“Okitobwa 18–24. Reirei ao Berita aika Tabu 121–123: ‘O te Atua, Ko Mena Iaa?’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Okitobwa 18–24. Reirei ao Berita aika Tabu 121–123,” Nakomai, Iriirai—Ibukin te Reirei n Tabati: 2021
Karabuti ae Liberty n te Tiburing, iroun Al Rounds
Okitobwa 18–24
Reirei ao Berita aika Tabu 121–123
“O te Atua, Ko Mena Iaa?”
Te kawai ae rianako raoiroina n reireinia aomata n wareki koroboki aika tabu, iangoia aomata ake ko reireinia, ao ira te Tamnei. Mwakuri ni kauring n te kabwarabwara aei e kona n riki bwa raon te kaotioti are ko karekea.
Korei Am Namakin
Kaungaa te Tibwatibwa
Kaoia kaain te kiraati n rinea teuana te rongorongo man Reirei ao Berita aika Tabu 121–23 are a tangiria n tibwauaia ma temanna ae maraki. Angania te tai bwa a na kabwarabwara aia rinerine.
Reirei te Reirei
Reirei ao Berita aika Tabu 121:1–33; 122
Ngkana ti teimatoa n rinanon kataakira ma te raoiroi, te Atua e na karietataira i eta.
-
Tao e na iai kaain am kiraati ae, ibukin kataakina ae matoa, iai ana namakin ae titebo ma are e kaotia Iotebwa Timiti n Reirei ao Berita aika Tabu 121:1–6. Imwin botakimi ni wareki kiibu aikai, ko kona ni kaoiia kaain te kiraati ni kinai ao n tibwauai reirei n kiibu 7–33 are angania te kantaninga ma te raunano inanon kataakia. Tera ae nanonaki n te “teimatoa n rinanona … n te aro ae raoiroi”? (kibu 8). E kanga te Tia Kamaiu ni buokiira n rinanona ma te aro ae raoiroi? Ti na kanaga ni buokiira imarenara n teimatoa n rinanona n te aro ae raoiroi?
-
Ni buokiia kaain te kiraati n iangoia bwa a kanga kakatai n “[anganira] te atatai” ao “riki bwa [ara] kabwaia ” (Reirei ao Berita aika Tabu 122:7), ko kona n anganiia mwakoro ni beba ao tuangiia bwa a na korea kakatai ake a tia n rinanoi. N iteran te beba are teuana, kaain te kiraati a kona ni korei taeka aika “atatai” ao “kabwaia.” Ngkai kam botaki ni marooroakina Reirei ao Berita aika Tabu 122, kaungaia kaain te kiraati ni korei aia iango iaon “iterana are teuana” ibukin kataakia: te “atatai” ke “kabwaia” are a karekea. Tabeman kaain te kiraati a kona ni mwengaraoi n tibwauai bitakin kataakia nakon kakabwaiakiia. Ke a kona ni wareka are rinanona Unimwaane Koichi Aoyagi n “Hold on Thy Way” (Ensign ke Riaona, Nobembwa. 2015, 126–28).
Reirei ao Berita aika Tabu 121:34–46
Ti riai n raoiroi ni karekea “mwaakan karawa.”
-
E kona ni kakaongora noran kaokorona bwa e kanga te “mwaaka ke te korakora” ni kateimatoaki n te aonaba ma ana reirei te Uea bwa e na kanga ni kateimatoaki te mwaaka ma te korakora (tara mwakoro 121). N buoka te marooro aei, ko kona ni karaoa te taibora ae uoua iai te rinan ma atuuia aika Mwaakan te Aonaba ao Mwakaan Karawa. A kona kaain te kiraati ni kanoaa te taibora ma taeka ao kibuntaeka man Reirei ao Berita aika Tabu 121:34–46. A kanga kiibu aikai ni bita aron taraan katabeara n ara utu, bwa te tari ke te aine ni ibuobuoki, ke n aanga riki tabeua ike ti kantaningaia bwa ti na rootia aomata n ae raoiroi?
