Navu

Navu le Matagofie, saunia e Larry Winborg

25–31 Oketopa

Mataupu Faavae ma Feagaiga 124

“O Se Fale i Lo’u Igoa”

Ina ia mafai ona aumai e le Agaga mataupu faavae i lo tatou manatua ao tatou aoao atu ( tagai i le Ioane 14:26), e tatau ona tatou suesue muamua ma le filiga ma mafaufau loloto i na mataupu faavae.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Mafaufau e valaaulia tagata o le vasega e faasoa se mea na latou maua i le Mataupu Faavae ma Feagaiga 124 ua mafua ai ona latou mafaufau i se mataupu faavae o le talalelei i se auala fou. O le a le mea na latou faitauina—faaletagata lava ia po o le faaleaiga—ua suia ai le auala latou te lagona, mafaufau, ma ola ai?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 124:15, 20

E fiafia le Alii i le amio sa’o.

• I le vaega 124, na viia e le Alii Ailama Samita ma George Miller mo lo laua amio sa’o. Ina ia fesoasoani i tagata o le vasega e suesue ma le loloto atili lenei amio, e te ono valaaulia i latou e faitau le Mataupu Faavae ma Feagaiga 124:15, 20 ma mafaufau i mea ua latou aoaoina e uiga i le amio sa’o mai nei fuaiupu. O le a se isi mea tatou te aoao mai mau ua tusia i lalo o le “Amio Sa’o” i le Taiala i Tusitusiga Paia (scriptures.ChurchofJesusChrist.org) po o le savali a Elder Richard J. Maynes o le “Mauaina o le Faatuatuaga a le Alii ma Lou Aiga”? (Ensign po o le Liahona, Nov. 2017, 75–77). Atonu e mafai e tagata o le vasega ona fefaasoaai ni faataitaiga o tagata latou te iloa o loo i ai le amio sa’o. Aisea ua avea ai le amio sa’o o se uiga faatauaina tele?

Mataupu Faavae ma Feagaiga 124:22–24, 60–61

E finagalo le Alii ina ia tatou faafeiloaiina ma taliaina isi.

• E ono aoao e tagata o lau vasega se mea mai le faamatalaina e le Alii o le Fale i Navu e mafai ai ona fesoasoani ia te i latou i a latou fegalegaleaiga ma tagata e le o ni tagata o le Au Paia o Aso e Gata Ai pe ua se ese atu mai le Ekalesia. E te ono tusia se fale i luga o le laupapa ma valaaulia tagata o le vasega e sue le Mataupu Faavae ma Feagaiga 124:22–24, 60–61 mo upu na faaaogaina e le Alii e faamatala ai faamoemoega o le Fale i Navu. Ona mafai lea ona latou tusia ia upu faataamilo i le fale. E ono mafai faapefea ona faaaoga nei faaupuga i le Ekalesia a Iesu Keriso? O le a se mea e mafai ona tatou faia e fausia ai lenei lava aganuu faafeiloai i a tatou uarota ma o tatou fale?

Mataupu Faavae ma Feagaiga 124:25–45, 55

Ua poloaiina i tatou e le Alii e fauina malumalu ina ia mafai ai ona tatou mauaina sauniga paia.

• Atonu e mafai e tagata o le vasega ona mafaufau faapea ua latou nonofo i Navu i le 1841 ma o loo galulue i le Malumalu i Navu ae fesili atu se uo, “Aisea tatou te faaauau ai ona fausia nei malumalu?” O le a se tatou tala e fai atu i lea uo? E mafai e tagata o le vasega ona vaai mo ni manatu i le Mataupu Faavae ma Feagaiga 124:28–30, 37–42, 55. Afai e le mailoa e nisi tagata o le vasega ia sauniga o loo taua i nei fuaiupu, mafaufau e faamatala atu faamoemoega ma faamanuiaga o nei sauniga. Tagai i le temples.ChurchofJesusChrist.org mo le taiala e uiga i mea e mafai ma talafeagai ona talanoaina i fafo o le malumalu ma mo ata o malumalu e mafai ona e faaali atu i le vasega.

  Iosefa Samita faatasi ma alii o loo fauina le Malumalu o Navu

  O Iosefa Samita i le Malumalu o Navu, saunia e Gary E. Smith

Mataupu Faavae ma Feagaiga 124:45–55

O le a faamanuiaina e le Alii i latou o e tauivi e usitaia Ana poloaiga.

• Na poloaiina le Au Paia e fausia se malumalu i le Itumalo o Siakisone ae na “taofia e o latou fili” (Mataupu Faavae ma Feagaiga 124:51.). I fuaiupu 49–55, lea na faamatala ai e le Alii lenei tulaga, e ono i ai se savali faamautinoa mo tagata o loo mananao e usitai i poloaiga a le Atua ae o loo taofia mai le faia ona o aiga po o nisi tulaga. E te ono faitauina nei fuaiupu faatasi ma tagata o le vasega ma fesili atu ia i latou e mafaufau i tulaga e ono le mafai ai e tagata ona faataunuuina o latou manaoga amiotonu ona o tulaga e le mafai ona latou pulea. O le a se fautuaga tatou te maua i nei fuaiupu e mafai ai ona fesoasoani i se tasi o loo i ai i se tulaga faapea? O le a se mea o aoao mai e nei fuaiupu e uiga i le usiusitai?

Mataupu Faavae ma Feagaiga 124:91–92

E mafai ona taiala i tatou e le Alii e ala mai i o tatou faamanuiaga faapeteriaka.

• Mata e aoga i tagata o lau vasega le talanoa e uiga i peteriaka ma faamanuiaga faapeteriaka? E mafai ona e amata e ala i le valaaulia o tagata o le vasega e faitau le Mataupu Faavae ma Feagaiga 124:91–92, ma vaai mo le mea na valaauina Ailama Samita e fai. Ona mafai lea ona e tusia i luga o le laupapa O le a ma le Aisea ma valaaulia tagata o le vasega e faitau “Faamanuiaga Faapeteriaka” (Faamaoni i le Faatuatua, 111–13) e maua ai po o a faamanuiaga faapeteriaka ma pe aisea e taua ai. E mafai faapefea ona saunia se tagata e mauaina se faamanuiaga faapeteriaka? Mafaufau e valaaulia ni nai tagata ua maua a latou faamanuiaga faapeteriaka e faasoa mai pe aisea latou te faafetai ai mo a latou faamanuiaga faapeteriaka. (Faamanatu atu ia i latou e aua nei faasoa maia ni mea e patino tele pe paia mai o latou faamanuiaga.) E mafai faapefea ona tatou faaali atu lo tatou faapelepeleina o a tatou faamanuiaga faapeteriaka?

Faaleleia o Lo Tatou Aoao Atu

Tatalo mo tagata o lau vasega. Tatalo e ala i igoa mo tagata e te aoaoina. E mafai ona e tatalo ia malamalama i o latou manaoga ma ia iloa le mea e aoao atu ina ia taulimaina ai na manaoga. Atonu e te talosaga atu foi i le Tama Faalelagi ia “saunia o latou loto” (Alema 16:16) ina ia mauaina upu moni o le a e aoaoina. (Tagai i le Aoao Atu i le Ala a le Faaola, 6.)