E anga reirei Iotebwa Timiti i Nauvoo

Iotebwa Timiti i Nauvoo, 1840, iroun Theodore Gorka

Nobembwa 8–14

Reirei ao Berita aika Tabu 129–132

“Ngkana Ti Karekei Kakabwaia Nako mai iroun te Atua, Bon man te Ongeaba”

Ngkai e bon kakawaki bwa e na iai te babaire n te anga reirei, e bon kakawaki naba te ongoraa nakon te Tamnei ao kainnanoia kaain te kiraati. Kakaea mai irouia kaain te kiraati bwa tera te reirei inanon mwakoro 129–32 ae e bongana ibukiia.

Korei Am Namakin

te aikaon ibukin te tibwatibwa

Kaungaa te Tibwatibwa

Ana bae n tia ni reiakin bwaai tabeua kaain te kiraati man kamatebwaian mwakoro 129–32 ake a irekereke ma atuun taian reirei n te euangkerio aika a kakaokoro. N anganiia te tai bwa a na tibwauai baike a reikakin, ko kona ni korei atuun reirei tabeua iaon te burakibooti, n aron anera, te maiu ae akea tokina ma te Atua, ongeaba, aron rikin te Atua, ao te mare ae akea tokina (ko kona naba ni korei tabeua riki iaon te burakibooti ni kaairii atuun reirei riki tabeua). A kona n anaa tabeua te miniti kaain te kiraati ni kakaea te kibu inanon mwakoro aikai are e irekereke nakon teuana atuun te reirei ao korea te kibu anne iaon te burakibooti. Ko kona ngkanne ni warekii kiibu akanne ma kaain te kiraati ao ni maroroakinna bwa tera ae e reirei kiibu nako iaon atuun reirei akanne.

te aikaon ibukin te anga reirei

Reirei te Reirei

Reirei ao Berita aika Tabu 130:2, 18–23; 131:1–4; 132:20–25

Bukin raoi te maiu aio bon katauraoara nakon te maiu ae akea tokina ma te Atua.

• A mwaiti bwaai aika ti aki atai ibukin te maiu ae akea tokina ma te Atua ke te maiu n te abanuea ae te tiretio—ae mwaitiia a bon riaon ara konabwai n ataatai. Ma te Atua e a tia ni kaotii tabeua kanikinaa aika a kakawaki, ao angiia a kuneaki n Reirei ao Berita aika Tabu 130-32. Kaain te kiraati a kona ni kamatebwaia teuana ke ae e mwaiti n taian kibu ake a karinanaki mai ieta ao n tibwai aia nonori ake a kunei iaon te maiu are akea tokina ma te Atua ke te abanuea are tiretio. E na kanga ataakin te rongorongo aio iaon te maiu are akea tokina ni kakabwaiai maiura ngkai?

Reirei ao Berita aika Tabu 130:20–21; 132:5

Kakabwaia a roko man te ongotaeka nakon te Atua.

• Reirei ao Berita aika Tabu 130:20–21 ao 132:5 a reiakin reirei aika titebo. Kaungaia kaain te kiraati bwa a na wareki ni kauoua rongorongo akanne ao n taekinna, ni bon oin mataataia, bwa tera te reirei anne. E kanga te reirei aio n tia ni kaotaki inanon maiura? Ti na kanga ni kunea te kantaninga ao te karaunano iroun Kristo ngkana ti ongotaeka ma kakabwaia ake ti kantaningai a aki roko n te tai ae e waekoa? Ibukin rongorongon te boto ni iango aei, ko kona n uaia n rinanoi nonori n ana rongorongo Unimwaane Dale G. Renlund “E Kabatiaaki ma Taian Kakabwaia” (Ensign ke Riaona, Meei 2019, 70–73).

Reirei ao Berita aika Tabu 131:1–4; 132: 3–25

Tamara are i Karawa e karekea te anga ibukiia utu bwa a na ikotaki n aki toki.

