utu ao bakatibu n te aonaba n tamnei

Ngaira ma Ngaiia ao Ngaiia ma Ngaira, iroun Caitlin Connolly

Nobembwa 1–7

Reirei ao Berita aika Tabu 125–128

“Bwanaan te Kukurei ibukiia ake a Maiu ao ake a Mate”

Iangoi taeka aikai mai iroun Unimwaane Ulisses Soares: “Te tia reirei ae nakoraoi bon te banna ae tamaroa. Reiakinan te bwai are ti maiuakinna e kona ni karaoa te bitaki inanoia naake ti reireiniia” (“How Can I Understand?” Ensign ke Riaona, Meei 2019, 7).

Korei Am Namakin

te aikaon ibukin te tibwatibwa

Kaungaa te Tibwatibwa

A kona kaain te kiraati ni korea iaon te burakibooti kibu man Reirei ao Berita aika Tabu 125–28 ake e kaungai nanoia. Kaoia bwa a na tibwauai aia iango iaon kibu n taeka akanne. E kanga kamatebwaian koaua aikai ni kaira aron baike a karaoi n te wiiki aei?

te aikaon ibukin te anga reirei

Reirei te Reirei

Reirei ao Berita aika Tabu 126

“Karaoa te tararua ae e onoti nakon am utu.”

• Te wewete are e karekea Brigham Young ni beku n te Ekaretia e kainnanoa ae ngaia ao ana utu a na karaoa te anga nano ae korakora; a na taeka te Uea nakon Brigham n mwakoro 126 e kona ni kaira te marooro ae kairaki n te tamnei bwa bukin tera te Uea n tabetai e kainanoa te anga nano n te bwai are ti karaoia. E kanga te Uea n tia ni buokiira ni kakoroi nanon tibwangara inanon mweengara, wewete n te Ekaretia, ao inanon nako maiura?

Reirei ao Berita aika Tabu 127:2–4

Ti kona n onimakina te Uea inanon taai aika kangaanga.

• E na kanga Reirei ao Berita aika Tabu 127:2–4 ni buokiia kaain te kiraati ake a namakina anne, n aron Iotebwa Timiti, a uaua inanon te “ran ae e nano”? Ko konaa ni kaoia kaain te kiraati bwa a na wareki kiibu aikai ao n tibwauaia bwa a na kanga ni kakimototoa taekan aron anuan Iotebwa ni kaineti ma kakaewenakoana. Kiibu n taeka raa man kiibu akanne ae e na kona ni buoka temanna ae rinanon te kaangaanga? E kanga Iotebwa ni katuka ana onimaki iaon te Uea n tain kataakina? Ti na kanga ni irii ana banna ni katooto?

Reirei ao Berita aika Tabu 128

Te kamaiuaki irouia ara bakatibu e bon kakawaki nakon kamaiuakira.

• Iangoia bwa ko na kanga ni kaungai nanoia kaain te kiraati bwa a na ira buakon te waaki n te tembora ao te mwakuri n rongorongon te utu. Reirei ao Berita aika Tabu 128:15–18 e kona ni buokiia n namakina te ingainga n nano nakon te mwakuri aei; tao ko na riai ni kaoiia bwa a na ukerii kiibu aikai ibukin bwaai ake e na karikirakei nanoia ni karaoi bwabetito ibukiia aia bakatibu ake a tia ni mate. Titiraki n aron aikai a na kona ni buokiia ni iangoi kiibu aikai: E aera ngkai a aki kona “ni kakororaoaki raoi ngkana aki raonaki iroura”? (kibu 15). E aera ngkai Iotebwa Timiti e atonga ae te bwabetito ibukiia mate bon “te kabanea ni mimitong i buakon bwaai ni kabane ake a irekereke ma te euangkerio ae akea tokina”? (kibu 17; nora naba te marooro inanon “Bwaai ni Ibuobuoki riki Tabeua”). N te aro raa ae te aonaba e na oreaki n te maraia ngkana akea te “reitaki … imarenaia taama ma naati”? (kibu 18). Ngkana kaain te kiraati a kainnanoa buokaia ni karaoan temwakuri ibukin rongorongon te utu, ko kona ni kaoa te tia kairiiri n te tembora ibukin te uoote ao ibukin rongorongon te utu ni kabwarabwara nakoia te FamilySearch.org.

