Fare tāpe’ara’a nō Carthage

22–28 nō Novema

Te Parau Ha’api’ira’a ʼe te mau Parau Fafau 135–136

«’Ua tā’ati atu ’oia i tāna misiōni ’e tāna ’ohipa ho’i i tōna iho ra toto »

’A tai’o ai ’oe i te tuha’a 135–36, e nehenehe te Vārua Maita’i e hōro’a mai ia ’oe i te mau mana’o ’o tē riro ’ei mea maita’i nō te mau melo o tā ’oe piha ha’api’ira’a. E nehenehe ato’a te mau mana’o i roto i teie arata’ira’a ha’api’ira’a e fa’atupu i te mau mana’o tā ’oe e nehenehe e fa’a’ohipa ’a ha’api’i ai ’oe i te ta’ata.

Pāpa’i i te mau mana’o e tae mai

Tītau i te mana’o

Teie te hō’ē rāve’a nō te ani i te mau pīahi ’ia fa’a’ite mai i tō rātou mau mana’o nō ni’a i te tuha’a 135–36.. ’A ani ia rātou ’ia feruri ē, e nehenehe tā rātou e paraparau i te hō’ē melo o te ’Ēkālesia nō te matahiti 1844, hō’ē ta’ata tei pe’ape’a roa nō te pohera’a o Iosepha Semita ’e ’o tei ha’ape’ape’a nō ni’a i te aura’a o te reira nō te ’Ēkālesia. E aha tā tātou e nehenehe e fa’a’ite i roto i teie mau tuha’a, ’o tē nehenehe e tauturu i teie ta’ata ?

Ha’api’i i te ha’api’ira’a tumu

Te Parau Ha’api’ira’a ’e te mau Parau Fafau 135 ; 136:37–39

’Ua tītiro Iosepha Semita ’e ’o Hyrum i tō rāua ’itera’a pāpū i tō rāua toto.

• Nāhea te tusia a Iosepha Semita ’e a Hyrum i te « tītirora’a » i tō rāua ’itera’a pāpū ? E nehenehe paha te mau pīahi e feruri i teie uira’a ’a hi’ohi’o ai rātou i Te Parau Ha’api’ira’a ’e te mau Parau Fafau 135 ; 136:37–39. I muri iho, e nehenehe rātou e fa’a’ite mai i te mau mana’o tā rātou i fāri’i. E nehenehe ato’a rātou e fa’a’ite mai i tō rātou mau mana’o nō ni’a i te ineine o Iosepha ’e o Hyrum i te hōro’a i tō rāua ora nō te parau mau. Noa atu ē, e’ita paha e tītauhia ia tātou ’ia pohe nō te parau mau, nāhea e nehenehe ai i tō tātou orara’a ’ia riro ’ei « tītiro » nō tō tātou ’itera’a pāpū ?

Te Parau Ha’api’ira’a ’e te mau Parau Fafau 135:3

’Ua hau atu tā Iosepha Semita i rave nō tō tātou fa’aorara’a i tā te tahi atu ta’ata, maori rā tā Iesu Mesia.

• Nāhea e ti’a ai ia ’oe ’ia tauturu i te mau pīahi ’ia hāro’aro’a i te mea tā Iosepha Semita i rave nō tō rātou fa’aorara’a ? E nehenehe ’oe e pāpa’i i ni’a i te tāpura ’ere’ere Maoti te mau mea tā te Fatu i heheu mai nā roto ia Iosepha Semita, e… (au) ’e i muri iho, ’a ani i te mau pīahi ’ia feruri i te mau rāve’a nō te fa’ahope i teie pereota. E nehenehe rātou e ha’amata nā roto i te ’imira’a i roto i Te Parau Ha’api’ira’a ’e te mau Parau Fafau 135:3 i te mau mea tā Iosepha Semita i rave nō te tauturu ia tātou ’ia noa’a te fa’aorara’a. E nehenehe e ani i te mau pīahi ’ia fa’a’ite mai i tō rātou mau mana’o nō ni’a ia Iosepha Semita ’e e aha tā te Fatu i heheu mai nā roto iāna.

• Te tahi atu rāve’a nō te tauturu i te mau pīahi ’ia feruri i te misiōni a Iosepha Semita, ’o te anira’a ïa ia rātou ’ia pāpa’i i te hō’ē parau pohera’a poto ’aore rā, te hō’ē parau fa’ahanahanara’a iāna. E hina’aro paha ’oe e ’āparau i te mau ’ohipa faufa’a i tupu ’aore rā, tei ravehia i roto i tōna orara’a tā rātou e nehenehe e tu’u i roto. E aha tei ’itehia ia rātou i roto i Te Parau Ha’api’ira’a ’e te mau Parau Fafau 135 tā rātou e nehenehe e fa’ahiti ? E aha tā rātou e nehenehe e parau i roto i tā rātou fa’ahanahanara’a nō te tauturu ia vetahi ’ē ’ia ha’apa’ari i tō rātou fa’aro’o i roto i te ’ohipa hanahana a Iosepha Semita ?