• Tera ae ti na taekinna nakon raraora are e titiraki, “Bukin tera ngkai te mare ao te utu a rangi ni kakawaki inanon ami ekaretia?” A kona ni iangoia kaain te kiraati bwa a na kanga ni kaekaa te titiraki anne ngkai a wareka Reirei ao Berita aika Tabu 131:1–4; 132:3–25, ke n ana taeka Unimwaane Dieter F. Uchtdorf inanon “Bwaai ni Ibuobuoki riki Tabeua.” A kanga koaua aikai n roota aron maiura?

  te mwaane ao te aine i itinanikun te Accra Ghana Tembora

  Te reitaki n te utu e kona n riki n akea tokina rinanon taian otenanti n te tembora.

Reirei Ao Berita aika Tabu 132:1–2, 29–40

Te mare ae e riaon temanna te bu e bon kariaiakaki iroun te Atua tii ngkana e tua bwa e na karaoaki.

• Ngkana iai aia titiraki kaain te kiraati iaon te mare ae e riaon temanna te bu, buokiia bwa a na noria ae Iotebwa Timiti ao tabeman Aika Itiaki ake ngkoa bon iai naba aia titiraki. Kaungaia bwa a na kakaea te titiraki are e uotia Iotebwa nakon te Uea n Reirei ao Berita aika Tabu 132:1 ao te kaeka are e karekea n kiibu 29–40 (taraa naba Iakobwa 2:27, 30). Ni buokiia kaain te kiraati n reiakin kawai are a kona ni kunei kaekaan titiraki nakon aia titiraki n te euangkerio, e na bae ni ibuobuoki ngkana kam uaia n rinanoa “Answering Gospel Questions” n topics.ChurchofjesusChrist.org. Tao a na kona kaain te kiraati n tibwaia bwa a kanga ni kakaea kaekaan te titiraki ibukin te euangkerio ao a kanga n teimatoa n aia onimaki e ngae ngke tabeua aia titiraki a aki reke kaekaaia.

te aikaon ibukin bwaai n ibuobuoki riki tabeua

Bwaai n Ibuobuoki Riki Tabeua

Te utu bon te “babaire mai i karawa.”

E reirei Beretitenti Dieter F. Uchtdorf:

“I kakaitau bwa I kaaina te ekaretia ae e ataa kakawakin te mare ao te utu. Kaain Ana Ekaretia Iesu Kristo ibukiia Aika Itiaki ni Boong aika Kaitira a kinaki ni kabuta te aonaaba ibukin tabeua maare ao utu aika moan te tamaroa aika ko kona ni karekea. I kakoaua bwa e riki aei, bon ti, man te koaua ae kakawaki ae kaokaki rinanon Iotebwa Timiti bwa maare ao utu a kantaningaki bwa a na akea tokiia. E aki nanonaki utu bwa a na kanakoraoi bwaai ikai iaon te aba ao n teweaki nako ngkana ti roko i karawa. Ma, bon te babaire mai i karawa. Bon kanikinaean katein te tiretio ao te katooto n ana utu te Atua ae akea tokina.

Ma te reitaki n te mare ao te utu ae korakora e aki riki tii ibukina ae ngaira kaain te Ekaretia. A tangira te mwakuri ae teimatoa, ao n nako mai inanora. Te reirei iaon te utu ae akea tokina e na riai n anganiira te kairi mai ieta bwa ti na anga ara kabanea ni kekeiaki ni kamaiua ao ni kanakoraoa ara mare ao ara utu” (“In Praise of Those Who Save,” Ensign ke Riaona, May 2016, 77).

Kanakoraoan Ara Anga reirei

Karekea te tabo ae e mano. “Kaungaiia [kaain te kiraati] bwa a na buokiko ni katea te tabo, ae ukinako, ae tangiraki, ao ni karineaki bwa aonga aomata nako n namakina te mano n tibwauai aia taneiai, n aia titiraki, ao aia kakoaua” (Reirei n ana Kawai te Tia Kamaiu,15).