lima a masirib a babbalasang

Umay ti Nobio, ni Elizabeth Gibbons

Nobiembre 15–21

Doktrina ken Katulagan 133–134

“Agsaganakayo iti Yaay ti Nobio”

Ania dagiti kinapudno iti Doktrina ken Katulagan 133–34 ti mariknam a kangrunaan a mangtulongto iti klasem? Nainkararagan nga ibilangmo dagiti kasapulanda bayat ti panangadalmo iti daytoy a lawas.

Isuratmo dagiti Impresionmo

icon iti panagbibinninglay

Yawis ti Panagbibinninglay

Mabalinmo nga isurat ti balikas a denggen iti pisarra ken awisem dagiti miembro ti klase a mangisurat iti daytoy iti abay dagiti bersikulo manipud iti Doktrina ken Katulagan 133–34 a patienda a kasapulantayo a denggen iti aldawtayo. Idawatmo kadakuada a mangibinglay kadagiti kapanunotanda maipapan kadagita a bersikulo. (Tulongam dagiti miembro ti klase nga agpokus kadagiti prinsipio a mainaig iti doktrina imbes a kadagiti pannirigan a mainaig iti politika.)

icon iti panangisuro

Isuro ti Doktrina

Doktrina ken Katulagan 133:1–19; 37–39

Kayat ti Apo nga agsaganatayo para iti Maikadua a Yaayna.

• Kasano a matulongam a maawatan dagiti miembro ti pamiliam no apay a napateg a pasantuentayo dagiti bagbagitayo tapno matulongan dagiti dadduma nga agsagana para iti Maikadua a Yaay ti Mangisalakan? Mabalinmo nga awisen dagiti miembro ti klase a mangrebyu iti Doktrina ken Katulagan 133:1–19, 37–39 ket agaramid iti dua a listaan: maysa ti listaan ti balakad ti Apo maipapan no kasano a pasantuentayo dagiti bagbagitayo ket ti sabali a listaan ti balakad maipapan no kasano nga isagana ti lubong para iti panagsubli ti Mangisalakan. Ania ti kayat a sawen daytoy, iti naespirituan a kaipapanan, “rummuarkayo iti Babilonia” (bersikulo 5) ket “agkamang iti Zion”? (bersikulo 12). Para iti ad-adu pay maipapan iti no ania ti kaipapanan ti pannakapasanto, kitaen iti “Pannakapasanto” iti Pangiwanwan iti Nasantuan a Kasuratan (scriptures.ChurchofJesusChrist.org).

Doktrina ken Katulagan 133:19–53

Agbalinto a narag-o para kadagiti nalinteg ti Maikadua a Yaay.

• Iti panagadalda iti nasantuan a kasuratan iti pagtaengan, mabalin a nasarakanen dagiti miembro ti klasem dagiti napapateg a binatog iti daytoy a benneg a mangigapu kadakuada a mangpadpadaan iti Maikadua a Yaay ti Mangisalakan. Awisem ida a mangibinglay kadagitoy a binatog. Mabalinmo pay nga awisen ti klase a mangsukisok kadagiti bersikulo 19–53 iti kada paris, a sapsapulen dagiti gapu iti panangpaspasungad iti Maikadua a Yaay ni Jesucristo. Bayat ti panangibinglay dagiti miembro ti klase iti no ania ti nasarakanda, allukoyem ida a mangisarita maipapan no kasano a ti Mangisalakan “sinubbotna ida, ken [inimetna] ida, ken binitbitna ida” (bersikulo 53). Mabalin a daytoy ti napintas a gundaway nga aggigiddan a kumanta iti himno maipapan iti pangsubbot a bileg ti Mangisalakan, kas iti “Savior, Redeemer of My Soul” (Hymns, no. 112). Ania dagiti dadduma pay a “kankanta ti agnanayon a rag-o” (bersikulo 33) a mangtulong kadatayo a mangrikna iti “manangipateg a kinaimbag ti Apo[tayo]”? (bersikulo 52).

Doktrina ken Katulagan 134

“Impasdek ti Dios dagiti gobierno para iti pagimbagan ti tao.”

