Malumalu o Katelani

Malumalu o Katelani, saunia e Al Rounds

30 Aokuso–5 Setema

Mataupu Faavae ma Feagaiga 94–97

“Mo le Faaolataga o Siona”

E mafai faapefea ona e fesoasoani sili atu i tagata o le vasega ia mananao e maua faamanuiaga ua folafolaina mai i le Mataupu Faavae ma Feagaiga 94–97?

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Atonu e mafai e tagata o le vasega ona faasoa mai se mea na latou mauaina i le Mataupu Faavae ma Feagaiga 94–97 ua uunaia ai i latou e o atu soo i le malumalu. Pe mafai foi ona latou faasoa mai nisi savali ua uunaia ai i latou ao latou faitauina nei vaega.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 95:8; 97:10–17

I totonu o le malumalu e faamanuiaina e le Atua Ona tagata.

• E mafai faapefea ona e faaaogaina upu moni o loo aoaoina mai i le Mataupu Faavae ma Feagaiga 95 ma le 97 e uunaia ai tagata o le vasega ina ia saili ma le filiga sili atu i faamanuiaga o le malumalu? O se tasi auala o le tuuina lea o se ata o le malumalu i le ogatotonu o le laupapa ma fesili i tagata o le vasega pe aisea ua latou manatu ai ua faatonuina e le Alii Ana Au Paia e fausia malumalu. E mafai e tagata o le vasega ona sueina ni nai tali i le Mataupu Faavae ma Feagaiga 95:8; 97:10–17 ma tusi mea latou te mauaina mai i luga o le laupapa e faataamilo i le ata o le malumalu. (E mafai ona latou mauaina tali faaopoopo i le “Why Latter-day Saints Build Temples” [temples.ChurchofJesusChrist.org].) O faapefea ona faataunuuina nei faamoemoega i o tatou olaga? E mafai faapefea ona e faia le malumalu o se vaega sili atu le taua o lou olaga?

• Ua saunia e le Ekalesia le tele o punaoa o loo aoao mai e uiga i malumalu. Mafaufau pe faapefea ona e faaaogaina nisi o i latou e faaanoa ai se talatalanoaga a le vasega e uiga i le Mataupu Faavae ma Feagaiga 95 ma le 97 ma uunaia ai tagata o le vasega ina ia saili ma le filiga sili atu faamanuiaga o le malumalu. Mo se faataitaiga, ao lei amataina le vasega e mafai ona e valaaulia ni nai tagata o le vasega e iloiloina punaoa o i le temples.ChurchofJesusChrist.org po o le Malumalu o le Ekalesia a Iesu Keriso o le Au Paia o Aso e Gata Ai (lomiga faapitoa o le Ensign po o le Liahona, Oke. 2010). Fai i nei tagata o le vasega ia o mai sauni e faasoa mai se mea na latou aoaoina e lagolago ai aoaoga i le vaega 95 ma le 97.

  Afai o loo e aoaoina le autalavou, e mafai ona e valaaulia i latou e faitau le “Avea le Malumalu o se Vaega o Lou Olaga” (i le Malumalu o le Ekalesia a Iesu Keriso o le Au Paia o Aso e Gata Ai, 77–78) ma faasoa mai pe faapefea ona latou faia ia avea le malumalu ma se mea e faamuamua i o latou olaga.

  O vitio “Two Apostles Lead a Virtual Tour of the Rome Italy Temple” ma le “Temples” (ChurchofJesusChrist.org) e mafai ona fesoasoani ia i latou o loo sauniuni e o atu i le malumalu.

  E mafai foi ona outou lagiina faatasi se viiga e faatatau i malumalu ma talanoaina mea o loo aoaoina mai ai (tagai i faasologa o autu i Viiga).

Mataupu Faavae ma Feagaiga 97:8–9

E mafai ona taliaina i tatou e le Alii.

