Iosefa Samita o loo talai atu

4–10 Oketopa.

Mataupu Faavae ma Feagaiga 111–114

“O le a Ou Faatulagaina Mea Uma mo lo Outou Lelei”

Ao e faitau i le Mataupu Faavae ma Feagaiga 111–14, mafaufau i upumoni faaleagaga e finagalo le Alii ia malamalama i ai tagata o lau vasega. O le a fesoasoani le Agaga Paia e taiala oe ia iloa mataupu faavae e taulai i ai.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau e tusi se ata o se pusa o oloa taua i le laupapa. E mafai e tagata o le vasega ona tusi i le laupapa fuaiupu mai vaega 111–14 lea na latou maua ai se mea latou te manatu o “oa e tele” Mataupu Faavae ma Feagaiga 111:2). Fai i ni nai tagata e faasoa mai mea na latou maua e taua tele i na fuaiupu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 111

E mafai e le Alii ona “faatulaga mea uma mo [lo tatou] lelei.”

• O le fautuaga a le Alii i le Mataupu Faavae ma Feagaiga 111 e mafai ona fesoasoani i tagata o lau vasega pe a latou popole i faafitauli faaletino pe faaleagaga,e pei lava ona fesoasoani ai ia Iosefa Samita i ona popolega ia Siona. E mafai ona e amata se talanoaga i le valaaulia o tagata o le vasega e lisi i le laupapa ni mea o loo latou popole i ai po o ni tagata foi latou te iloa. Ma, faatasi ai ma na popolega i le mafaufau, e mafai ona latou suesue le vaega 111 mo fautuaga ma le faamafanafanaga e tuuina mai e le Alii e fesoasoani ia i tatou. E mafai e tagata o le vasega ona faasoa mai pe na faapefea ona fesoasoani le Faaola ia i latou pe a latou tuu atu lo latou faatuatua ia te Ia.

• Atonu na i ai ni aafiaga o tagata o lau vasega e pei o Iosefa—ina ua latou lagona na taliaina i latou e le Alii e ui lava i o latou “sese” (Mataupu Faavae ma Feagaiga 111:1). E faapefea ona tutusa o latou aafiaga ma upumoni ua aoaoina i le Mataupu Faavae ma Feagaiga 111? Mo se faataitaiga, o anafea na latou lagona ai ua “faatulaga [e le Alii] mea uma mo lo [latou] lelei”? (fuaiupu 11). O a mea ua aoao mai e nei aafiaga e uiga i le Faaola ma i latou lava?

Mataupu Faavae ma Feagaiga 112:3–15, 22

O le a taitai e le Alii i latou e saili atu ma le lotomaualalo Lona finagalo.

• Ina ia fesoasoani i tagata o le vasega e talanoaina mea ua aoaoina i le vaega 112 e uiga i le lotomaualalo, mafaufau e vaevae le vasega ini vaega se tolu. Atofa i vaega taitasi se tasi o fesili nei e mafaufau loloto i ai ao latou iloiloina fuaiupu 3–15 ma le 22: O le a le lotomaualalo? E faapefea ona faateleina lo tatou lotomaualalo? O a faamanuiaga ua folafola mai ia i latou e lotomaualalo? Tuu atu i le vasega se taimi e faasoa mai ai a latou tali. E mafai e vaega ona maua nisi manatu i le faitauina o le savali a Elder Quentin L. Cook i le “Punaoa Faaopoopo” po o le vaega ua faaautu “Lotomaualalo” i le Tala’i La’u Talalelei (itulau 126–27). Aisea e taua ai le lotomaualalo mo le faia o le galuega a le Alii?

  tagata e toalua o loo tatalo

  A tatou lotomaualalo, o le a taitaia i tatou e le Alii ma tali mai ia tatou tatalo.

Mataupu Faavae ma Feagaiga 112:12–26

O i latou e liua moni lava e oo ina iloa Iesu Keriso.

