“Okitobwa 4–10. Reirei ao Berita aika Tabu 111–114: ‘N na Bairei Bwaai ni Kabane ibukin Kabwaiami,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Okitobwa 4–10. Reirei ao Berita aika Tabu 111–114,” Nakomai, Iriirai—Ibukin te Reirei n Tabati: 2021
Okitobwa 4–10
Reirei ao Berita aika Tabu 111–114
“N na Bairei Bwaai ni Kabane ibukin Kabwaiami”
Ngkai kam wareka Reirei ao Berita aika Tabu 111–14, iangoi koaua n tamnei are te Uea e tangiria kaain am kiraati bwa a na mataata iai. Te Tamnei ae Raoiroi e na ibuobuoki ni kairiko n ataia bwa tera reirei aika ko na katurui am iango iaona.
Korei Am Namakin
Kaungaa te Tibwatibwa
Iangoa korea te bwaoki ni kaubwai iaon te burakibooti. A kona kaain te kiraati ni korei iaon te burakibooti kiibu man mwakoro 111–14 ike a kunea iai te bwai are a taraia bwa “te kaubwai ae mwaiti” (Reirei ao Berita aika Tabu 111:2). Tuangiia tabeman kaain te kiraati bwa a na tibwauai baike a kunei kakaawakiia ni kiibu akanne.
Reirei te Reirei
Reirei ao Berita aika Tabu 111
Te Uea e kona ni “bairei bwaai nako ibukin [ara] kabwaia.”
-
Ana reirei te Uea n Reirei ao Berita aika Tabu 111 e kona ni buokiia kaain am kiraati ngkana a raraoma ibukin tabeianga n rabwata ao n tamnei, n aron are e buoka Iotebwa Timiti ma ana raraoma ibukin Tion. Ko kona ni moana te marooro n te mwakoro aei man kaoan temanna kaain te kiraati ni korei iaon te burakibooti bwaai ake a raraoma iai Ngaia ke tabeman. Ngkanne, ma tabeaianga akanne n te iango, a kona n ukora mwakoro 111 ibukin te reirei ao te karaunano are e anga te Uea ni buokiira. A kona kaain te kiraati n tibwauaia bwa e kanga te Tia Kamaiu n buokiia ngkana a katuka aia onimaki Irouna.
-
Kaain am kiraati tao iai aia atatai n aron Iotebwa—ngke a namakinna iai bwa e butimwaeiia te Uea n aki tabe ma “aia mwakuri aika nanobaba” (Reirei ao Berita aika Tabu 111:1). A kanga aia atatai aikai n kaota bannan koaua ake n Reirei ao Berita aika Tabu 111? N aron te katooto, ningai ae a namakinna bwa te Uea e “[barongai] bwaai ni kabane ibukin [aia] kakabwaia”? (kibu 11). Tera ae a reirei atatai aikai nakoia ibukin te Tia Kamaiu ao boni Ngaiia?
Reirei ao Berita aika Tabu 112:3–15, 22
Te Uea e na kairiia naake a ukora Nanona ma te nanorinano.
-
Ni buokiia kaain te kiraati n maroorokina are reirei mwakoro 112 iaon te nanorinano, iangoa kamaenakoaia nakon teniua kurubu. Angania kurubu nako teuana man titiraki aikai n iango ngkai a rinanoa kiibu 3–15 ao 22: Tera te nanorinano? Ti na kanga n nanorinano riki? Te kakabwaia are a beritanaki nakoia ake a nanorinano? Angania kaain te kiraati te tai n tibwauai aia reke. Kurubu akanne a kona ni kareka te atatai riki tabeua man warekan ana taeka Unimwaane Quentin L. Cook n “Bwaai ni Ibuobuoki riki Tabeua” ke te mwakoro ae atuuna “Nanorinano” n Taetaekina Au Euangkerio (iteraniba 126–27). Bukin tera e kakaawaki te nanorinao ni karaoan ana mwakuri te Uea?
