tagata i le lalolagi o agaga

Ua vaai Iosefa i lona tama, tina, ma lona uso i le malo selesitila (Faaaliga a Iosefa Samita o le Malo Selesitila, Robert Barrett).

29 Novema–5 Tesema.

Mataupu Faavae ma Feagaiga 137–138

“O Le Faaaliga o le Togiolaina o Ē ua Maliliu”

Na aoao mai Peresitene Dallin H. Oaks: “E mafai ona tatou mafaufau faalilolilo e uiga i tulaga i le lalolagi o agaga. … Ae aua ne’i o tatou aoao atua pe faaaoga e fai ma aoaoga faavae aloaia mea e le tutusa ma tulaga faatonuina o aoaoga faavae aloaia” (“Faalagolago i le Alii,” Ensign po o le Liahona, Nov. 2019, 28). Ia mautinoa o lau talanoaga e faavae i mau ma upu a perofeta.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E tele upumoni faaleaoaoga faavae musuina e maua i le Mataupu Faavae ma Feagaiga 137–38. Valaaulia tagata o le vasega e lisi nisi o na upumoni. Ona mafai lea ona e faaaluina ni nai minute e iloilo ai a latou lisi o se vasega ma talanoaina pe aisea e taua ai nei upumoni ia i latou. Pe na aoao e se tasi se mea mai nei vaega latou te lei malamalama i ai muamua?

aikona o le aoao atu

Aoao Atu le Aoaoga Faavae

Mataupu Faavae ma Feagaiga 137; 138:32–37

O le a maua e agaga uma le avanoa e filifili ai le mamalu selesitila.

• E toatele i tatou e iloa ni tagata e lei maua le avanoa e talia ai le talalelei i lenei olaga—e aofia ai ē na feoti o laiti. Valaaulia tagata o le vasega e faasoa mai se upumoni latou te maua i le vaega 137 e fesoasoani latou te malamalama ai i le fuafuaga a le Atua mo nei tagata. O a upumoni tatou te maua i le Mataupu Faavae ma Feagaiga 138:32–37 e faaopoopo i lo tatou malamalama i le fuafuaga a le Atua? E mafai e tagata o le vasega ona faasoa mai le ala e mafai ai e nei upumoni ona latou maua le lagona e uiga i le Tama Faalelagi, Lana fuafuaga o le faaolataga, ma le Togiola a Iesu Keriso. O le faamatalaga i le “Punaoa Faaopoopo” e mafai ona fesoasoani i au talanoaga.

Mataupu Faavae ma Feagaiga 138:1–11, 25–30

O le faitau ma mafaufau loloto i mau e saunia ai i tatou e maua faaaliga.

• O le aafiaga o Iosefa F. Samita i le Mataupu Faavae ma Feagaiga 138:1–11, 25–30 e fesoasoani ia i tatou e malamalama ai i le ala e mafai ai ona tatou saunia i tatou lava e maua faaaliga. Atonu e mafai e tagata o le vasega ona galulue faatasi e faailoa mea na latou aoao e uiga i faaaliga mai nei fuaiupu. E mafai ona e fai i tagata o le vasega e faasoa mai le ala na saunia ai i latou e maua faaaliga i le faitau ma mafaufau loloto i mau (tagai foi Iosefa Samita–Talafaasolopito 1:11–12).

• O le savali a Peresitene M. Russell Ballard “O Le Faaaliga o le Togiolaina o Ē ua Maliliu” (Ensign po o le Liahona, Nov. 2018, 71–74) ua faamatalaina Iosefa F. Samita ma lona “olaga atoa o le sauniuniga ia maua lenei faaaliga maoae [Mataupu Faavae ma Feagaiga 138].” Afai na faitau tagata o lau vasega i le savali a Peresitene Ballard i lenei vaiaso, uunaia i latou e faasoa mai se mea na musuia ai i latou. Pe e mafai ona outou faitauina ni vaega o le savali o se vasega. O le a se mea ua faagaeetia ai i tatou e uiga i le soifuaga o Peresitene Samita ma lona uiga? O le a se mea e mafai ona tatou aoao mai i lana faataitaiga?

