“Okitobwa 25–31. Reirei ao Berita aika Tabu 124: ‘Te Auti nakon Arau,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Okitobwa 25–31. Reirei ao Berita aika Tabu 124,” Nakomai, Iriirai—Ibukin te Reirei n Tabati: 2021
Nauvoo te Tikiraoi, iroun Larry Winborg
Okitobwa 25–31
Reirei ao Berita aika Tabu 124
“Te Auti nakon Arau”
Bwa e aonga te Tamnei n uoti reirei nakon ara ururing ngkai ti anga reirei (tara Ioane 14:26), ti riai moa n botumwaaka ni kamatebwai ao n iangoi reirei akanne.
Korei Am Namakin
Kaunga te Tibwatibwa
Iangoia ni kaoia kaain te kiraati n tibwaua te bwai teuana are a kunea n Reirei ao Berita aika Tabu 124 ae bitiia nakon iangoan reirein te euangkerio n te kawai ae boou. Tera ae a warekia—ibon irouia ke n te utu—ae ngaia ae bita aroia n namakin, iango, ke ni maiu?
Reirei te Reirei
Reirei ao Berita aika Tabu 124:15, 20
E kukurei te Uea n te itiaki.
-
N mwakoro 124, te Uea e kamoamoaia Hyrum Smith ao Gerge Miller ibukin raoiroin nanoia. Ni buokiia kaain te kiraati ni kamatebwaia riki te anua aei, ko kona ni kaoia ni wareka Reirei ao Berita aika Tabu 124:15, 20 ao n iangoi baike a reiakin ibukin raoiroin te nano man kiibu aikai. Tera riki ae ti reiakinna man koroboki aika tabu ake akarinanaki iaan “raoiraoin te nano” n Bwai ni Kairi nakon Koroboki aika Tabu (scriptures.ChurchofJesusChrist.org) ke man ana marooro Unimwaane Richard J. Maynes “Earning the Trust of the Lord and Your Family”? (Ensign ke Riaona, Nobembwa 2017, 75–77). Tao a kona kaain te kiraati n tibwauai aia katooto aomata ake a kinaia ake a raoiroi nanoia. Bukin tera te raoiroi n nano te katei ae kakaawaki?
Reirei ao Berita aika Tabu 124:22–24, 60–61
Te Uea e tangirira bwa ti na butimwaeia ao ni kariaia tabeman.
-
Kaain am kiraati a kona n reiakina te bwai teuana man ana kabwarabwara te Uea n Autin Nauvoo are a kona ni buokiia n aia reitaki ma aomata ake tiaki Aika Itiaki ni Boong aika Kaitira ke ake a tia ni bweenako man te Ekaretia. Ko kona ni korea te auti iaon te burakibooti ao kaoia kaain te kiraati n ukora Reirei ao Berita aika Tabu 124:22–24, 60–61 ibukin taeka ake e kabonganai te Uea ni kabwarabwara oin bukin Autin Nauvoo. A kona ngkanne ni korei taeka ni katobibia te auti. A kanga taeka aikai ni kaineti naba nakon ana Ekaretia Iesu Kristo? Tera ae ti kona ni karaoia ni karekea te katei ni butimwaei aio n ara uoote ao ni mweengara?
Reirei ao Berita aika Tabu 124:25–45, 55
E tua nakoira te Uea bwa ti na katei tembora bwa ti aonga ni karekei otenanti aika tabu.
-
Tao a kona kaain te kiraati ni katamneia ae a maeka i Nauvoo n 1841 ao n mwakuriia te Nauvoo Tembora ngke e titiraki raoraoia, “Bukin tera kam teimatoa ni katei tembora?” Tera ae ti na taekinna nakon te rao aei? A kona kaain te kiraati ni kakaei iango n Reirei ao Berita aika Tabu 124:28–30, 37–42, 55. Ngkana tabeman kaain te kiraati a aki atai otenanti ake a mwaneweaki n kiibu aikai, iangoa kabwarabwaran oin bukin ao kakabwaia n otenanti akanne. Taraa temples.ChurchofJesusChrist.org ibukin te kairi bwa tera ae tau ni marooroakinaki i tinanikun te tembora ao ibukin tamnein tembora ake ko kona ni kaoti n te kiraati.
TamneiIotebwa Timiti ma mwaane a katea te Nauvoo TemboraIotebwa Timiti n te Nauvoo Tembora, iroun Gary E. Smith
Reirei ao Berita aika Tabu 124:45–55
Te Uea e na kakabwaiaia naake a kabanea korakoraia n tou mwin Ana tua.
-
Aomata aika Itiaki a tia n tuangaki bwa a na katea te tembora i Jackson County ma a “totokoaki irouia aia kairiribai” (Reirei ao Berita aika Tabu 124:51). Ni kiibu 49–55, ike te Uea e buoka te kangaanga aei, e na iai te rongorongo ae kaunganano nakoia aomata ake a kan tou mwin ana tua te Atua ma a totokoaki man karaoan anne ibukin te utu ke bwaai riki tabeua. Ko kona ni wareki kiibu aikai ma kaain te kiraati ao tuangiia bwa a na iangoi taai ike aomata a aki kona ni kakoroa nanon nanoia aika raoiroi ibukin bwaai aika akea aia kona iaoia. Tera te reirei ae ti kunea ni kiibu aikai ake a kona ni buoka temanna ae mena inanon aei? Tera ae reirei nakoira kiibu aikai iaon te ongotaeka?
Reirei ao Berita aika Tabu 124:91–92
E kona te Uea ni kairiira rinanon ara kakabwaia n tamanuea.
-
A na kabwaia kaain te kiraati man marooroakinaia tamanuea ao kakabwaia n tamanuea? Ko kona ni waaki man kaoaia kaain te kiraati ni wareka Reirei ao Berita aika Tabu 124:91–92, ni kakaea bwa tera are e weteaki bwa e na karaoia Hyrum Smith. Ngkanne ko kona ni korei iaon te burakibooti Tera ao Bukin tera ao kaoia kaain te kiraati ni wareka “Kakabwaia n Tamanuea” (Koaua nakon te Onimaki, 111–13) ni ukoria bwa tera ana kakabwaia te tamanuea ao bukin tera a kakaawaki. E na kanga ni katauraoi te aomata ni karekea ana kakabwaia te tamanuea? Iangoa kaoakiia tabeman aomata ake a tia n reke aia kakabwaia n tamanuea n tibwauaia bwa bukin tera a kakaitau iai. (Kauringiia bwa a na aki tibwaua te bwai teuana ae rang onoti ke n tabu man aia kakabwaia.) Ti na kanga ni kaoti ae e kakaawaki iroura ara kakabwaia n tamanuea?
Kanakoraoan Ara Anga reirei
Tataro ibukiia kaain am kiraati. Tataro n atongi araia aomata ake ko reireiniia. Ko kona n tataro ni mataata ni kainnanoia ao n ataia bwa tera ae ko na anga bwa ko aonga n tobwai kainnano akanne. Ko kona naba ni butiia Tamara are i Karawa bwa e na “katauraoi nanoia” (Aramwa 16:16) ni butimwaei koaua ake ko na anga. (Taraa Reirei n Ana Kawai te Tia Kamaiu, 6.)