Malumalu o Katelani

Malumalu o Katelani, saunia e Jon McNaughton

27 Setema–3 Oketopa.

Mataupu Faavae ma Feagaiga 109–110

”O Lou Maota Lava, o se Nofoaga mo Lou Paia”

Ua faamatala mai e le vaega 109 ma le 110 nisi o mea e sili ona paia na tutupu o le Toefuataiga. Ia mautinoa ua faasoa mai e tagata o le vasega o latou manatu ma lagona ao latou suesueina nei mea.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Na folafola mai e le Alii faapea “o le a salalau atu le ta’uta’ua o lenei fale [le Malumalu o Katelani] i atunuu ese” (Mataupu Faavae ma Feagaiga 110:10.). E mafai ona e valaaulia tagata o le vasega e faasoa mai se mea na latou aoaoina i a latou suesuega latou te lagona e tatau ona faasalalau atu i tagata i le salafa o le lalolagi.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 109; 110:1–10

E finagalo le Alii e faamanuia i tatou i totonu o Lona maota paia.

• O le suesueina o le vaega 109 o se avanoa ofoofogia e fesoasoani ai i tagata o le vasega e faamalosia lo latou manao e tapuai i totonu o le malumalu. E mafai ona e tusia i le laupapa numera o nisi o fuaiupu e ta’ua ai faamanuiaga o le malumalu—e pei o fuaiupu 12–13, 22–23, 24–28, 29–32. E mafai e tagata o le vasega ona filifili fuaiupu e faitau ma mafaufau loloto i ai, taitoatasi pe ini vaega, ona otooto lea mo le vasega faamanuiaga ua faamatala mai e na fuaiupu. O tagata ua ulu i le malumalu e mafai ona faasoa mai le ala na latou aafia ai i nei faamanuiaga i o latou olaga.

  E mafai foi ona outou faitau pe usu faatasi “Le Agaga o le Atua” (Viiga, nu. 2), lea na usuina i le faapaiaga o le Malumalu o Katelani. E mafai e tagata o le vasega ona faasino mai faamanuiaga o le malumalu ua faamatalaina i le viiga ma faasoa mai ni aafiaga e fesootai na latou maua, pe a talafeagai ai.

• O le mauaina o faamanuiaga o le malumalu e masani ona manaomia ai le ositaulaga. O le a le mea ua aoao mai e le Mataupu Faavae ma Feagaiga 109:5. e uiga i osigātaulaga a uluai Au Paia na faia i le fausiaina o le Malumalu o Katelani? Atonu e mafai ona sau saunia se tasi e talanoa e uiga i nei osigataulaga (tagai “O se Maota mo lo Tatou Atua,” Faaaliga i Tusiga, 169–71). O a ni osigataulaga tatou te faia e maua ai faamanuiaga o le malumalu i le asō? Atonu o le a naunau tagata o le vasega e faasoa mai ni o latou aafiaga. O nisi o faataitaiga i aso nei e maua i vitio “Sealed Together: The Manaus Temple Caravan” ma le “Temples Are a Beacon” (ChurchofJesusChrist.org).

• O le suesueina o le faamatalaga o le Faaola ua toetu i le Mataupu Faavae ma Feagaiga 110:1–10) o se ala sili e fausia ai lo tatou faatuatua ia Iesu Keriso. Atonu e te fai atu i tagata o le vasega e manatua le ata i nei fuaiupu ma mafaufau po o a mea ua aoao mai e nei ata ia i tatou e uiga ia Iesu Keriso. O le a se mea e ono suitulaga ai le “teuteuina i le auro maoʼi” po o le leo “sa pei o le leo o le tafe-taalili o vai tetele”?

  O totonu o le Malumalu o Katelani

  O pito uma o le Malumalu o Katelani e i ai pulelaa mo taitai peristua.

Mataupu Faavae ma Feagaiga 110:11–16

O ki o le perisitua na manaomia e faataunuu ai le galuega a le Atua i le Ekalesia i le asō.

• Ina ia fesoasoani i tagata o le vasega e malamalama i ki o le perisitua na tuuina mai e Mose, Elaia, ma Elia ia Iosefa Samita ma Oliva Kaotui i le Malumalu o Katelani, e mafai ona e valaaulia i latou e faitau ma talanoaina le fuaitau i le “Punaoa Faaopoopo” taitoatasi pe i ni vaega. Aisea e taua ai nei ki i o tatou olaga i aso nei? E mafai ona e fai i tagata taitasi o le vasega e filifili se tasi o perofeta na tuuina atu na ki—Mose, Elaia, ma Elia—ma aoao ia te ia mai le Lomifefiloi o le Tusi Paia po o le Taiala i Tusitusiga Paia. O le a le mea e aoao mai ia i tatou e soifuaga o nei perofeta e uiga i ki na latou tuuina mai? E mafai ona taitai atu lenei mea i se talanoaga e uiga i mea e finagalo le Alii tatou te faia nei ona o lea ua i ai nei ki i le lalolagi.

aikona o punaoa faaopoopo

Punaoa Faaopoopo

O ki e maua ai le mana ma le pule mo le galuega a le Atua.

Na aoao mai Elder Quentin L. Cook:

“O le Malumalu o Katelani, i le tulaga ma le telē, sa matua tau le iloa lava. Peitai e tusa ai ma lona taua tele i le tagata, sa i ai lona aafiaga e faavavau. Na toefuatai mai e perofeta anamua ia ki o le perisitua mo sauniga faaola e faavavau o le talalelei a Iesu Keriso. Na taunuu lenei mea i le olioli lofituina mo tagata faamaoni o le au paia.

“O nei ki ua aumaia ai le ‘mana mai luga’ [Mataupu Faavae ma Feagaiga 38:38] mo tiute na atofa mai le lagi ia e aofia ai le faamoemoega autu o le Ekalesia. I lena aso matagofie o le Eseta i le Malumalu o Katelani, e tolu ki na toefuatai mai ai:

“Muamua, na faaali mai Mose ma tauaao atu ki o le faapotopotoina o Isaraelu mai itu e fa o le lalolagi, o le galuega faafaifeautalai lea.

“Lona lua, na faaali mai Elaia ma tauaaoina atu ia ki o le tisipenisione o le talalelei a Aperaamo, lea e aofia ai le toefuataiga mai o le feagaiga faaAperaamo [tagai Aperaamo 2:8–11]. Na aoao mai Peresitene Russel M. Nelson o le faamoemoega o ki o le feagaiga o le saunia lea o tagata mo le malo o le Atua [tagai “Feagaiga,” Ensign po o le Liahona, Nov. 2011, 88]. …

“Lona tolu, na faaali mai Elia ma tauaao atu ia ki o le mana faamau i lenei tisipenisione, o galuega o talafaasolopito o aiga ia ma sauniga o le malumalu e mafai ai ona maua le faaolataga mo e o soifua ma e ua maliliu” (“Saunia e Feiloai ma le Atua,” Ensign po o le Liahona, Me 2018, 114–15).

Faaleleia o Lo Tatou Aoao Atu

Valaaulia le Agaga i au aoaoga. “O le faamoemoega autu o mea uma e faia e se faiaoga o le talalelei—o fesili uma, o mau uma, o gaoioiga uma—o le valaaulia o le Agaga e fausia le faatuatua ma valaaulia tagata uma e o mai ia Keriso. … O musika paia, o tusitusiga paia, o upu a perofeta o aso e gata ai, o le faaalia o le alofa ma le molimau, ma taimi o manatunatuga filemu e mafai ona valaaulia uma ai le mafutaga a le Agaga” (Aoao Atu i le Ala a le Faaola,10).