o se aiga

13–19 Tesema

O Le Aiga: O Se Folafolaga i le Lalolagi

“O Le Aiga e Totonugalemu i le Fuafuaga a le Foafoa”

Ao e suesue i le “O Le Aiga: O Se Folafolaga i le Lalolagi” i lenei vaiaso, mafaufau i upumoni o le a lagolagoina tagata o le vasega ia latou taumafaiga e faamalolosia o latou aiga ma auaiga.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

Ina ia uunaia tagata o le vasega e faasoa mai mea na latou maua ao latou suesueina le folafolaga i le aiga, e mafai ona e fai atu ia i latou e filifili soo se parakalafa ma otooto i se fuaiupu se tasi le mea o aoao mai ai.

aikona o le aoao atu

Aoao Atu le Aoaoga Faavae

“O Le Aiga e Totonugalemu i le Fuafuaga a le Foafoa”

• Ua lauiloa le Ekalesia mo lona faatāuaina o aiga, ma o le folafolaga i le aiga ua faaalia ai pogai faaleaoaoga faavae mo lena faatāuaina. Ina ia musuia se talanoaga e uiga i lenei vaega, e mafai ona e valaaulia tagata o le vasega e mafaufau faapea ua fesili atu se tasi ia i latou pe aisea e faataua tele ai e le Ekalesia aiga. Oa upumoni mai le folafolaga e mafai ona e faasoa atu e tali ai le fesili a le tagata?

• O le tasi pogai e taua tele ai le folafolaga i le aiga ona na te toe faamautinoa maia upumoni o loo osofa’ia tele i o tatou aso. O a upumoni i le folafolaga e fesoasoani ia i tatou ia aua nei faaseseina ai e manatu sese e uiga i aiga i le lalolagi i le asō? E faapefea e nei upumoni ona aafia ai filifiliga tatou te faia? E mafai ona fesoasoani le saunoaga a Elder Dallin H. Oaks i le “Punaoa Faaopoopo” i le taliina o lenei fesili.

  o se aiga o loo kuka

  E tatau i matua ona tausia a latou fanau i le alofa ma le amiotonu.

“E maua le fiafia i le olaga faaleaiga pe a faavae i aoaoga a le Alii o Iesu Keriso.”

• O le talanoaina o mataupu faavae i parakalafa ono ma le fitu o le folafolaga i le aiga e mafai ona fesoasoani i tagata o lau vasega e maua ai le fiafia sili ia latou fesootaiga faaleaiga. Mafaufau e lisi ni mataupu faavae i le laupapa ma valaaulia tagata o le vasega e filifili se mataupu faavae e talanoaina i ni paga. E mafai ona latou faaaoga fesili e pei o nei e taiala ai a latou talanoaga: O a faataitaiga o lenei mataupu faavae ua e vaaia i olaga faaleaiga? E faapefea e le ola ai i lenei mataupu faavae ona taitai atu i le fiafia i o tatou aiga? E faapefea e le ola ai i lenei mataupu faavae ona fesoasoani ia i tatou e avea ai le Faaola ma faavae o lo tatou olaga faaleaiga? O a mau e mafai ona fesoasoani i o tatou aiga ia malamalama atili ai i lenei mataupu faavae? (E mafai e tagata o le vasega ona maua mau e faaaoga ai le Topical Guide po o Taiala i Tusitusiga Paia [scriptures.ChurchofJesusChrist.org].) Ona mafai lea e paga taitasi ona faasoa mai i le vasega mea na latou maua.

  Faamamafa atu e tusa lava po o a tulaga o o tatou aiga o i ai nei, e mafai lava ona tatou tauivi e fausia se aiga faavavau i le faavae o le Faaola ma Lana talalelei.

“Matou te valaau atu i tamalii … e faalauiloa atu na fua faatatau ua fuafuaina ina ia faatumauina ma faamalosia le aiga.’