• E rave rahi mau parau mau nō ni’a ia Iesu Mesia ’e tāna tāra’ehara tei heheuhia mai nā roto ia Iosepha Semita—e mau parau mau tei tauturu i te fa’aorara’a o te mau tāne ’e te mau vahine ato’a. Nō te tauturu i te mau pīahi ’ia ’ite e aha te tauturu, e nehenehe ’oe e pia i te hō’ē hōho’a nō Iesu Mesia ’e ’ia ani i te tahi mau pīahi ’ia fa’a’ite mai i te hō’ē ’īrava auhia nō ni’a ia Iesu Mesia i roto i te mau pāpa’ira’a mo’a tei heheuhia mai nā roto mai ia Iosepha Semita : te Buka a Moromona, Te Parau Ha’api’ira’a ’e te mau Parau Fafau, ’e te Poe tao’a rahi. Nāhea teie mau pāpa’ira’a mo’a e tauturu ai ia tātou ’ia hāro’aro’a ’e ’ia ha’afātata atu i te Fa’aora ? Nāhea te mau parau mau i roto i teie mau ’īrava i te tauturu i tō tātou fa’aorara’a ?

Te Parau Ha’api’ira’a ’e te mau Parau Fafau 136

E nehenehe tātou e fa’atupu i te hina’aro o te Fatu mai te mea ē, e pe’e tātou i tāna a’ora’a.

• Tē tu’u mai nei te arata’ira’a ha’api’ira’a nō teie hepetoma i roto i te Mai, pe’e mai—nō te ta’ata hō’ē ’e te ’utuāfare i te mana’o ’ia ’imi te mau pīahi i te a’ora’a i roto i Te Parau Ha’api’ira’a ’e te mau Parau Fafau 136 ’o tē nehenehe e tauturu ia rātou ’ia fa’ariro i te hō’ē tāmatara’a ’ei ’ohipa pae vārua. E nehenehe ’oe e ani i te mau pīahi ’ia fa’a’ite mai i te mau a’ora’a ato’a tei ’itehia ia rātou. E nehenehe ato’a ’oe e ani ia rātou ’ia ’imi i roto i teie tuha’a, i te mau a’ora’a ’o tē nehenehe e tauturu ia tātou ’ia rave i te hina’aro o te Fatu i tō tātou nei ’anotau, mai tei tauturu ho’i i te feiā mo’a i roto i tō rātou « mau haerera’a i te tō’o’a o te rā » (’īrava 1).

  

  Winter Quarters, nā Greg Olsen

• E mea ’ārearea paha nō tā ’oe piha ha’api’ira’a ’ia hāmani i te hō’ē hōho’a pia mai tei ’itehia i roto i te mau ve’a a te ’Ēkālesia nō ni’a i te hō’ē o te mau ’īrava i roto i te tuha’a 136. Ma te rave ’āpitipiti ’aore rā, tātā’ihō’ē, e nehenehe te mau melo nō te piha ha’api’ira’a e ha’amata nā roto i te ’imira’a i roto i te mau ’īrava i te hō’ē parau mau tā rātou e feruri ra. I muri iho, e nehenehe rātou e hāmani i te hō’ē hōho’a pia ’o tē fa’a’ite ra ē, nāhea e nehenehe ai i teie parau mau, tei ha’api’ihia i te matahiti 1847, i te tauturu noa ā ia tātou i teie mahana.

Te tahi atu mau rāve’a tauturu

Te mau hīmene nō ni’a i te reira

Te hīmenera’a i teie mau hīmene i muri nei ’aore rā, te māta’ita’ira’a i te mau video, e nehenehe te reira e fa’ahaere mai i te Vārua Maita’i ’aore rā, e fa’auru i te hō’ē ’āparaura’a nō ni’a i te ’ohipa a te peropheta Iosepha Semita ’e te mau fa’atusiara’a a te feiā mo’a tei tāmau i te rave i te ’ohipa i muri mai iāna.

« ’Ua fārerei pinepine ra vau » (Te mau hīmene, n°17). I roto i te fare tāpe’ara’a nō Carthage, ’ua ani ’o Iosepha Semita ia John Taylor ’ia hīmene i teie hīmene.

« ’Auē te ta’ata i parau ia Iehova » (Te mau hīmene, n°16 ; video, www.thetabernaclechoir.org/videos/praise-to-the-man-mormon-tabernacle-choir). ’Ua pāpa’ihia teie hīmene ’ei fa’ahanahanara’a ia Iosepha Semita.

« Haere mai, e te feiā mo’a » (Te mau hīmene, n°18 ; video, www.thetabernaclechoir.org/videos/come-come-ye-saints-mormon-tabernacle-choir).

« Faith in Every Footstep » (video, www.thetabernaclechoir.org/videos/faith-in-every-footstep).

Ha’amaita’ira’a i tā tātou ha’api’ira’a

Fa’a’ite pāpū nō te ha’api’ira’a tumu mau. E nehenehe ’oe e fa’a’ite i tō ’oe ’itera’a pāpū nō ni’a i te mau parau mau nō te ha’api’ira’a tumu i roto i te roara’a o te ha’api’ira’a, ’eiaha rā i te pae hope’a noa. ’Ia nā reira ’oe, e ha’apāpū mai te Vārua Maita’i i te parau mau o te ha’api’ira’a tumu i roto i te ’ā’au o te feiā tā ’oe e ha’api’i ra. (Hi’o Ha’api’ira’a mai tā te Fa’aora, 21.)