taupou popoto e toalima

Ua Afio Mai le Faatoafaiavā, saunia e Elizabeth Gibbons

15–21 Novema

Mataupu Faavae ma Feagaiga 133–134

“Ia Saunia mo le Afio Mai o le Faatoafaiavā”

O a upumoni i le Mataupu Faavae ma Feagaiga 133–34 e te manatu o le a sili ona aoga i lau vasega? Mafaufau ma le agaga tatalo i o latou manaoga ao e suesue i lenei vaiaso.

Tusi Faamaumau Ou Lagona Uunai

aikona o le fefaasoaai

Valaaulia le Fefaasoaai

E mafai ona e tusia le upu faalogo i le laupapa ma valaaulia tagata o le vasega e tusi i talaane fuaiupu mai le Mataupu Faavae ma Feagaiga 133–34 latou te talitonu tatou te manaomia e faalogo i ai i o tatou aso. Fai atu ia i latou e faasoa mai o latou manatu i nei fuaiupu. (Fesoasoani i tagata o le vasega e taulai atu i mataupu faaleaoaoga faavae nai lo vaaiga faalemalo.)

aikona o le aoao atu

Aoao Atu le Aoaoga Faavae

Mataupu Faavae ma Feagaiga 133:1–19; 37–39

Ua finagalo le Alii ia i tatou e saunia mo Lona Afio Mai Faalua.

• E mafai faapefea ona e fesoasoani i tagata o lau vasega ia malamalama pe aisea e taua ai le faapaiaina o i tatou lava ina ia mafai ai ona fesoasoani i isi ia saunia mo le Afio Mai Faalua o le Faaola? E mafai ona e valaaulia tagata o le vasega e iloilo le Mataupu Faavae ma Feagaiga 133:1-19, 37–39 ma faia ni lisi se lua: o le tasi lisi o fautuaga a le Alii pe faapefea ona faapaiaina i tatou lava ma o le isi o le fautuaga pe faapefea ona saunia le lalolagi mo le toe foi mai o le Faaola. O le a le uiga, i se tulaga faaleagaga, ia “o … i fafo mai Papelonia” (fuaiupu 5) ma le “sosola i Siona”? (fuaiupu 12). Mo nisi manatu i le uiga o le faapaiaga, tagai “Faapaiaga” i le Taiala i Tusitusiga Paia (scriptures.ChurchofJesusChrist.org).

Mataupu Faavae ma Feagaiga 133:19–53

O le Afio Mai Faalua o le a avea o se mea fiafia mo e amiotonu.

• Ia latou suesuega o tusitusiga paia i le aiga, atonu e maua e tagata o lau vasega ni fuaitau aoga i lenei vaega e uunaia i latou e tulimatai atu i le Afio Mai Faalua o le Faaola. Valaaulia i latou e faasoa mai nei fuaitau. E mafai foi ona e valaaulia i latou e suesue fuaiupu 19–53 i ni paga, ma vaavaai mo pogai e tulimatai atu ai i le Afio Mai Faalua o Iesu Keriso. Faasoa atu mea na latou maua o se vasega, ma uunaia i latou e talanoa i le ala na “togiolaina ai i latou, ma amo ai i latou, ma tauave ai i latou” (fuaiupu 53). O se avanoa lelei lenei e usu faatasi ai se pese e faatatau i le mana faaola o le Faaola, e pei o le “Ua Ou Iloa Lo‘u Fa‘aola” (Viiga, nu.73). O a isi “pese o le olioli tumau faavavau” (fuaiupu 33) e fesoasoani ia i tatou ia lagona le “alofa agalelei o lo [tatou] Alii”? (fuaiupu 52).

Mataupu Faavae ma Feagaiga 134

“Sa faavaeina e le Atua ia malo mo le manuia o tagata.”

