Ni Joseph Smith iti Nauvoo, 1840, ni Theodore Gorka

Nobiembre 8–14

Doktrina ken Katulagan 129–132

“No Makagun-odtayo iti Ania Man a Bendision manipud iti Dios, babaen iti Panagtulnog”

Idinto a napateg ti maaddaan iti plano iti panangisuro, napateg met ti agbalin a managresponde iti Espiritu ken iti kasapulan dagiti miembro ti klase. Ammuen manipud kadagiti miembro ti klase no ania dagiti prinsipio kadagiti benneg 129–32 ti napnuan kaipapanan kadakuada.

Isuratmo dagiti Impresionmo

Yawis ti Panagbibinninglay

Mabalin a nasursuron dagiti miembro ti klase dagiti banag manipud iti panagadalda kadagiti benneg 129–32 a mainaig iti nadumaduma a topiko iti ebanghelio. Tapno maikkan ida iti gundaway a mangibinglay iti no ania ti nasursuroda, mabalinmo nga isurat ti sumagmamano kadagita a topiko iti pisarra, kas kadagiti anghel, pannakaitan-ok, panagtulnog, ti kasasaad ti Dios ken agnanayon a kallaysa (mabalinmo pay nga isurat ti dadduma pay iti pisarra tapno ilawlawag dagiti nayon pay a topiko). Mabalin a mangala dagiti miembro ti klase iti sumagmamano a minuto a mangsapul iti bersikulo kadagitoy a benneg a mainaig iti maysa kadagiti topiko ket isurat ti reperensia iti pisarra. Kalpasanna mabalinyo a basaen dagiti bersikulo kas klase ket pagsasaritaan no ania ti isuro ti tunggal maysa maipapan iti dayta a topiko.

Isuro ti Doktrina

Doktrina ken Katulagan 130:2, 18–23; 131:1–4; 132:20–25

Daytoy a biag ti panawen a panagsaganatayo para iti pannakaitan-ok.

• Adu dagiti banag a ditayo ammo maipapan iti pannakaitan-ok wenno ti biag iti celestial a pagarian—adu ditoy ti mabalin a labes ti agdama a kabaelantayo a maawatan. Ngem impalgak ti Dios ti sumagmamano a napapateg a pamugtuan, ken adu kadagitoy ti masarakan iti Doktrina ken Katulagan 130–32. Mabalin nga adalen dagiti miembro ti klase ti maysa wenno ad-adu pay kadagiti reperensia a nailista iti ngato ket ibinglay dagiti ania man a nalawag a pannakaammo ken pannakaawat a masarakanda maipapan iti pannakaitan-ok wenno ti celestial a pagarian. Kasano a ti panangammo itoy nga impormasion maipapan iti agnanayon a biag ket magbendision iti biagtayo ita?

Doktrina ken Katulagan 130:20–21; 132:5

Sumangbay dagiti bendision manipud iti panagtulnog iti Dios.

• Doktrina ken Katulagan 130:20–21 ken 132:5 agpada a prinsipio ti isuroda. Allukoyem dagiti miembro ti klase a mangbasa iti agpada a mensahe ken mangisao, iti bukodda a balikas, no ania dayta a prinsipio. Kasano a naipakita daytoy a prinsipio iti biagtayo? Kasano a masarakantayo iti namnama ken pammatalged ken ni Cristo no managtungpaltayo ngem saan a dumteng a dagus dagiti bendision a namnamaentayo? Para iti ad-adu pay maipapan iti daytoy a topiko, mabalinyo nga aggigiddan a mangrebyu ti mensahe ni Elder Dale G. Renlund “Abound with Blessings” (Ensign wenno Liahona, Mayo 2019, 70–73).

Doktrina ken Katulagan 131:1–4; 132:3–25

Inaramid ti Nailangitan nga Ama nga agbalin nga agnanayon dagiti pamilia.