• O le a se mea e mafai ona tatou aoao mai i le Mataupu Faavae ma Feagaiga 97:8 e faatatau i le uiga o le taliaina e le Alii. E faapefea ona ese mai lena mai auala tatou te sailia ai le taliaina o i tatou e le lalolagi i nisi taimi? O a faamanuiaga ua folafola mai i le fuaiupu 9 ia i latou ua taliaina e le Alii? E mafai foi e tagata o le vasega ona iloiloina le savali a Elder Erich W. Kopischke “O le Taliaina e le Alii” (Ensign po o le Liahona, Me 2013, 104–6) ma faasoa mai pe faapefea ona fesoasoani ia i latou e malamalama i nei fuaiupu. O le faaupuga i le “Punaoa Faaopoopo” o loo aofia ai le valaaulia a Elder Kopischke ina ia sailia le taliaina e le Alii i o tatou olaga.

Mataupu Faavae ma Feagaiga 97:18–28

O Siona o “e loto mama.”

• Ina ia fesoasoani i tagata o lau vasega ia manatunatu po o le a le Siona, e mafai ona e tusia i luga o le laupapa O le a Siona? Ma valaaulia i latou e sue tali i le Mataupu Faavae ma Feagaiga 97:19 ma le 21 (tagai foi i le Mose 7:18; Autu o le Talalelei, “Siona,” topics.ChurchofJesusChrist.org). ,E mafai foi ona fesoasoani le talanoaina o le ala e fesoasoani ai le Faaola ia i tatou ia avea ma e “loto mama.” O lea se mea ua tatou lagona ua uunaia ai i tatou e fai e fausia ai Siona i o tatou olaga? i a tatou uarota po o paranesi? i lo tatou nuu?

  Malumalu o Katelani

  O le fausiaina o le Malumalu o Katelani sa avea atili ai le Au Paia ma e “loto mama.”

• Na aoao mai le Alii e uiga ia Siona ina ua muai faatonuina le Au Paia e fausia se malumalu “mo le faaolataga o Siona” (tagai Mataupu Faavae ma Feagaiga 97:12, 18–28). Aisea e taua ai le malumalu o se vaega o le fausiaina o Siona? O faapefea ona faataunuuina folafolaga na faia e le Alii ia Siona i fuaiupu 18–28 i o tatou aso?

aikona o punaoa faaopoopo

Punaoa Faaopoopo

O Le Taliaina e le Alii

E faasino i le “mamanu faigofie” o loo aoaoina i le Mataupu Faavae ma Feagaiga 97:8., na aoao mai Elder Erich W. Kopischke:

“O le sailia ma le mauaina o le taliaina e le Alii, o le a taitai atu i le malamalama e faapea ua filifilia ma faamanuia i tatou e Ia. O le a tatou maua le talitonuga faateleina o le a Ia taitai i tatou ma taiala i tatou mo le lelei. O Lona alofa tunoa o le a iu ina manino i o tatou loto, i o tatou olaga, ma i totonu o o tatou aiga.

“Ma lo’u loto atoa, ou te valaaulia ai outou e saili le taliaina e le Alii ma olioli i Ana faamanuiaga folafolaina. Pe a tatou mulimuli i le mamanu faigofie ua fofola mai e le Alii, o le a iu ina tatou iloa ai ua taliaina i tatou e Ia, e tusa lava po o a o tatou tulaga tofi, tulaga, po o le atoatoa faaleolaga nei” (“O Le Taliaina e le Alii,” Ensign po o le Liahona, Me 2013, 106).

Faaleleia o Lo Tatou Aoao Atu

Saili e malamalama ia i latou e te aoaoina. O tagata taitoatasi e te aoaoina e iai ni aafiaga, manatu, ma ni taleni tulaga ese. Tatalo ia e iloa pe faapefea e sao a tagata taitoatasi ona avea ma se faamanuiaga i le vasega atoa. (Tagai Aoao Atu i le Ala a le Faaola,7.)