Tē haere mai nei te tāne fa’aipoipo, nā Elizabeth Gibbons

15–21 nō Novema

Te Parau Ha’api’ira’a ʼe te mau Parau Fafau 133–134

« ’A fa’aineine ia ’outou nō te taera’a mai o te tāne fa’aipoipo ’āpī »

I tō ’oe mana’o, e aha te mau parau mau i roto i Te Parau Ha’api’ira’a ’e te mau Parau Fafau 133–34 e tauturu rahi roa i tā ’oe piha ha’api’ira’a ? ’A feruri, nā roto i te pure, i tō rātou mau hina’aro ’a tuatāpapa ai ’oe i teie hepetoma.

Pāpa’i i te mau mana’o e tae mai

Tītau i te mana’o

E nehenehe ’oe e pāpa’i i te ta’o ra fa’aro’o mai na i ni’a i te tāpura ’ere’ere ’e ’a ani i te mau pīahi ’ia pāpa’i i pīha’i i te reira i te mau ’īrava i roto i Te Parau Ha’api’ira’a ’e te mau Parau Fafau 133–34 tā rātou e ti’aturi nei e tītauhia i tō tātou nei ’anotau. ’A ani ia rātou ’ia fa’a’ite mai i tō rātou mau mana’o nō ni’a i te reira mau ’īrava. (Tauturu i te mau pīahi ’ia fa’atumu i ni’a i te mau parau tumu o te ha’api’ira’a tumu, ’eiaha rā i ni’a i te mau mana’o poritita.)

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 133:1–19 ; 37–39

Tē hina’aro nei te Fatu ia tātou ’ia fa’aineine nō tōna tae-piti-ra’a mai.

• Nāhea ’oe i te tauturu i tā ’oe piha ha’api’ira’a ’ia hāro’aro’a ē, nō te aha e mea faufa’a ’ia ha’amo’a ia tātou iho nō te tauturu ia vetahi ’ē ’ia fa’aineine nō te tae-piti-ra’a mai o te Fa’aora ? E nehenehe ’oe e ani i te mau pīahi ’ia hi’o fa’ahou i Te Parau Ha’api’ira’a ’e te mau Parau Fafau 133:1–19, 37–39 ’e ’ia hāmani e piti tāpura : hō’ē tāpura nō te a’ora’a a te Fatu nō ni’a i te huru nō te ha’amo’ara’a ia tātou iho, ’e te tahi nō te a’ora’a nō ni’a i te huru nō te fa’aineinera’a i te ao nei nō te ho’ira’a mai o te Fa’aora. E aha te aura’a pae vārua nō te parau ē, « ’a haere i rāpae… ia Babulonia » (’īrava 5) ’e « ’ia horo atu i Ziona ra » ? (’īrava 12). Nō te ’ite hau atu nō ni’a i te aura’a o te ha’amo’ara’a, ’a hi’o « Ha’amo’ara’a » i roto i te Arata’i nō te mau pāpa’ira’a mo’a (scriptures.ChurchofJesusChrist.org).

Te Parau Ha’api’ira’a ’e te mau Parau Fafau 133:19–53

E riro te tae-piti-ra’a mai ’ei ’ohipa ’oa’oa nō te feiā parauti’a.

• I roto i tā rātou tuatāpapara’a pāpa’iraa mo’a i te fare, ’ua ’itehia paha i te mau melo o tā ’oe piha ha’api’ira’a te tahi mau ’īrava faufa’a i roto i teie tuha’a, ’o tē tura’i ia rātou ’ia tīa’i maoro i te tae-piti-ra’a mai o te Fa’aora. ’A ani ia rātou ’ia fa’a’ite mai i teie mau ’īrava. E nehenehe ato’a ’oe e ani i te piha ha’api’ira’a ’ia ’āpitipiti ia rātou nō te ’imi i roto i te mau ’īrava 19–53 i te mau tumu e tīa’i maoro ai i te tae-piti-ra’a mai o Iesu Mesia. ’Ia fa’a’ite mai te mau pīahi i te mau mea i ’itehia ia rātou, ’a fa’aitoito ia rātou ’ia paraparau nō ni’a i te huru te Fa’aora « i fa’aora mai ai ia rātou ra, ’e i ha’amāhu ia rātou, ’e i hōpoi noa ho’i ia rātou » (’īrava 53). E nehenehe teie e riro ’ei rāve’a maita’i nō te hīmene ’āmui i te hō’ē hīmene nō ni’a i te mana fa’aora o te Fa’aora. E aha te tahi atu « mau hīmene nō te ’oa’oa mure ’ore » (’īrava 33) ’o tē tauturu ia tātou ’ia ’ite i « te here marū o tō [tātou] Fatu » ? (’īrava 52).