-
Teuana te kawai n marooroakina te reirei aei ao kakabwaia aika tamaroa n Reirei ao Berita aika Tabu 121:45–46 bon kamaenakoan te kiraati nakon kurubu ao tuangiia kurubu nako n kamatebwai ao n marooroakini kibuntaeka man kiibu aikai, n aron “ke teimatoa ni kaona am iango te itiaki” ke “n aron ranin te aoi mai karawa.” A kona n tarai nanon taeka akanne, n wareki koroboki aika tabu are a irekereke n bwaai aika a na taraaki i nano, ao n marooroakinna bwa tera irouia nanon kibuntaeka akanne. Tabeua kurubu tao a kan korei tamnei ni kabwarabwara aia kibuntaeka. Angania kurubu nako bwa a na tibwauai baike a reiakin ma te kiraati.
Reirei ao Berita aika Tabu 122:8–9
Iesu Kristo e rinanon bwaai ni kabane ao e kakorakoraira ni kataakira.
-
N ataakina bwa Iesu Kristo e “rinanon … bwaai ni [kabane]” e kona n angania kaain te kiraati te onimaki n rairaki nakoi Ina. Kiibu aika a raka aikai a kona n ibuobuoki ni kabwaranakoa nanon te kibuntaeka aei: Itaia 53:3–4; I-Ebera 2:17–18; 1 Nibwaai 11:16–33; Aramwa 7:11–13. A kona kaain te kiraati ni wareki kiibu aikai, n reitaki ma Reirei ao Berita aika Tabu 122:8, ni tarai baike a karikirakea te onimaki bwa e kona Iesu Kristo ni buokiia ni kataakiia. A kona naba n kunea te kaunganano n anene n taromauri ibukin te Tia Kamaiu, n aron “Where Can I Turn for Peace?” (Anene n Taromauri, nambwa. 129).
-
Kibuntaeka ake n “Bwaai n Ibuobuoki Riki Tabeua” e anga te noonori riki tabeua bwa e kanga te Tia Kamaiu n rinanon bwaai ni kabane. Ko kona n iangoa te kawai are ko na kaota iai te aro n “mena iaan” te bwai ae tinebu “n raoiroi teim ni kaitara ma [ngaia].” E kanga ataakin are te Tia Kamaiu e rinanon bwaai ni kabane n buokiira ni kataakira?
TamneiIesu i aontano i KetetemwaneIesu e oota ni marakira. Tiaki Nanou, Ma Nanom, iroun Walter Rane.
Bwaai n Ibuobuoki Riki Tabeua
Kristo e rinanon bwaai ni kabane.
E reirei Beretitenti Dallin H. Oaks: Iai aomata aika mirion mwaitiia aika a mamaaka-te Atua ake a tataro nakon te Atua bwa a na kabebeteaki man karawawatakiia. E a tia ara Tia Kamaiu ni kaotia bwa E “rinanon bwaai ni kabane” (R&B 88:6). N aron are e reirei Unimwaane Neal A. Maxwell, “N ‘rinanon bwaai ni kabane,’ E ataia, n ae kororaoi ao ae onoti, abwabwakin korakaia aomata.[Ensign, Nobembwa. 1997, 23]. Ti kona naba n taekinna bwa imwin rinanoan bwaai ni kabane, E tauraoi raoi n tabekira rake ao n anganira te korakora ae ti kainnanoia ni keiakin korakaira” (“Strengthened by the Atonement of Jesus Christ,” Ensign ke Riaona, Nobembwa. 2015, 64).
Kanakoraoan Ara Anga Reire
Weteam e kairaki iroun te Tamnei. Ngkai te tia reirei ngkoe, ko a tia ni weteaki iroun te Uea ni kakabwaiaia Natina. E tangiriko bwa ko na tokanikai, ngaia are ngkai ko katauko ibukin Ana ibuobuoki, E na anganiko te kaotioti are ko kainnanoia (taraa Reirei n Ana Kawai te Tia Kamaiu, 5).