• Ania ti mabalin nga isaotayo iti maysa a gayyem nga agsaludsod iti, “Apay a napateg unay ti kallaysa ken pamilia iti simbaanyo?” Mabalin a panunoten dagiti miembro ti klase maipapan no kasano a sungbatanda dayta a saludsod no basaenda ti Doktrina ken Katulagan 131:1–4; 132:3–25; wenno dagiti balikas ni Elder Dieter F. Uchtdorf iti “Dagiti Nainayon a Resources.” Kasano nga apektuan dagitoy a kinapudno ti wagas a panagbiagtayo?

  

  Mabalin a maaramid nga agnanayon dagiti relasion ti pamilia babaen kadagiti ordinansa iti templo.

Doktrina ken Katulagan 132:1–2, 29–40

Maaw-awat laeng iti Dios ti panagasawa iti ad-adu ngem maysa no ibilinna daytoy.

• No adda dagiti saludsod dagiti miembro ti klase maipapan iti panagasawa iti ad-adu ngem maysa, tulongam ida a mangkita nga addaan met kadagiti kasta a saludsod ni Joseph Smith ken dagiti dadduma pay a nagkauna a Santo. Allukoyem ida a mangsapul iti saludsod a dinamag ni Joseph iti Apo iti Doktrina ken Katulagan 132:1 ken ti sungbat nga inawatna kadagiti bersikulo 29–40 (kitaen met iti Jacob 2:27, 30). Tapno matulongan a masursuruan dagiti miembro ti klase maipapan kadagiti wagas a pakasarakanda kadagiti sungbat dagiti saludsodda iti ebanghelio, mabalin a makatulong nga aggigiddan nga irebyu ti “Answering Gospel Questions” iti topics.ChurchofJesusChrist.org. Nalabit a mabalin nga ibinglay dagiti miembro ti klase no kasano a nasarakanda dagiti sungbat dagiti saludsodda iti ebanghelio ken no kasano a nagtalinaedda a napudno nupay nagtalinaed a di nasungbatan ti sumagmamano a saludsodda.

Dagiti Nainayon a Resources

Ti pamilia ket “ti urnos ti langit.”

Insuro ni Presidente Dieter F. Uchtdorf:

“Agyamanak ta kamengak ti maysa a simbaan a mangipatpateg iti kallaysa ken pamilia. Maam-ammo dagiti miembro ti Ti Simbaan ni Jesucristo dagiti Santo iti Ud-udina nga Aldaw iti intero a sangalubongan gapu iti kaadda iti sumagmamano kadagiti kapintasan a kallaysa ken pamilia a masarakanyo. Mamatiak a daytoy ket, iti sangkapaset, gapu iti napateg a kinapudno nga insubli ni Joseph Smith a naisangrat nga agbalin nga agnanayon dagiti kallaysa ken pamilia. Saan laeng a naisangrat dagiti pamilia a mangaramid kadagiti banag a nalaklaka wenno nanamnam-ay ditoy daga ken maibellengen no mapantayo iti langit. Ketdi, dagitoy ti urnos ti langit. Dagitoy ti mangyallingag iti ulidan a celestial ken iti panangtulad ti agnanayon a pamilia ti Dios.

“Ngem saan a mapasamak ti natibker a relasion iti panagasawa ken pamilia gapu laeng ta miembrotayo iti Simbaan. Agkasapulanda iti agtultuloy, naigagara nga aramid. Nasken a mangparegta kadatayo ti doktrina dagiti agnanayon a pamilia a mangibubos iti amin a kabaelantayo iti panangispal ken panangpapintas iti panagdennatayo kas agassawa ken dagiti pamiliatayo” (“In Praise of Those Who Save,” Ensign wenno Liahona, Mayo 2016, 77).

Panangpadur-as iti Panangisurotayo

Mangparnuay iti natalged nga aglawlaw. “Allukoyem [dagiti miembro ti klase] a tulongandaka a mangipasdek iti silulukat, naayat, ken nadayaw nga aglawlaw tapno marikna ti tunggal maysa a natalgedda a mangibinglay kadagiti padas, saludsod, ken pammaneknekda” (Panangisuro iti Wagas ti Mangisalakan,15).