Te Parau Ha’api’ira’a ’e te mau Parau Fafau 134

« ’Ua fa’ata’ahia te mau hau fenua e te Atua ’ei maita’i nō te ta’ata nei. »

• Nō te tauturu i te mau pīahi ’ia ’apo mai i te ha’api’ira’a i roto i Te Parau Ha’api’ira’a ’e te mau Parau Fafau 134, e nehenehe ’oe e tu’u i te mau uira’a mai teie i roto i te hō’ē fa’ari’i ’aore rā, i ni’a i te tāpura ’ere’ere : Mea nāhea te Atua e hina’aro nei i te mau fa’aterera’a hau ’ia riro ’ei maita’i nō tāna mau tamari’i ? E aha tā tātou e rave mai te mea ē, e pāto’i te mau ture fenua i te mau ture o te ra’i ? E aha tā tātou mau ’ohipa ’e te mau hōpoi’a ’ei huira’atira ? ’A ani i te mau pīahi ’ia mā’iti i te hō’ē uira’a ’e ’a fa’a’ohipa i te tuha’a 134 nō te hāmani i te hō’ē pāhonora’a. ’A fa’aitoito i te mau pīahi ’ia ha’apae i te paraparau nō ni’a i te mau parau ’e te mau mana’o poritita.

• Te ti’amāra’a nō te « ha’amori… noa atu te huru, te vāhi ’e te mea tā [tātou] i hina’aro » (Te mau Hīro’a Fa’aro’o 1:11) ’o te hō’ē ïa ha’amaita’ira’a tā te Fatu e hina’aro ’ia fāri’i te mau ta’ata ato’a. Mai te mea ē, tē mana’o ra ’oe ē, e riro te paraparaura’a i te parau tumu nō te ti’amāra’a pae fa’aro’o ’ei maita’i nō tā ’oe piha ha’api’ira’a, e nehenehe e tai’o ’āmui i Te Parau Ha’api’ira’a ’e te mau Parau Fafau 134:4, 7, 9. E aha tā teie mau ’īrava e ha’api’i mai nei ia tātou nō ni’a i te ’ohipa a te fa’aterera’a hau i roto i te pārurura’a i te ti’amāra’a pae fa’aro’o ? Nāhea e ti’a ai ia tātou ’ia fa’atiani i te ti’amāra’a pae fa’aro’o nō vetahi ’ē ’e nō tātou iho ? E nehenehe e ’itehia i te mau pīahi te mau mana’o e tauturu i te pāhonora’a i teie uira’a, i roto i « Te tahi atu mau rāve’a tauturu ».

Te tahi atu mau rāve’a tauturu

Te ’ōfa’i tihi nō te ti’amāra’a pae fa’aro’o.

’Ua haʼapiʼi ʼo Elder Robert D. Hales :

« E maha ’ōfa’i tihi nō te ti’amāra’a pae fa’aro’o tei tītauhia ia tātou, te Feiā Mo’a i te mau Mahana Hope’a nei, ’ia ti’aturi ’e ’ia pāruru.

« ’A tahi, ’o te ti’amāra’a ’ia ti’aturi. ’Eiaha roa hō’ē ta’ata ’ia fa’ahapahia, ’ia hāmani-’ino-hia ’e ’ia ’arohia e te ta’ata, ’e tae noa atu i te mau fa’aterera’a hau nō te mea tāna e ti’aturi nō ni’a i te Atua…

« Te piti o te ’ōfa’i tihi nō te ti’amāra’a pae fa’aro’o, ’o te ti’amāra’a ïa ’ia fa’a’ite i tō tātou fa’aro’o ’e tō tātou mau ti’aturira’a ia vetahi ’ē… ’Ei metua, ’ei misiōnare rave tāmau ’e ’ei melo misiōnare, tē tūru’i nei tātou i ni’a i te ti’amāra’a pae fa’aro’o nō te ha’api’i i te ha’api’ira’a tumu a te Fatu i tō tātou ’utuāfare ’e nā te ao ato’a nei.

« Te toru o te ’ōfa’i tihi nō te ti’amāra’a pae fa’aro’o, ’o te ti’amāra’a ïa ’ia fa’anaho ia tātou ’ei ha’apa’ora’a fa’aro’o, ’ei ’ēkālesia, ’e ’ia ha’amori ma te hau ’e o vetahi ’ē. Tē parau nei te hīro’a fa’aro’o ’ahuru mā hō’ē, « Tē ti’aturi nei mātou ē, e ti’ara’a tō mātou ’ia ha’amori i te Atua Mana-Hope mai te au i tō mātou iho hina’aro, ’e e ti’ara’a ho’i tō te mau ta’ata ato’a ’ia ha’amori rātou noa atu te huru, te vāhi ’e te mea tā rātou i hina’aro’…

« Te maha o te ōfa’i tihi nō te ti’amāra’a pae fa’aro’o ’o te ti’amāra’a ïa ’ia ora i tō tātou fa’aro’o—te fa’a’ohipa-ti’amā-ra’a i te fa’aro’o, ’eiaha i roto noa i te fare ’e i te fare pure, i te mau vāhi ta’ata ato’a rā » (« Pāruru i te ti’amāra’a ’ia mā’iti, pāruru i te ti’amāra’a pae fa’aro’o », Ensign ’e ’aore rā Liahona, Mē 2015, 112).

Ha’amaita’ira’a i tā tātou ha’api’ira’a

Ha’api’i i te « nō te aha ». « Mai te mea e hāro’aro’a te [mau pīahi] i te fa’anahora’a mure ’ore a te Metua nō te ’oa’oa o tāna mau tamari’i, e pāpū maita’i a’e ïa te mau tumu o te mau parau tumu ’e te mau fa’auera’a o te ’evanelia, ’e e rahi atu ïa te hina’aro ’ia ha’apa’o » (Ha’api’ira’a mai tā te Fa’aora, 20).