atatusi o Maria ma le tama meamea o Iesu

Faatusa o le Fanau Mai i le Kopa Enaena ma le Samasama, saunia e J. Kirk Richards

20–26 Tesema

Kerisimasi

O Le Meaalofa lē Mafaatusalia o Lona Alo Paia

Manatua o le aoaoina o le talalelei e sili ona aoga ma taua a tagata o le vasega e tupu i totonu o o latou aiga. Ao e saunia e aoao atu, mafaufau pe faapefea ona faamalosia e lau vasega o le Aoga Sa a latou suesuega patino ma faaleaiga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ua faapefea ona faamanuiaina tagata o lau vasega i le suesueina o “O Le Keriso Soifua” (ChurchofJesusChrist.org) i lenei vaiaso? E mafai ona e faasoa atu nei upu mai ia Peresitene Jean B. Bingham, le Peresitene Aoao o le Aualofa, ona valaaulia lea o tagata o le vasega e talanoa i soo se aafiaga faapena na latou oo i ai:”Ao ou suesue i le soifuaga ma aoaoga a Iesu Keriso ma taulai atili ma tautino atu e tauloto le ‘O le Keriso Soifua’ , na faateleina lo’u lotofaafetai ma le alofa mo lo tatou Faaola. O fuaiupu taitasi o lena tusiga musuia o loo i ai se lauga ma ua faalauteleina ai lo’u malamalama i Ana matafaioi paia ma le misiona i le lalolagi nei. O mea sa ou aoaoina ma lagonaina i lea vaitau o le suesue ma toe tomanatu i ai, ua faamautu ai e moni lava o Iesu “o le malamalama, o le ola, ma le faamoemoe o le lalolagi’” (“Ina Ia Atoa Lou Olioli,” Ensign po o le Liahona, Nov. 2017, 85).

aikona o le aoao atu

Aoao Atu le Aoaoga Faavae

“E leai se isi na i ai se aafiaga ua matua loloto naua.”

• E mafai e tagata o le vasega ona faitau le parakalafa muamua “O Le Keriso Soifua” ma faasoa mai o latou manatu pe aisea ua sili ai le loloto naua o le aafiaga o Iesu Keriso nai lo se isi lava tagata. O a isi fuaitau i le “O Le Keriso Soifua” e lagolago ai lenei faamatalaga? Valaaulia tagata o le vasega e faasoa mai le ala na Ia uunaia patino ai i latou. O le vitio “Why We Need a Savior” (ChurchofJesusChrist.org) e mafai ona faaaoga i au talanoaga.

• Pe na i ai se taimi na e taumafai ai e faamatala i se tasi o se isi aganuu pe aisea latou te faamanatu ai le Kerisimasi? Atonu e mafai ona latou faasoa mai o latou aafiaga. Pe mafai foi ona e valaaulia tagata o le vasega e mafaufau ua fesiligia i latou i lenei fesili e se tasi e le masani ma le faaKerisiano. E faapefea ona tatou tali atu i lea fesili? Uunaia tagata o le vasega e iloilo le “O Le Keriso Soifua” faatasi ma lenei fesili i le mafaufau, ma valaaulia nisi e faasoa mai o latou manatu. E mafai foi ona outou faitau o se vasega le Luka 2:10–14 pe usu se viiga e faaali ai le olioli o le Kerisimasi (e pei o le “Le Lalolagi ia Fiafia,” Viiga, nu. 113) ma talanoa pe aisea e aumai ai e le fanau mai o Keriso le “fiafia sili.” O a ni mea e mafai ona tatou faia e “talia ai lo [tatou] Tupu”?

  Iesu Keriso

  Malamalama o le Lalolagi, saunia e Howard Lyon

“Ia faafetaia le Atua mo [Lana] meaalofa lē mafaatusalia.