• Ina ia fesoasoani i tagata o le vasega e aoao mai le Mataupu Faavae ma Feagaiga 134, e mafai ona e tuu fesili e pei o nei i se apa po o le laupapa: E faapefea ona finagalo le Atua ia faamanuiaina e malo Ana fanau? O le a se mea e tatau ona tatou faia pe afai e tetee tulafono a le atunuu i tulafono faalelagi? O a o tatou tiute ma matafaioi o ni tagatanuu? Valaaulia tagata o le vasega e filifili se fesili ma faaaoga le vaega 134 e fatu ai se fesili. Fautuaina tagata o le vasega e aloese mai le talanoaina o ni mataupu po o ni manatu faapitoa faalemalo.

• O le saolotoga e “faitalia i [tatou], pe faapefea, po o fea, po o le a foi le mea [tatou] te tapuai atu i ai. (Mataupu Faavae o le Faatuatua 1:11) o se avanoa e finagalo le Alii e maua e tatou uma. Afai e te lagona e aoga i lau vasega le talanoa i mataupu faavae o le saolotoga faalelotu, mafaufau e faitau faatasi le Mataupu Faavae ma Feagaiga 134:4 7 9. O a mea ua aoao mai e nei fuaiupu ia i tatou e uiga i le matafaioi a se malo i le puipuia o le saolotoga faalelotu? E mafai faapefea ona tatou siitia le saolotoga o tapuaiga mo i tatou lava ma isi? Atonu e maua e tagata o le vasega ni manatu e fesoasoani e tali ai lenei fesili i le “Punaoa Faaopoopo.”

aikona o punaoa faaopoopo

Punaoa Faaopoopo

O Maatulimanu o le saolotoga o tapuaiga

Na aoao mai Elder Robert D. Hales:

“E fa maatulimanu o le saolotoga o tapuaiga e tatau ia i tatou o le Au Paia o Aso e Gata Ai ona faalagolago i ai ma puipuia.

“Muamua o le saolotoga e talitonu ai. E leai se tasi e tatau ona faitioina, sauāina, pe osofaia e tagata, po o malo foi, mo mea ua ia talitonu i ai e uiga i le Atua. …

“O le maatulimanu lona lua o le saolotoga o tapuaiga o le saolotoga e faasoa atu ai lo tatou faatuatuaga ma talitonuga i isi. … I le avea ai o ni matua, faifeautalai faamisiona, ma faifeautalai o uarota, tatou te faalagolago i le saolotoga o tapuaiga ina ia mafai ai ona aoao atu le aoaoga faavae a le Alii i o tatou aiga ma le lalolagi atoa.

“O le maatulimanu lona tolu o le saolotoga o tapuaiga o le saolotoga lea e faatuina ai faalapotopotoga faalelotu, se ekalesia, ia tapuai filemu ai faatasi ma isi. O le mataupu faavae lona sefulutasi o le faatuatua o loo ta’u mai ai, “Ua ia i matou le aia tatau matou te tapuai atu ai i le Atua Mamana e tusa ai ma o matou lava lotofuatiaifo, ma ua matou tuuina atu foi lea lava aia tatau i tagata uma, e faitalia i latou, pe faapefea, po o fea, po o le a foi le mea latou te tapuai atu i ai.” …

“O le maatulimanu lona fa o le saolotoga o tapuaiga o le saolotoga lea e ola ai i lo tatou faatuatuaga—faaaogaina saoloto o le faatuatua e le na o le fale ma le falesa ae faapea foi i nofoaga faitele” (“Faasaoina o le Faitalia, Puipuia o le Saolotoga o Tapuaiga,” Ensign po o le Liahona, Me 2015, 112).

Faaleleia o Lo Tatou Aoao Atu

Aoao atu le “aisea.” “Afai e malamalama [tagata o le vasega] i le fuafuaga e faavavau a le Tama Faalelagi mo le fiafia o Lana fanau, o mafuaaga mo mataupu faavae o le talalelei ma poloaiga o le a sili atu ona manino ma o le a faateleina le faaosofia e usiusitai” (Aoao Atu i le Ala a le Faaola,20).