ie soosoo o faaalia ai le tele o lanu o tino

I Alii Agavaa Uma, saunia e Emma Allebes

6–12 Tesema.

O Mataupu Faavae o le Faatuatua ma Folafolaga Aloaia 1 ma le 2

“Matou te Talitonu”

Faitau ma le agaga tatalo Mataupu Faavae o le Faatuatua ma Folafolaga Aloaia 1 ma le 2, ma saili uunaiga a le Agaga Paia ao e fuafuaina se aafiaga e aoao ai lelei mo tagata o le vasega i le Aso Sa.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona e valaaulia tagata o le vasega e faauma le fuaitau lenei: “Ua ou fiafia na ou faitauina mau o lenei vaiaso aua …”

aikona o le aoao atu

Aoao Atu le Aoaoga Faavae

O Mataupu Faavae o le Faatuatua

O Mataupu Faavae o le Faatuatua o loo i ai upumoni autu o le talalelei toefuataiina.

• O se ala lenei e fesoasoani i tagata o le vasega e faasoa ai mea na latou maua e faapitoa lava le taua i Mataupu Faavae o le Faatuatua: e mafai ona e tusia numera 1 e oo i le 13 i le laupapa ma fai atu i tagata o le vasega e tusi i autafa o numera se mea na latou aoaoina mai lena mataupu faavae o le faatuatua. O le a se eseesega e faia e nei upumoni i la tatou sootaga ma o tatou Matua Faalelagi ma Iesu Keriso? Atonu e mafai e tagata o le vasega ona faasoa mai le ala na uunaia ai e Mataupu Faavae o le Faatuatua a latou suesuega o le talalelei pe na fesoasoani ia i latou e faasoa le talalelei i isi.

Mataupu Faavae o le Faatuatua 1:9; Folafolaga Aloaia 1 ma le 2

O le Ekalesia a Iesu Keriso ua taialaina e faaaliga.

• Aisea e taua ai ia i tatou faaaliga faifai pea? Valaaulia tagata o le vasega e faasoa mai o latou lagona e uiga i lenei fesili. E mafai foi e tagata o le vasega ona talanoaina pe faapefea ona fesootai le mataupu faavae o faaaliga faifai pea i le Folafolaga Aloaia 1 ma le 2. (Ole otootoga o lenei vaiaso i le Sau, Mulimuli Mai ia te A’u—Mo Tagata Taitoatasi ma Aiga o loo fautuaina ai ni gaoioiga e fesootai i nei faaaliga.) O a mea ua tatou aoao mai Folafolaga Aloaia 1 ma le 2 e uiga i le matafaioi a faaaliga i le taialaina o le Ekalesia? (Tagai foi Mataupu Faavae o le Faatuatua 1:9 ma le saunoaga a Peresitene Gordon B.Hinckley i le “Punaoa Faaopoopo”). O a isi faataitaiga o faaaliga faifai pea e mafai e tagata o le vasega ona mafaufau i ai? E faapefea ona faatosina e nei faaaliga o tatou olaga ma fesoasoani ia i tatou e fausia le malo o le Tama Faalelagi?

• Mafaufau e valaaulia tagata o le vasega e iloilo le Folafolaga Aloaia 1 ma le 2 ma faasoa mai se mea mai nei faaaliga e mafai ona fesoasoani i se tasi o loo tauivi e talia se suiga o faigafaavae talu ai nei, faaaliga po o se aoaoga faavae o le Ekalesia. Na faapefea ona aoao tagata o le vasega e faalagolago i le Atua ao latou tauivi ma se mea i le Ekalesia? Na mafai faapefea e la latou suesuega o lenei vaiaso ona faamalosia lo latou faatuatua o loo taitaia e le Alii Lana Ekalesia? E mafai ona fesoasoani manatu mai le saunoaga a Peresitene Dieter F. Uchtdorf i le “Punaoa Faaopoopo”.

  atavali o Uilifoti Uitilafi

  Uilifoti Uitilafi, saunia e H. E. Peterson.

aikona o punaoa faaopoopo

Punaoa Faaopoopo

“Na i ai iina le Agaga o le Atua.”

Sa auauna atu Peresitene Gordon B. Hinckley o se sui o le Korama a Aposetolo e Toasefululua ina ua maua le faaaliga i le Folafolaga Aloaia 2. Na ia faamatalaina lona aafiaga i ni tausaga mulimuli ane:

“Sa i ai se siosiomaga faapaiaina ma le faamamaluina i le potu. Mo au, o se lagona e pei o se faitotoa vaapiapi ua matala i le va o le nofoalii faalelagi ma le perofeta a le Atua o loo tootuli, le perofeta a le Atua o loo augani atu lea na faatasi atu i ai ona Uso. Na i ai iina le Agaga o le Atua. Ma i le mana o le Agaga Paia na oo mai i lena perofeta se faamautinoaga o le mea na ia tatalo ai ua sao lea, ma ua oo mai le taimi, ma o faamanuiaga ofoofogia o le perisitua ua tatau nei ona faasafuaina atu i alii agavaa uma i soo se mea e tusa lava po o le a le tupuaga.

“O alii uma i lena li’o, e ala i le mana o le Agaga Paia, sa iloaina lea lava mea e tasi.

“O se taimi malualii toafilemu ma le mamalu. … Sa leai se leo na lagona e o matou taliga faaletino. Ae o le leo o le Agaga sa musumusu mai ma se mautinoa i o matou mafauau ma agaga uma. (“Toefuataiina o le Perisitua,” Ensign, Oke. 1988, 70).

“O se mea masani le i ai o ni fesili.”

Sa saunoa mai Peresitene Dieter F. Uchtdorf ia i latou na masalosalo e uiga i le talafaasolopito o le Ekalesia po o aoaoga faavae:

‘O se mea masani le i ai o fesili—o sina fatu itiiti o le fesili faamaoni ua tele lava ina tupu a’e ma avea ma se laau mafalā o le malamalama. O loo i ai ni nai tagata o le Ekalesia o e, po o le a lava le taimi, e lei tauivi lava ma ni fesili matuia pe maaleale. O se tasi o faamoemoega o le Ekalesia o le faafailele lea ma atiae le fatu o le faatuatua—e oo lava i nisi o taimi i eleele matutu o le masalosalo ma le le mautonu. O le faatuatua o le faamoemoe lea mo mea e le vaaia ae ua moni.

“O le mea lea, ou uso e ma tuafafine pele—au uo pele—faamolemole, ia muamua ona masalosalo i ou masalosaloga ae e te lei masalosalo i lou faatuatua. E le tatau lava ona tatou faatagaina le masalosalo e faapagotaina i tatou ma taofia ai i tatou mai le alofa paia, filemu, ma meaalofa ia e oo mai e ala i le faatuatua i le Alii o Iesu Keriso” (“Sau, Auai Faatasi ma i Matou,” Ensign po o le Liahona, Nov. 2013, 23; tagai foi Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu).

Faaleleia o Lo Tatou Aoao Atu

E le afaina le faapea atu “Ou te le iloa.” Ao tatau ai ona e faia le mea sili e tali ai soo se fesili a tagata o lau vasega e uiga i le talalelei, e le faamoemoe le Alii ia te oe e iloa mea uma. Afai e te le iloa tali se mea, tau atu e te le iloaina. Ona faasino lea o au tagata aoao i le aoaoga faavae ua faaalia, ma tuu atu se molimau faamaoni o mea ua e iloa. (Tagai Aoao Atu i le Ala a le Faaola,24.)