fafo o le Falepuipui o Karefasi

Falepuipui o Karefasi

22–28 Novema

Mataupu Faavae ma Feagaiga 135–136

‘Ua Faamau Faailogaina Lana Misiona ma Lana Galuega i Lona Lava Toto”

Ao e faitauina vaega 135–136, e mafai e le Agaga Paia ona tuuina atu ia oe ni manatu atonu e fesoasoani i tagata o lau vasega. O manatu i lenei otootoga e mafai foi ona uunaia ni manatu e mafai ona e faaaogaina ao e aoao atu.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

O se tasi nei o ala e valaaulia ai tagata o le vasega e faasoa mai o latou manatu e uiga i vaega 135–36. Valaaulia i latou e mafaufau ua mafai ona latou talanoa i se tagata o le Ekalesia mai le 1844, se tasi ua faavauvau i le maliu o Iosefa Samita ma ua popole i le mea o le a tupu i le Ekalesia. O a mea e mafai ona tatou faasoa mai nei vaega e mafai ona fesoasoani i lenei tagata?

aikona o le aoao atu

Aoao Atu le Aoaoga Faavae

Mataupu Faavae ma Feagaiga135; 136:37–39

Na faamauina e Iosefa ma Ailama Samita a la molimau i o la toto.

• Na faapefea e osigataulaga a Iosefa ma Ailama Samita ona “faamauina“ ai a la molimau? Atonu e mafai e tagata o le vasega ona mafaufau loloto i lenei fesili ao latou iloiloina le Mataupu Faavae ma Feagaiga 135; 136:37–39. Ona mafai lea ona latou faasoa mai soo se manatu na latou maua. E mafai foi ona latou faasoa mai o latou lagona e uiga i le naunau o Iosefa ma Ailama e tuuina atu o la ola mo le upumoni. Atonu e le fesiligia i tatou e feoti mo le upumoni, e mafai faapefea ona avea o tatou olaga e pei o se “faamau” mo a tatou molimau?

Mataupu Faavae ma Feagaiga 135:3

E tele atu mea na faia e Iosefa Samita vagana ai lava Iesu Keriso mo le faaolataga o tagata i lenei lalolagi.

• E mafai faapefea ona e fesoasoani i tagata o le vasega ia malamalama i mea ua faia e Iosefa Samita mo lo latou faaolataga? E mafai ona e tusia i le laupapa Ona o mea na faaalia e le Alii e ala mai ia Iosefa Samita, ou te … ona valaaulia lea o tagata o le vasega e mafaufau i ala e faauma ai lenei fuaiupu. E mafai ona latou amata i le suesueina o le Mataupu Faavae ma Feagaiga 135:3 mo mea na faia e Iosefa Samita e fesoasoani ai ia i tatou ia maua le faaolataga. Mafaufau e valaaulia tagata o le vasega e faasoa mai o latou lagona e uiga ia Iosefa Samita ma mea na faaali mai e le Alii e ala mai ia te ia.

• O se isi ala e fesoasoani ai i tagata o le vasega e mafaufau e uiga i le misiona a Iosefa Samita o le valaaulia lea o i latou e tusi se talaaga puupuu po o ni sa’afi’afiga mo ia. Atonu e te manao e talanoaina mea taua na tutupu pe na faataunuuina mai lona olaga e mafai ona latou faaaofia ai. O a mea ua latou maua i le Mataupu Faavae ma Feagaiga 135 e mafai ona latou ta’ua? O le a se mea e mafai ona latou ta’ua i la latou sa’afi’afiga e fesoasoani e faamalosia ai lo latou faatuatua i le misiona mamana a Iosefa Samita?

• E tele upumoni e uiga ia Iesu Keriso ma Lana Togiola na faaalia e ala mai ia Iosefa Samita—upumoni e faatatau i le faaolataga o alii ma tamaitai uma lava. Ina ia fesoasoani i tagata o le vasega e iloa nei saofaga, e mafai ona e faaalia se ata o Iesu Keriso ma fai atu i ni nai tagata o le vasega e faasoa mai se fuaiupu e uiga ia Iesu Keriso mai tusitusiga paia na faaalia e ala mai ia Iosefa Samita: le Tusi a Mamona, Mataupu Faavae ma Feagaiga, ma le Penina Tautele. E mafai faapefea e nei tusitusiga paia ona fesoasoani ia i tatou e malamalama ai ma faalatalata atili i le Faaola? E faapefea e upumoni i nei fuaiupu ona saofagā i lo tatou faaolataga?

Mataupu Faavae ma Feagaiga 136

E mafai ona tatou faataunuuina le finagalo o le Alii ao tatou mulimuli i Ana fautuaga.

• Otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga ua fautuaina ai tagata o le vasega e vaai mo fautuaga i le Mataupu Faavae ma Feagaiga 136 e mafai ona fesoasoani ia i latou ia suia se tofotofoga i se aafiaga faaleagaga. E mafai ona e fai i tagata o le vasega e faasoa mai se fautuaga latou te maua. E mafai ona e fai ia i latou e suesue lenei vaega ma vaavaai mo fautuaga e mafai ona fesoasoani ia i tatou e faataunuu ai le finagalo o le Alii i o tatou aso, e pei lava ona fesoasoani i le Au Paia i a latou “malaga i Sisifo”(fuaiupu1).

  Uinita Kuata

  Uinita Kuata, saunia e Greg Olsen

• Atonu e malie mo lau vasega le fatuina o se pepa lapoa e pei o na e maua i mekasini a le Ekalesia e uiga i se tasi o fuaiupu i le vaega 136. I le galulue ai i ni paga pe taitoatasi, e mafai e tagata o le vasega ona amata i le suesueina o fuaiupu mo se upumoni e tulaga ese ia i latou. Ona mafai lea ona latou fatuina se pepa lapoa e faaalia ai lenei upumoni, na aoaoina i le 1847, e mafai ona fesoasoani pea ia i tatou i le asō.

aikona o punaoa faaopoopo

Punaoa Faaopoopo

Musika e Fesootai

O le usuina o viiga nei po o le matamata i vitio e mafai ona valaaulia le Agaga Paia pe uunaia ai se talanoaga i le galuega a le Perofeta o Iosefa Samita ma osigataulaga a le Au Paia na mulimuli pea ia te ia.

“Se Tagata Mativa Faanoanoa” (Viiga, nu. 16). Ao i ai i le Falepuipui o Karefasi, na fai atu Iosefa Samita ia Ioane Teila e usu lenei viiga.

“Viia Le na Fetaia’i ma Ieova,”” (Viiga, nu. 15; vitio, www.thetabernaclechoir.org/videos/praise-to-the-man-mormon-tabernacle-choir). O upu i lenei viiga na tusia o se faamamaluga ia Iosefa Samita.

“O Mai, Outou le Au Paia” (Viiga, nu. 17; vitio, www.thetabernaclechoir.org/videos/come-come-ye-saints-mormon-tabernacle-choir).

“Faatuatua i Laa Taitasi” (vitio, www.thetabernaclechoir.org/videos/faith-in-every-footstep).

Faaleleia o Lo Tatou Aoao Atu

Molimau atu i le aoaoga faavae moni E mafai ona e tuuina lau molimau i upumoni faaleaoaoga faavae i le lesona atoa, ae le na o le faaiuga. Ao e faia, o le a faamautu atu e le Agaga Paia le moni o le aoaoga faavae i loto o i latou o loo e aoaoina. (Tagai Aoao Atu i le Ala a le Faaola,21.)