Reirei ao Berita aika Tabu 112:12–26
Naake a rairaki ni koaua a na kinaa Iesu Kristo.
-
Te rongorongo ae koaua are tabeman Abotoro n 1837 a kaitaraa te Burabeti bon te kauring ae raoiroi bwa tao tera te nakoa are iroura ke mwaitira ae ti ataia n te euangkerio, ti riai n taraia raoi ibon iroura bwa ti bon rairaki ni koaua. Wareka te kaetieti are e anga te Uea nakon Thomas B. Marsh ni buokia n katiteuanaa te Kooram n te Tengaun ma Uoman e kona n angan am kiraati te noonori bwa tera nanon te rairaki. Tao kaain te kiraati a kona ni wareka Reirei ao Berita aika Tabu 112:12–26 ma temanna kaain aia utu ke raoraoia n aia iango—temanna ae mwaeiei n ana onimaki. Tera koaua ni kiibu aikai ae a na kabwarabwarai kaain te kiraati nakon te aomataa anne ni karekea te rairaki ni koaua? Angania kaain te kiraati te tai n iangoia bwa tera ae a kona ni karaoia ni kakorakora oin rairakiia nakon te Uea.
Bwaai n Ibuobuoki Riki Tabeua
Te anua ae ai aron Kristo ae te nanorinano.
E reirei Unimwaane Quentin L. Cook:
“Te kaangaanga, n ara bong ao e kuri n reke ae ni mwakoro nako n te aonaaba, ti noora karietatan temanna ao te kainikatonga ni kaoti ao te nanorinano ao te bukintaeka nakon te Atua a aki rang kabonganaaki. Mwaitiia te botanaomata aki atai koaua aika uarereke ao aki ota bwa bukin tera ti roko iaon te aba. Te nanorinano ni koaua, are e kakaawaki ni karekean ana kantaninga te Uea ibukira, e kuri aki kakaoti.
“E rang kakaawaki bwa ti na ata abwabwakin ana nanorinano Kristo, raoiroina, kateina, ao wanawanana are e kaotaki ni koroboki aika tabu. E aki wanawana bwa ko na tarariaoi kakaawakin te reitinako ni maiuakin anuan Kristo ma kateina aikai n te bong koraki, riki te nanorinano. …
“N Turai 23, 1837, te Burabeti Iotebwa e kaitibo ma Unimwaane Thomas B. Marsh, te Beretitenti n te Kooram n te Tengaun ma Uoman. Unimwaane Marsh e rang un ngkai te Burabeti e a tia ni weteia riki uoman kain ana Kooram bwa a na nako Engiran n aki reitaki nakoina. Ngke e kaitibo ma Iotebwa Unimwaane Marsh, e katinanikui namakin akanne, ao te Burabeti e karekei kaotioti aika tamaroa. Ngkai ai te ka 112 ni mwakoro n Reirei ao Berita aika Tabu. E anga kairiiri aika tamaroa mai karawa ni kaineti ma te nanorinano ao te mwakuri ni mitinare. Kibu 10 e taku, ‘Ko na nanorinao; ao te Uea ae Atuam e na kairiko ni baina, ao n anganiko kaekaan am tataro’ [Reirei ao Berita aika Tabu 112:10; iai te karinrin]” (“The Eternal Everyday,” Ensign ke Riaona, Nobembwa. 2017, 51–52).
Kanakoraoan Ara Anga reirei
Taben nanoia aomata. “Are ko karaoia nakoia aomata e kakawaki riki nakon te bwai are ko reireiniia. N tabetai tabetabera n te anga reirei e kona n totokoira man kaotakin ara tangira ibukiia koraki ake ti reireiniia. … Iangoia bwa ko na kangaa ni katurua am iango iaon bwaai ake a rangi ni kakaawaki riki” (Reirei n Ana Kawai te Tia Kamaiu, 6).