• E mafai faapefea ona e fesoasoani i tagata o lau vasega ia malamalama i lo latou tiutetauave e tausisia upumoni i le folafolaga i le aiga? Ina ia amata le talanoaga, e mafai ona e talanoaina mea na aoao e tagata o le vasega mai le autu o le folafolaga. O le a le folafolaga? O le a le mea ua agavaa ai le Au Peresitene Sili ma le Korama a Aposetolo e Toasefululua e tuuina atu se folafolaga i le lalolagi e faatatau i le aiga? E mafai e tagata o le vasega ona lisi mea latou te manatu o ni savali taua o le folafolaga (uunaia i latou e sii mai ni savali faapitoa). Ona mafai lea ona latou talanoaina auala e faalauiloa ai nei savali i lo latou nuu po o le atunuu. O le savali a Sister Bonnie L. Oscarson “O Tagata e Puipuia le Folafolaga” o loo i ai faataitaiga e mafai ona outou iloiloina faatasi o se vasega (Ensign po o le Liahona, Me 2015, 14–17). E mafai foi ona matamata le vitio “Tagata e Puipuia le Faatuatua” (ChurchofJesuChrist.org).

aikona o punaoa faaopoopo

Punaoa Faaopoopo

Aiga i le fuafuaga a le Atua.

Na aoao mai Peresitene Dallin H. Oaks:

“O le Au Paia o Aso e Gata Ai e malamalama i le ata o le faaolataga a le Atua ua i ai so latou vaaiga tupito faalelalolagi lea ua fesoasoani ia i latou e iloa ai le mafuaaga mo poloaiga a le Atua, le natura lemasuia o Ana sauniga manaomia, ma le matafaioi autu a lo tatou Faaola, o Iesu Keriso. Ua faasaoina e le Togiola a lo tatou Faaola i tatou mai le oti ma, afai tatou te salamo, o le a laveaiina i tatou mai le agasala. Faatasi ma lena vaaiga lautele, ua i ai i le Au Paia o Aso e Gata Ai ni faamuamua ma ni faiga tulagaese ma ua faamanuiaina i le malosi e onosaia ai le le fiafia ma tiga o le olaga faaletino. …

“O le fuafuaga o le talalelei e tatau ona mulimuli ai aiga taitasi e saunia ai mo le ola e faavavau ma le faaeaga, ua otooto atu i le folafolaga a le Ekalesia i le 1995, ’O Le Aiga: O Se Folafolaga i le Lalolagi..’ O ana folafolaga, o le mea moni, e manino lava le eseese ma nisi o tulafono o i ai nei, faiga masani, ma mea ua taliaina e le lalolagi o loo tatou ola ai nei. I o tatou aso, o eseeega e aupito sili ona manino o le nonofo faapouliuli e aunoa ma le faaipoipo, faaipoipoga o le itupa e tasi, atoa ai ma le tausiga o se fanau o loo i ai i ia sootaga faapea. O i latou e le talitonu pe le fia saili i le faaeaga ma o loo sili ona faatosinaina e ala o le lalolagi, e manatu i lenei folafolaga i le aiga ua na o se faamatalaga o aiaiga faavae e tatau ona suia. I se isi itu, ua faamautinoa e le Au Paia o Aso e Gata Ai faapea o le folafolaga i le aiga ua faamatalaina le ituaiga o sootaga faaleaiga lea o se vaega e sili ona taua e mafai ona tupu o le atiinaega e faavavau” (“O le Fuafuaga ma le Folafolaga,” Ensign po o le Liahona, Nov. 2017, 29).

Faaleleia o Lo Tatou Aoao Atu

Ola i le talalelei ma lou loto atoa. “E oo mai le mana pe a faia e se faiaoga mea uma e mafai ona ia faia e saunia ai, e le na o le lesona lava ia, ae i le tausia o lona olaga ina ia ogatusa ma le Agaga.”(Boyd K. Packer, Ia E Aoao Atu ma le Filiga [1975], 306).