou pe matua—e talai le talalelei o se faifeautalai faamisiona, ua tuu atu ia te ia le pule o le perisitua e faatino ai se matafaioi faaleperisitua. E moni foi lena mea pe a vaetofiaina se tamaitai e galue o se taitai po o se faiaoga i se faalapotopotoga o le Ekalesia i lalo o le taitaiga a se tasi o loo umiaina ki o le perisitua. Po o ai lava e galue i se tofi po o se valaauga na maua mai se tasi o loo umiaina ki o le perisitua ua ia faaaogaina le pule o le perisitua i le faatinoina o ona tiute atofaina” (O Ki ma le Pule o le Perisitua,”,” Ensign po o le Liahona, Me 2014, 50–51).

Na saunoa Peresitene M. Russell Ballard:

“E agalelei lo tatou Tama o i le Lagi i Lona mana. E maua e alii ma tamaitai uma lenei mana e fesoasoani ai i o latou olaga. O i latou uma o e osia feagaiga paia ma le Alii ma e faamamaluina na feagaiga o le a agavaa e maua faaaliga faaletagata lava ia, ia faamanuiaina e ala i auaunaga a agelu, e fagatua ma le Atua, e maua le atoaga o le talalelei, ma, mulimuli ane, ia avea ma suli faatasi ma Iesu Keriso i mea uma o i ai a lo tatou Tama.”(O Alii ma Tamaitai i le Galuega a le Alii,”New Era, Liahona, Aper. 2014,4–5).

Faaleleia o Lo Tatou Aoao Atu

Fesoasoani i tagata aoao e sii ae le tasi ma le isi. “O tagata taitoatasi o i lau vasega o se puna faaoaina o molimau, manatu ma aafiaga i le ola ai i le talalelei. Valaaulia i latou e faasoa atu, ma sii ae le tasi ma le isi” (Aoao Atu i le Ala a le Faaola,5).