“Nobembwa 15–21. Reirei ao Berita aika Tabu 133–134: ‘Katauraoi Ngkami imwain Rokon te Tia Mare te Mwaane,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Nobembwa 15–21. Reirei ao Berita aika Tabu 133–134,” Nakomai, Iriirai—Ibukin te Reirei n Tabati: 2021
E Roko te Tia Mare te Mwaane, iroun Elizabeth Gibbons
Nobembwa 15–21
Reirei ao Berita aika Tabu 133–134
“Katauraoi Ngkami imwain Rokon te Tia Mare te Mwaane”
Tera koaua n Reirei ao Berita aika Tabu 133–34 ae ko namakinna bwa e na rang buoka am kiraati? Iango ma te tataro ibukin kainnanoia ngkai ko kamatebwai n te wiiki aei.
Korei Am Namakin
Kaungaa te Tibwatibwa
Ko kona ni korea te taeka ae ongo iaon te burakibooti ao kaoia kaain te kiraati ni korei irarikina kiibu man Reirei ao Berita aika Tabu 133–34 ake a kakoauaa bwa ti kainnanoia bwa ti na ongo n ara bong. Tuangiia bwa a na tibwauai aia iango iaon kiibu akanne. (Buokiia kaain te kiraati n tarai reirei aika tabu ao tiaki taratara n te waaki n tautaeka.)
Reirei te Reirei
Reirei ao Berita aika Tabu 133:1–19; 37–39
E tangirira te Uea bwa ti na katauraoi Imwain Manga Okina.
-
Ko na kanga ni buoka am kiraati ni mataata bwa bukin tera e kakaawaki katabuaia bwa aonga ni buokiia aomata ni katauraoi imwain Manga Okin te Tia Kamaiu? Ko kona ni kaoia kaain te kiraati ni manga taraa Reirei ao Berita aika Tabu 133:1–19, 37–39 ao ni karaoi uoua karinan: teuana ibukin ana reirei te Uea iaon arora ni katabuira ao teuana ibukin arora ni katauraoa te aonaba imwain okin te Tia Kamaiu. Tera ae nanonaki, n te aro n tamnei, n “kitana … Bwaburon” (kibu 5) ao ni “birinako nako Tion”? (kibu 12). Ibukin rongorongon riki nanon te katabuaki, taraa “Katabuaki”ni Bwai ni Kairi nakon Koroboki aika Tabu (scriptures.ChurchofJesusChrist.org).
Reirei ao Berita aika Tabu 133:19–53
Te Kauaoki e na kakukurei nakoia ake a raoiroi.
-
N aia kamatebwai ni koroboki aika tabu n te mweenga, kaain am kiraati tao a tia ni kunei kibuntaeka aika kakaawaki n te mwakoro aei are e buokiia n ingainga nakon Manga Okin te Tia Kamaiu. Kaungaia bwa a na tibwauai kibuntaeka akanne. Ko kona naba n kaoa te kiraati n ukora kiibu 19–53 ni kakauoman, ni kakaei bukina ngkai ti na ingainga nakon Manga Okin Iesu Kristo. Ngkai kaain te kiraati a tibwauai baike a kunei, kaungaia bwa a na marooroakinna bwa e kanga te Tia Kamaiu ni “kabooira, ao n [uotiia], ao e tabekiia” (kibu 53). Tao aio te tai ae tamaroa n botaki n anenea te anene n taromauri iaon mwaakan te Tia Kamaiu ni kamaiu, n aron “Savior, Redeemer of My Soul” (Anene n Taromauri, nambwa. 112). Tera riki “anenen te kimwareirei ae akea tokina” (kibu 33) ae na buokiira n namakina ana “tangira n akoi [ara] Uea”? (kibu 52).
Reirei ao Berita aika Tabu 134
“Taian tautaeka a bon kateaki iroun te Atua ibukin kabwaian te aomata.”
-
Ni buokiia kaain te kiraati n reirei man Reirei ao Berita aika Tabu 134, ko kona ni karini titiraki n aron aikai n te konteina ke iaon te burakibooti: Tera ae tangiria te Atua n taian tautaeka bwa a na kakabwaiaaki iai Natina? Tera ae ti riai ni karaoia ngkana tuan te aba a kaitara tuan karawa? Tera tabera ao mwiokoara bwa kaain te aba? Kaoia kaain te kiraati n rinea te titiraki ao ni kabongana mwakoro 134 ni karekea te reke. Kaungaia kaain te kiraati n aki marooroakini waaki ma taratara n tautaeka.
-
Te inaomata n “arora n taromauri, ara tabo, ke arora ae [ti] tangiria” (Taekan te Onimaki 1:11) bon te tibwanga ae tangiria te uea ibukiia aomata ni kabane. Ngkana ko namakinna bwa a na kabwaia am kiraati man marooroakinan reirein inaomataia aaro, iangoia botaki ni wareka Reirei ao Berita aika Tabu 134:4, 7, 9. Tera ae a rereiniira kiibu aikai iaon taben te tautaeka ni kamanoan inaomatan te aro? Ti na kanga ni kaungaa inaomatan te aro ibukiia tabeman ao bon i bukira? A kona kaain te kiraati ni karekei nonoori ni kaeka te titiraki anne n “Bwaai ni Ibuobuoki riki Tabeua.”
Bwaai n Ibuobuoki Riki Tabeua
Atiibun Maninganingan Inaomatan te Aro.
E reirei Unimwaane Robert D. Hales:
“Iai aua maninganingan te inaomata n te aro are ngaira Aomata aika Itiaki ti riai n onimakinna ao ni kamanoa.
“Te moan bon te inaomata ni kakoaua. Akea ae riai ni kabuakakaki, bwanikirinaki, ke n ekanakoaki irouia aomata ke taian tautaeka naba, ibukin ane kakoauaa teuanne ke neienne iaon te Atua. …
Te kauoua ni maninganinga n inaomatan te aro bon te inaomata n tibwaua ara onimaki ma ara koaua ma tabeman. … Bwa kaaro, mitinare ae bwanin aia tai, ao mitinare aika membwa, ti onimakina inaomatan te aro bwa ti aonga n anga ana reirei te Uea n ara utu ao ni kabuta te aonaba.
“Te kateniua ni maninganinga n inaomatan te aro bon te inaomata ni katea te botaki n aro, te ekaretia, n taromauri ma te rau ma tabeman. Te katebwi ma teuana n taekan te onimaki e taku, Ti tangira te inaomata n taromauriia te Atua ae moan te mwaaka ni kaineti ma ara iango, ao ni kariaia aomata nako te inaomata anne, bwa a na taromauri ni kangaa, n te tabo raa, ke n te aro te raa.’ …
“Te kaaua ni maninganinga n inaomatan te aro bon te inaomata ni maiuakina ara onimaki—te inaomata ni kammwakura ara onimaki tiaki tii n te mweenga ao n te umwantabu ma n ana tabo te botanaomata naba” (“Preserving Agency, Protecting Religious Freedom,” Ensign ke Riaona, Meei 2015, 112).
Kanakoraoan Ara Anga reirei
Reireia “bukin tera.” “Ngkana [kaain te kiraati] a mataata n ana babaire ae akea tokina Tamara are i Karawa ibukin kukureia Natina, oin bukin reirein te euangkerio ao tuua a kamataataki riki ao te nano ni kan ongeaba e na rikirake” (Reirei n Ana Kawai te Tia Kamaiu, 20).