• O le mea moni faapea o nisi o Aposetolo i le 1837 na faasagatau i le Perofeta o se faamanatu lelei faapea po o le a lava le valaauga o tatou faia po o le tele o lo tatou iloa e uiga i le talalelei, e tatau ona tatou mautinoa taitoatasi ua tatou liua moni lava. O le faitau i le fautuaga a le Alii ia Thomas B. Marsh e fesoasoani ia te ia ia lototasi ma le Korama a le Toasefululua e mafai ona tuuina mai i le vasega ni manatu i le uiga o le liua. Atonu e mafai e tagata o le vasega ona faitau le Mataupu Faavae ma Feagaiga 112:12–26. Faatasi ma se tagata o le aiga po o se uo e mafaufau i ai—se tasi o loo tauivi ma lo latou faatuatua. O a upumoni i nei fuaiupu o le a faamamafa atu e tagata o le vasega e fesoasoani ai i lena tagata ia sili atu ona atoatoa le liua? Tuu atu i tagata o le vasega se taimi e mafaufau loloto ai i mea e mafai ona latou faia e faamalosia ai lo latou lava liua i le Alii.

aikona o punaoa faaopoopo

Punaoa Faaopoopo

O uiga auaumamā faa-Keriso o le lotomaualalo.

Na aoao mai Elder Quentin L. Cook:

“O le mea e leaga ai, i o tatou taimi e toetoe o vaega uma o faalapotopotoga, ua tatou vaaia ai le olaola o le taua o le tagata lava ia ma le faasausili ae ua faitioina le lotomaualalo ma le tali atu i le Atua. O le tele o faalapotopotoga ua leiloa o latou faavae ma e po foi malae pe aisea ua tatou i ai i lenei lalolagi. O le lotomaualalo moni, lea e taua mo le faataunuuina o le faamoemoega o le Alii mo i tatou, ua seasea vaaia.

“E taua le malamalama i le maoae o le lotomaualalo, amiotonu, uiga, ma le atamai o Keriso e pei ona faaalia i tusitusiga paia. E faavalevalea le manatu maualalo i le taua o le taumafai pea lava pea mo nei uiga auaumama faaKeriso ma uiga faaleatua i aso taitasi, aemaise lava o le lotomaualalo. …

“I le aso 23 o Iulai, 1837 sa fono ai le Perofeta o Iosefa Samita ma Elder Thomas B. Marsh, le Peresitene o le Korama a le Toasefululua. Na manino le le fiafia o Elder Marsh ina ua valaauina e le Perofeta uso e toalua o lana korama e o i Egelani e aunoa ma le logoina o ia. Ina ua feiloai Iosefa ma Elder Marsh, sa faataatia ese soo se lagona tiga, ma sa maua e le Perofeta se faaaliga ofoofogia. Ua avea nei ma vaega e 112 o le Mataupu Faavae ma Feagaiga. O loo aumai ai se taitaiga maoae mai le lagi e tusa ai ma le lotomaualalo ma le galuega faafaifeautalai. Fuaiupu 10 ua faitauina, ‘Ia e lotomaualalo; ma o le a taitai oe e le Alii le Atua i le lima, ma tuu mai ia te oe tali i au tatalo’ [Mataupu Faavae ma Feagaiga 112:10; faaopoopo le faamamafa]” (“O le Faavavau i Aso TaitasI,” Ensign po o le Liahona, Nov. 2017, 51–52).

Faaleleia o Lo Tatou Aoao Atu

Taulai atu i tagata. “O le ala e te taulimaina ai tagata e tutusa le taua ma mea e te aoaoina ai i latou. O nisi taimi o lo tatou popole i le tuuina atu o se lesona e mafai ona taofia i tatou mai le faailoa atu o lo tatou alolofa mo i latou tatou te aoaoina. … Mafaufau pe mafai faapefea ona e taulai atu i mea e silisili ona taua” (Aoao Atu i le Ala a le Alii,6).