Iosepha Semita i Nauvoo, 1840, nā Theodore Gorka

8–14 nō Novema

Te Parau Ha’api’ira’a ʼe te mau Parau Fafau 129–132

« ’Ia noa’a mai ia tātou te hō’ē ha’amaita’ira’a nō ’ō mai na i te Atua ra, ’ua nā roto ïa i te ha’apa’ora’a »

E mea faufa’a ’ia fāri’i i te hō’ē fa’anahora’a ha’api’ira’a, e mea faufa’a ato’a rā ’ia fa’aro’o i te Vārua ’e ’ia pāhono i te mau hina’aro o te mau pīahi. ’A ’imi i rotopū i te mau pīahi e aha te mau parau tumu i roto i te mau tuha’a 129–32 tei riro ’ei mea faufa’a nō rātou.

Pāpa’i i te mau mana’o e tae mai

Tītau i te mana’o

’Ua ha’api’i mai paha te mau pīahi i te tahi mau mea i roto i tā rātou tuatāpapara’a i te mau tuha’a 129–32 ’o tē tū’ati i ni’a i te mau tumu parau rau o te ’evanelia. Nō te hōro’a ia rātou i te hō’ē rāve’a nō te fa’a’ite mai i te mea tā rātou i ’apo mai, e nehenehe ’oe e pāpa’i i te tahi o te reira mau tumu parau i ni’a i te tāpura ’ere’ere, mai te mau melahi, te fa’ateiteira’a, te ha’apa’o, te nātura o te Atua, ’e te fa’aipoipora’a mure ’ore (e nehenehe ato’a ’oe e pāpa’i te tahi atu i ni’a i te tāpura ’ere’ere nō te fa’a’ite i te tahi atu mau tumu parau). E nehenehe te mau melo nō te piha ha’api’ira’a e rave i te tahi minuti nō te ’imi i te hō’ē ’īrava i roto i teie mau tuha’a ’o tē tū’ati i ni’a i te hō’ē o te mau tumu parau ’e ’ia pāpa’i i te reira i ni’a i te tāpura ’ere’ere. I muri iho, e nehenehe te piha ha’api’ira’a e tai’o i te mau ’īrava ’e e paraparau nō ni’a i te mea tā te ’īrava tāta’itahi e ha’api’i ra nō ni’a i taua tumu parau ra.

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 130:2, 18–23 ; 131: 1–4 ; 132: 20–25

’Ua fa’ata’ahia teie orara’a nō te fa’aineine ia tātou nō te fa’ateiteira’a.

• E rave rahi te mau mea ’aita tātou i ’ite nō ni’a i te fa’ateiteira’a ’aore rā, te orara’a i roto i te bāsileia tiretiera—penei a’e te tuha’a rahi o te reira e’ita tātou e māramarama i teie taime. Terā rā, ’ua heheu mai te Atua i te tahi mau tāpa’o faufa’a rahi, ’e e rave rahi o te reira ’o tē ’itehia i roto i Te Parau Ha’api’ira’a ’e te mau Parau Fafau 130–32. E nehenehe te mau melo nō te piha ha’api’ira’a e tuatāpapa i te hō’ē ’aore rā, hau atu o te mau ’īrava i tāpurahia i ni’a nei, ’e e fa’a’ite mai i te mau mana’o tei ’itehia ia rātou nō ni’a i te fa’ateiteira’a ’aore rā, nō ni’a i te bāsileia tiretiera. Nāhea te ’itera’a i teie ha’amāramaramara’a nō ni’a i te ora mure ’ore i te ha’amaita’i i tō tātou orara’a i teienei ?

Te Parau Ha’api’ira’a ’e te mau Parau Fafau 130:20–21 ; 132:5

E tae mai te mau ha’amaita’ira’a nā roto i te aurarora’a i te Atua.

• Tē ha’api’i ato’a nei Te Parau Ha’api’ira’a ’e te mau Parau Fafau 130:20–21 ’e 132: 5 i teie parau tumu. ’A fa’aitoito i te mau pīahi ’ia tai’o i nā tuha’a pāpa’ira’a e piti ’e ’ia fa’ahiti mai, nā roto i tā rātou iho mau parau, e aha te reira parau tumu. Nāhea teie parau tumu i te ’itera’ahia i roto i tō tātou orara’a ? Nāhea e ’itehia ai ia tātou te ti’aturi ’e te tāmāhanahanara’a i roto i te Mesia ’ia ha’apa’o ana’e tātou, ’aita rā te mau ha’amaita’ira’a tā tātou e tīa’i ra e tae mai i terā iho taime ? Nō te tahi ’itera’a hau atu nō ni’a i teie tumu parau, e nehenehe ’outou e hi’ohi’o ’āmui fa’ahou i te mau mana’o i roto i te parau poro’i a Elder Dale G. Renlund « Te rahi ra tōna maita’i » (Ensign ’e ’aore rā Liahona, Mē 2019, 70–73).

Te Parau Ha’api’ira’a ’e te mau Parau Fafau 131:1–4 ; 132:3–25

’Ua hōro’a te Metua i te Ao ra i te rāve’a nō te mau ’utuāfare ’ia vai noa ē a muri noa atu.

