Iosefa Samita o loo aoao atu i Navu

Iosefa Samita i Navu, 1840, saunia e Theodore Gorka

8–14 Novema.

Mataupu Faavae ma Feagaiga 129–132

“A Tatou Maua se Faamanuiaga mai le Atua, e Maua i le Usiusitai”

Ao taua le i ai o se fuafuaga e aoao atu ai, e taua foi le faalogo atu i le Agaga ma manaoga o tagata o le vasega. Sue mai tagata o le vasega po o a mataupu faavae i vaega 129—32 na taua ia i latou.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Atonu na aoaoina e tagata o le vasega ni mea mai a latou suesuega o vaega 129–32 e fesootai i ni autu eseese o le talalelei. Ina ia tuuina atu ia i latou le avanoa e faasoa mai ai mea na latou aoaoina, e mafai ona e tusia i le laupapa ni nai autu, e pei o agelu, faaeaga, usiusitai, le natura o le Atua, ma le faaipoipoga e faavavau (e mafai foi ona e tusia isi i le laupapa mo nisi autu). E mafai e tagata o le vasega ona faaalu ni nai minute e sue ai se fuaiupu i nei vaega e fesootai i se tasi o autu ma tusi mau fesootai i le laupapa. Ona mafai lea ona e faitauina fuaiupu o se vasega ma talanoaina mea ua aoao mai e fuaiupu taitasi e uiga i lena autu.

aikona o le aoao atu

Aoao Atu le Aoaoga Faavae

Mataupu Faavae ma Feagaiga 130:2, 18–23; 131:1–4; 132:20–25

O le olaga lenei o le taimi lea e saunia ai i tatou mo le faaeaga.

• E tele mea tatou te le iloa e uiga i le faaeaga po o le olaga i le malo selesitila—o le tele lava atonu e le oo i ai lo tatou mafaia ona malamalama i ai. Ae ua faaali mai e le Atua ni nai faaiteite taua, ma o le tele lava e maua i le Mataupu Faavae ma Feagaiga 130–32. E mafai e tagata o le vasega ona suesue se tasi po o le sili atu o mau fesootai ua lisi i luga ma faasoa mai soo se manatu latou te maua e uiga i le faaeaga po o le malo selesitila. E mafai faapefea e le iloaina o lenei faamatalaga e uiga i le olaga e faavavau ona faamanuiaina ai o tatou olaga nei?

Mataupu Faavae ma Feagaiga 130:20–21; 132:5

E oo mai faamanuiaga i le usiusitai i le Atua.

• Ua aoao mai e le Mataupu Faavae ma Feagaiga 130:20–21 ma le 132:5 lea lava mataupu faavae. Uunaia tagata o le vasega e faitau fuaitau uma e lua ma tau mai, ia latou lava upu, po o le a lena mataupu faavae. Ua faapefea ona faaalia lenei mataupu faavae i o tatou olaga? E mafai faapefea ona tatou maua le faamoemoe ma le mautinoa ia Keriso pe a tatou usiusitai ae o faamanuiaga e le o’o mai nei lava e pei ona tatou faamoemoeina? Mo nisi vaega i lenei mataupu, e mafai ona e iloiloina faatasi manatu mai le savali a Elder Dale G. Renlund “E Tele Mea e Manuia Ai” (Ensign po o le Liahona, Me 2019, 70–73).

Mataupu Faavae ma Feagaiga 131:1–4; 132:3–25

Na faia e le Tama Faalelagi ia aiga ia mafai ona faavavau.

• O le a se tatou tala e ono fai atu i se uo e fesili mai, “Aisea e taua tele ai faaipoipoga ma aiga i lau lotu?” E mafai ona mafaufau tagata o le vasega i le ala latou te tali atu ai i lena fesili ao latou faitauina le Mataupu Faavae ma Feagaiga 131:1–4; 132:3–25; po o upu a Elder Dieter F. Uchtdorf i le “Punaoa Faaopoopo.” E faapefea e nei upumoni ona aafia ai le ala tatou te ola ai?

  o se alii ma se tamaitai i fafo o le Malumalu o Accra Kana

  E mafai ona faavavau sootaga faaleaiga e ala atu i sauniga o le malumalu.

Mataupu Faavae ma Feagaiga 138:1–2, 29–40

O le faaipoipoga faaautaunonofo e faatoa taliaina e le Atua pe a Ia poloaiina.

• Afai e i ai ni fesili a tagata o le vasega e uiga i faaipoipoga faaautaunonofo, fesoasoani ia i latou ia vaai na i ai foi fesili a Iosefa Samita ma isi uluai Au Paia. Uunaia i latou e sue fesili na fai atu e Iosefa i le Alii i le Mataupu Faavae ma Feagaiga 132:1 ma le tali na ia maua i fuaiupu 29–40 (tagai foi Iakopo 2:27, 30). Ina ia fesoasoani i tagata o le vasega e aoao i auala latou te maua ai tali ia latou fesili o le talalelei, e ono fesoasoani le iloilo faatasi o le“Answering Gospel Questions” i le topics.ChurchofJesusChrist.org. Atonu e mafai e tagata o le vasega ona faasoa mai le ala na latou sailia ai tali i fesili o le talalelei ma le ala na latou tumau ai i le faamaoni ina ua le taliina nisi o a latou fesili.

aikona o punaoa faaopoopo

Punaoa Faaopoopo

O le aiga o “le faatulagaga a le lagi.”

Na aoao mai Peresitene Dieter F. Uchtdorf:

“Ou te faafetai ua ou auai i se ekalesia e faatauaina le faaipoipoga ma le aiga. Ua lauiloa tagata o Le Ekalesia a Iesu Keriso o le Au Paia o Aso e Gata Ai i le lalolagi atoa mo le i ai o nisi o ulugalii ma aiga sili ona lelei e mafai ona e mauaina. I se vaega, ou te talitonu ai ua mafua lenei mea ona o upumoni taua na toefuatai mai e Iosefa Samita e faapea o faaipoipoga ma aiga e tatau ona faavavau. E le o faamoemoeina aiga ina ia faia na o ni mea ia sologa lelei atili iinei i le lalolagi ona lafoai ese lea pe a tatou oo atu i le lagi. Ae, o na mea o le faatulagaga a le lagi. O le faatusa lena o se mamanu faaselesitila ma se faataitaiga o le aiga e faavavau o le Atua.

“Ae o faaipoipoga ma sootaga malolosi faaleaiga e le tupu fua ona o i tatou o tagata o le Ekalesia. E manaomia ai se galuega faifai pea ma faamoemoeina. O le aoaoga faavae o aiga e faavavau e tatau ona musuia ai i tatou ia tuuto atu a tatou taumafaiga aupito sili ona lelei e laveai ma faamauoaina a tatou faaipoipoga ma aiga. (“I le Viia ai o i Latou o e Laveai,” Ensign po o le Liahona, Me 2016, 77).

Faaleleia o Lo Tatou Aoao Atu

Fatu se siosiomaga saogalemu. “Faamalosiau i tagata o le vasega e fesoasoani ia te oe e fausia se siosiomaga faamaoni, alofagia, ma faaaloalogia ina ia lagona e tagata uma le saogalemu e faasoa o latou aafiaga, fesili, ma molimau” (Aoao Atu i le Ala a le Faaola,15).