  Ko kona naba ni kaungai nanoia ni kiibu ake a katereterea te kimwaeirei n te mwakuri n te tembora ao mwakuri n rongorongon te utu, n aron Reirei ao Berita 128:19–23. A kona kaain te kiraati ni wareki kiibu aikai ao ni kakaei kibu n taeka ake a kaotia bwa tera ana namakin Iotebwa Timiti iaon kamaiuakiia mate. Ngkanne ko kona n tuangiia bwa a na tibwaua te bwai ae a tia n rinanona ngke a karekea te namakin ae aekakin aio iaon te mwakuri aei. Kaotan te witeo inanon “Bwaai n Ibuobuoki Riki Tabeua” e kona naba n anganiia te unga n nano.

• Ibukina bwa kamaiuaia mate e rangi n okoro n Ana Ekaretia Iesu Kristo ibukiia Aika Itiaki ni Boong aika Kaitira, e na bae n reke ara tai ni kabwarabwaraa te reirei aei nakoia aomata ake a tuai man ongo taekana mai imwaina. A kona kaain te kiraati ni kakaea n Reiei ao Berita aika Tabu 128 baike a na kona n tibwaia n tain aia marooro nakoia tabeman ake a titiraki iaon bwabetitoakiia mate. Tera ae ti reiakinna man te reirei aei iaon Tamara are i Karawa ao Iesu Kristo? Tuangiia kaain te kiraati bwa a na kataneiaia n atonga te bwai ae a riai n taekinna.

  te ataeinimwaane ma taian kaati ae araia kaain te utu iaona

  Karaoan te mwakuri n te tembora ibukiia ara bakatibu e katomai nanora nakoia.

te aikaon ibukin bwaai n ibuobuoki riki tabeua

Bwaai n Ibuobuoki Riki Tabeua

Taian witeo iaon te mwakuri ibukin rongorongon te utu (ChurchofJesusChrist.org).

“I Couldn’t Explain the Feeling”

“If We Put God First”

“Redeeming the Dead Redeemed Me”

“A Visit from Father”

“Connected to Eternal Families”

“Gatherers in the Kingdom”

“Including Me”

“Is Anything Too Hard for the Lord?”

“A Glorious and Wonderful Provision.”

E taku Beretitenti Gordon B. Hinckley:

“Ana Mwakuri ni Kamaiu Iesu ibukiia ni kabane aomata e kaota te anga karea ae korakora ibukiia aomata ni kabane. E katea te baeten are e a riki Ngaia bwa te tia tei ibukiia aomata ni kabane. Te baeten aei are e riki temanna te aomata bwa e na kona n tei ibukin temanna e reitinako karaoana n taian otenanti n ana auti te Uea. Ikai are ti beku ibukiia tekoraki ake a tia ni mate n akea ataakin te euangkerio. E a bon nakoia bwa a butimwaea ke n totokoa te otenanti are e a tia ni karaoaki. E bon karekeaki naba nakoia bwa a na titebo aroia ma tekoraki ake a maiu iaon te aba. Tekoraki ake a mate a anganaki aia tai n aroia naake a maiu. Ao riki, bon te kakukurei ao te buoka ae tamaroa are e a tia ni karaoia te Atua ae Mwaaka rinanon Ana Burabeti” (“The Great Things Which God Has Revealed,” Ensign ke Riaona, Meei 2005, 82–83).

Kanakoraoan Ara Anga reirei

Tataro ibukiia kaain am kiraati. Tataro n atongii araia naake ko reireiniia, ao ukoria n ataa kainnanoia ae e onoti. Ngkai ko karaoia, Tamam are i Karawa e na buokiko n ataia bwa tera ae ko na reirei iaona bwa ko aonga ni buokii kainnano akanne. (Taraa Reirei n Ana Kawai te Tia Kamaiu,6.)