• I le “O Le Keriso Soifua,” ua faatatau Aposetolo i le Faaola o se “meaalofa” mai lo tatou Tama Faalelagi. Ina ia fesoasoani i tagata o le vasega ia aoao atili i lenei meaalofa, e mafai ona e tusia i le laupapa E ala mai ia Iesu Keriso, ua tuuina mai ai e le Atua le meaalofa o le … ma valaaulia tagata o le vasega e fautua mai ni ala e faauma ai lea fuaiupu, e faalagolago i le “O Le Keriso Soifua” ma le saunoaga a Peresitene Russell M. Nelson i le “Punaoa Faaopoopo” E faapefea ona tatou mauaina nei meaalofa? E mafai ona e valaaulia tagata o le vasega e filifili se tasi o nei meaalofa ma galulue ia sili atu ona atoatoa le mauaina o lena meaalofa .

aikona o punaoa faaopoopo

Punaoa Faaopoopo

Meaalofa ua ofo mai e le Faaola.

I lana lauga i le taimi o le Kerisimasi, na lisi ai e Peresitene Russell M. Nelson ni meaalofa se fa ua tuuina mai e le Faaola ia i latou uma e naunau e taliaina:

“Muamua, na Ia foai mai ia te oe ma a’u se gafatia le faatapulaaina e alofa ai. Ua aofia i lena gafatia le alofa atu i e e le alofaina ma i latou e le gata e le alolofa ia te oe ae o loo sauaina oe i le taimi nei ma faaaogaina oe.

“Faatasi ai ma le fesoasoani a le Faaola, e mafai ai ona tatou aoao e alolofa atu e pei ona sa Ia alofa mai. …

“O se meaalofa lona lua ua ofo mai e le Faaola ia te oe o le gafatia e faamagalo atu ai. E ala i Lana Togiola e lē i’u, e mafai ai ona e faamagalo atu ia i latou o ē faatiga ia te oe ma ē atonu latou te lē taliaina lava le tiutetauave mo lo latou agaleaga ia te oe. …

“O se meaalofa lona tolu mai le Faaola o le salamo. O lenei meaalofa e le o malamalama lelei i ai i taimi uma. … O le salamo o se meaalofa ofoofogia. O se faagasologa e le tatau ona matatau i ai. O se meaalofa mo i tatou ia maua ma le olioli ma ia faaaoga—ia taliaina—i lea aso ma lea aso a o tatou saili atu ia avea atili e faapei o lo tatou Faaola. …

“O se meaalofa lona fa mai lo tatou Faaola o se folafolaga moni lava—o se folafolaga o le ola e faavavau. … O le ola e faavavau o le ituaiga ma le tulaga silisili o le olaga o loo soifua ai le Tama Faalelagi ma Lona Alo Pele. Pe a ofoina mai e le Tama ia i tatou le ola e faavavau, o loo Ia fetalai mai i le aano atoa, “Afai tou te filifili e mulimuli i lo’u Atalii—afai o lou manao o le avea moni e faapei o Ia—ona oo mai lea o le taimi tou te ola ai e faapei ona ma ola ai ma pule faamalumalu i lalolagi ma malo e pei ona ma faia.”

“O nei meaalofa tulaga ese e fa o le a aumaia atili ia i tatou le olioli sili pe a tatou taliaina ia meaalofa. Na mafaia na mea aua o Ieova na afio ifo i le lalolagi o le pepe o Iesu“ (“O Meaalofa e Fa ua Ofo Mai e Iesu Keriso ia te Oe” (Faigalotu o le Kerisimasi a le Au Peresitene Sili, 2 Tes., 2018), broadcasts.ChurchofJesusChrist.org).

Faaleleia o Lo Tatou Aoao Atu

Saunia oe lava ia faaleagaga. “O le aoao atu o le talalelei ma le mana o lona uiga e le na o le sauniaina o se lesona ae o le sauniaina o i tatou lava. O faiaoga lelei o le talalelei—ae latou te lei mafaufau e faatumu le taimi o le vasega—e taulai atu i le faatumuina o latou loto i le Agaga Paia” (Aoao Atu i le Ala a le Faaola, 12).