  Atavali o Iosefa F. Samita

  Iosefa F. Samita, saunia e Albert E. Salzbrenner.

Mataupu Faavae ma Feagaiga138:12–60

O le galuega o le faaolataga e faaauau pe a mavae le oti.

• Ina ia fesoasoani i tagata o le vasega ia iloa upumoni i le Mataupu Faavae ma Feagaiga 138:12–60., e mafai ona e saunia ni nai fesili i le lalolagi o agaga ua taliina i nei fuaiupu. Mo se faataitaiga: O le a le mea na fai e le Faaola ao i ai o Ia i le lalolagi o agaga? O ai auauna a le Alii, ma o le a la latou savali? E mafai e tagata o le vasega ona filifili se tasi po o le sili atu o nei fesili ma galulue i vaega toalaiti e saili mo ni tali. Ona mafai lea ona latou faasoa atu i le tasi ma le isi upumoni na latou maua. O a ni eseesega e mafai e nei upumoni ona fai i o tatou olaga?

• O le a sa tatou tala i se tasi e fesili mai, “O le a le mea e tupu pe a tatou oti?” O le a se mea e mafai ona tatou faasoa mai Mataupu Faavae ma Feagaiga 138:12–60 e mafai ona fesoasoani e taliina lenei fesili? (Tagai foi Alema 40:11–15).

aikona o punaoa faaopoopo

Punaoa Faaopoopo

O le fuafuaga a le Atua ua saunia se ala mo Ana fanau uma e talia ai le talalelei?

Na aoao mai Peresitene Henry B. Eyring:

“Ua na o sina vaega toalaiti lava o fanau a le Atua e mauaina i lenei olaga se malamalamaaga atoatoa e uiga i le fuafuaga a le Atua, faatasi ai ma le mauaina o sauniga ma feagaiga o le perisitua lea e faagaoioia atoatoa ai le mana togiola o le Faaola i o tatou olaga. …

“Atonu e manatu nisi e le fetaui lenei mea. Atonu latou te manatu ane o se faamaoniga lea e faapea e le o i ai se fuafuaga, leai ni mea patino e manaomia mo le faaolataga—ua lagonaina e le fatuina e se Atua amiotonu ma alofa se fuafuaga e avanoa i le nā o se vaega toalaiti o Lana fanau. O isi ua tamau e faapea atonu ua leva lava ona fuafua e le Atua po o ai Ana fanau o le a Ia laveaiina ma faia le talalelei ia avanoa ia i latou, ae o i latou e lei faalogo lava i le talalelei sa lei “filifilia” lava i latou.

“Ae ua e iloaina ma ou iloaina, ona o upumoni na toefuataiina e ala mai i le Perofeta o Iosefa Samita, o le fuafuaga a le Atua e matua sili lava le alofa ma le amiotonu nai lo lena. O loo naunau lo tatou Tama Faalelagi ia faapotopoto ma faamanuia Lona aiga atoa. E ui Na te silafia e le o i latou uma o le a filifili ina ia potopoto, ae ua tuu atu e Lana fuafuaga i Ana fanau taitoatasi le avanoa e talia ai pe teena ai Lana valaaulia. (“Faapotopotoina o le Aiga o le Atua,” Ensign po o le Liahona, Me 2017, 20–21).

Faaleleia o Lo Tatou Aoao Atu

Faaaoga saunoaga a perofeta “O tusitusiga paia ma upu a perofeta ma aposetolo o aso e gata ai o punaoa o upumoni o loo tatou aoaoina. I avanoa uma, musuia i latou e te aoaoina e liliu atu i afioga a le Atua mo se taitaiga” (Aoao Atu i le Ala a le Faaola, 21).