• E aha tā tātou e parau i te hō’ē hoa ’o tē ui mai : « Nō te aha e mea faufa’a roa te fa’aipoipora’a ’e te ’utuāfare i roto i tā ’outou ’ēkālesia ? » E nehenehe te mau melo nō te piha ha’api’ira’a e feruri e nāhea rātou i te pāhono i te reira uira’a ’a tai’o ai i Te Parau Ha’api’ira’a ’e te mau Parau Fafau 131:1–4 ; 132:3–25 ; ’e ’aore rā, i te mau parau a Elder Dieter F. Uchtdorf i roto i « Te tahi atu mau rāve’a tauturu ». Nāhea teie mau parau mau i te fa’auru i te huru o tō tātou orara’a ?

  

  E nehenehe te mau tā’amura’a ’utuāfare e riro ’ei tā’amura’a mure ’ore nā roto i te mau ’ōro’a o te hiero.

Te Parau Ha’api’ira’a ’e te mau Parau Fafau 132:1–2, 29–40

E fāri’i-noa-hia te fa’aipoipora’a vahine rau mai te mea nā te Atua e fa’aue i te reira.

• Mai te mea ē, e uira’a tā te mau pīahi nō ni’a i te fa’aipoipora’a i te vahine rau, ’a tauturu ia rātou ’ia ’ite ē, e uira’a ato’a tā Iosepha Semita ’e tā te tahi mau feiā mo’a i tahito ra. ’A fa’aitoito ia rātou ’ia ’imi i te uira’a tā Iosepha i ui i te Fatu i roto i Te Parau Ha’api’ira’a ’e te mau Parau Fafau 132:1 ’e te pāhonora’a tāna i fāri’i i roto i te mau ’īrava 29–40 (hi’o ato’a Iakoba 2:27, 30). E nehenehe paha te mau melo nō te piha ha’api’ira’a e fa’a’ite mai e mea nāhea tō rātou ’imira’a i te mau pāhonora’a i te mau uira’a nō ni’a i te ’evanelia, ’e e mea nāhea tō rātou vai-ha’apa’o-noa-ra’a, noa atu ē, ’aita i pāhonohia te tahi o tā rātou mau uira’a.

Te tahi atu mau rāve’a tauturu

E « fa’auera’a nō te ra’i » te ’utuāfare.

’Ua ha’api’i mai te peresideni Dieter F. Uchtdorf :

« Te māuruuru nei au i te mea ē, e melo vau nō te hō’ē ’Ēkālesia ’o tē ha’afaufa’a nei i te fa’aipoipora’a ’e te ’utuāfare. ’Ua tu’i te ro’o o te mau melo nō te ’Ēkālesia a Iesu Mesia i te Feiā Mo’a i te mau Mahana Hope’a nei nā te ao nei nō te mau fa’aipoipora’a ’e te mau ’utuāfare maita’i roa a’e tā ’outou e nehenehe e ’ite. Tē ti’aturi nei au e tuha’a te reira nō te parau mau faufa’a rahi tei fa’aho’ihia mai e Iosepha Semita ’e ’ua ’ōpuahia te mau fa’aipoipora’a ’e te mau ’utuāfare ’ei mea mure ’ore. E ’ere te mau ’utuāfare nō te fa’a’ōhie-noa-ra’a i te mau mea i’ō nei i ni’a i te fenua nei, ’e ’ia fa’aru’e ’ia tae ana’e tātou i te ra’i ra. Terā rā, e fa’auera’a te reira nō te ra’i. E tāvevo te reira nō te hō’ē hōho’a tiretiera ’e e hōho’a nō te ’utuāfare mure ’ore o te Atua.

« E’ita rā te mau autā’atira’a pūai nō te fa’aipoipora’a ’e nō te ’utuāfare e tupu nō te mea noa ē, e melo tātou nō te ’Ēkālesia. E tītau te reira i te ’ohipara’a tāmau ’e te hina’aro mau. E mea ti’a i te parau ha’api’ira’a nō te mau ’utuāfare mure ’ore ’ia fa’auru ia tātou ’ia hōro’a i tā tātou mau tūtavara’a maita’i roa a’e nō te fa’aora ’e nō te ha’amaita’i i tō tātou fa’aipoipora’a ’e te ’utuāfare » (« ’Ei fa’ahanahanara’a i te feiā ’o te pāruru nei » Ensign ’e ’aore rā Liahona, Mē 2016, 77).

Ha’amaita’ira’a i tā tātou ha’api’ira’a

E fa’atupu i te hō’ē vāhi pāruruhia. « E fa’aitoito [i te mau pīahi] ’ia tauturu mai ia ’oe ’ia ha’amau i te hō’ē vāhi matara noa, te here, ’e te fa’atura, ’ia ti’a ho’i i te mau ta’ata ato’a ’ia fa’a’ite i te ’ohipa i tupu nō rātou, te mau uira’a, ’e te mau ’itera’a pāpū » (Ha’api’ira’a mai tā te Fa’a’ora, 15).