• Tapno matulongan dagiti miembro ti klase nga agsursuro manipud iti Doktrina ken Katulagan 134, mabalinmo ti mangikabil kadagiti saludsod kas kadagitoy iti maysa a pagkargaan wenno iti pisarra: Kasano ti kayat ti Dios a panangiranud dagiti gobierno kadagiti annakna? Ania ti nasken nga aramidentayo no maisuppiat dagiti naindagaan a linteg kadagiti nailangitan a linteg? Ania dagiti pagrebbengan ken responsibilidadtayo kas makipagili? Awisem dagiti miembro ti klase a mangpili iti maysa a saludsod ket usaren ti benneg 134 a mangparnuay iti sungbat. Allukoyen dagiti miembro ti klase a mangliklik iti pannakisarita maipapan kadagiti naipangruna nga isyu wenno pannirigan a mainaig iti politika.

• Ti wayawaya nga “agrukbab no kasano, sadino, wenno ania pay ti [mabalintayo]” (Pagannurotan ti Pammati 1:11) ket maysa a pribilehio a kayat ti Apo nga adda iti tunggal maysa. No mariknam a pagimbagan ti klasem a pagsasaritaan maipapan iti prinsipio ti wayawaya iti relihion, ibilang ti panangbasayo nga aggigiddan iti Doktrina ken Katulagan 134:4, 7, 9. Ania ti isuro kadatayo dagitoy a bersikulo maipapan iti akem ti gobierno iti panangsaluad iti wayawaya iti relihion? Kasano a maitandudotayo ti wayawaya iti relihion para iti dadduma ken iti bagbagitayo? Mabalin a masarakan dagiti miembro ti klase dagiti nalawag a pannakaammo ken pannakaawat [insights] a mangtulong a mangsungbat iti daytoy a saludsod iti “Dagiti Nainayon a Resources.”

dagiti nainayon a resources icon

Dagiti Nainayon a Resources

Dagiti panuli a bato ti wayawaya iti relihion.

Insuro ni Elder Robert D. Hales:

“Adda uppat a panuli a bato ti wayawaya iti relihion a nasken a pagpannurayantayo ken pagsaluadan kas Santo iti Ud-udina nga Aldaw.

“Umuna ti wayawaya a mamati. Nasken nga awan koma ti madillaw, maidadanes, wenno madarup dagiti indibidual, wenno gobierno no ania iti patienna maipapan iti Dios. …

“Ti maikadua a panuli a bato ti wayawaya iti relihion ket ti panagwaywayas a mangibinglay iti pammatitayo ken kannawidantayo kadagiti dadduma. … Kas nagannak, full-time missionary, ken member missionary, agpannuraytayo iti wayawaya iti relihion tapno mangisuro iti doktrina ti Apo kadagiti pamiliatayo ken iti intero a lubong.

“Ti maikatlo a panuli a bato ti wayawaya iti relihion ket ti panagwaywayas a mangbukel iti organisasion iti relihion, simbaan, tapno agrukbab a sitatalna kadua dagiti dadduma. Ipakdaar ti maikasangapulo-ket-maysa a pagannurotan ti pammati, ‘Itandudomi ti karbengan nga agrukbab iti Mannakabalin a Dios babaen ti panangibagnos ti konsensiami, ken ipalugodmi iti amin a tao ti umasping a karbengan, bay-anmi nga agrukbabda iti wagas no kasano, sadino, ken no ania pay ti mabalinda.’ …

“Ti maikapat a panuli a bato ti wayawaya iti relihion ket ti panagwaywayas nga agbiag iti pammatitayo—nawaya a pannangaramat iti pammati saan laeng iti pagtaengan ken iti kapilia no di pay ketdi kadagiti pay lugar iti kaaduan” (“Preserving Agency, Protecting Religious Freedom,” Ensign wenno Liahona, Mayo 2015, 112).

Panangpadur-as iti Panangisurotayo

Isuro ti “apay.” No maawatan [dagiti miembro ti klase] ti agnanayon a plano ti Nailangitan nga Ama para iti pagragsakan dagiti annakna, dagiti gapu para kadagiti pagbatayan ti ebanghelio ken bilin ket agbalin a nalawlawag ken ad-adda a maguyugoyda nga agtulnog” (Panangisuro iti Wagas ti Mangisalakan,20).