Okitobwa 11–17. Reirei ao Berita aika Tabu 115–120: ‘Ana Karea e na Rang Tabu riki Nakoiu nakon Rikirakena,’” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
Okitobwa 11–17. Reirei ao Berita aika Tabu 115–120,” Nakomai, Iriirai—Ibukin te Reirei n Tabati: 2021
Far West, iroun Al Rounds
Okitobwa 11–17
Reirei ao Berita aika Tabu 115–120
“Ana Karea e na Rang Tabu Riki Nakoiu nakon Rikirakena”
N am tai ni katauraoi n anga reirei, uringnga bwa te boto ni iango bon buokaia tabeman ni karekea aia onimaki iroun Iesu Kristo.
Korei Am Namakin
Kaungaa te Tibwatibwa
Imwain ae ko marooro iaon te reirei man mwakoro 115–20 n ake a bongana iroum, tuangiia kaain te kiraati bwa a na tibwaia bwa tera naba ae e bongana nakoia. N aron te katooto, ko kona ni kaoiia kaain te kiraati bwa a na kabwanina korean te taeka: “I kukurei bwa I wareka mwakoro 115–20 ibukina bwa …”
Reirei te Reirei
Reirei ao Berita aika Tabu 115:4–6
Ana Ekaretia Iesu Kristo ibukiia Aika Itiaki ni Boong aika Kaitira bon te otanga ao te tabo ni kamanomano.
-
A kona kaain te kiraati ni kakaea n ana rongorongo Beretitenti Russell M. Nelson “Aran te Ekaretia ae Eti” (Ensign ke Riaona, Nobembwa 2018, 87–90) n taian iango ake e na buokiia ni mataata raoi kiibu 4–6. E aera ngkai e kakawaki kabonganaan aran te Ekaretia ae Eti?
-
Imwiin te ikotaki ni wareka Reirei ao Berita aika Tabu 115: 4–6, a kona ni marooro kaain te kiraati bwa e kanga te Ekaretia ao membwa n riki bwa ai aron te oota ke banna ni kakairi. Ko kona ni kaota tamnein te auti ae kaota te oota n tain te angibuaka ao titirakiniia kaain te kiraati bwa e kanga ni irekereke nakon te rongorongo are ni kiibu 5–6. E kanga te ikotaki nako “Tion, ao … ana titeiki” n anganiko “te kamanomano man te angibuaka”? (kibu 6).
Tamneite auti ni kaotaTi kona n anga ootara ni buokiia tabeman ni kunea te tabo ni kamanomano inanon te Ekaretia.
Reirei ao Berita aika Tabu 117
Ara anga nano a bon tabu iroun te Uea.
-
Kaoiia kaain te kiraati bwa a na katamneia ae aongkoa ngaiia Newel K. Whitney ke kainnabana, Elizabeth, ae iai aia titoa ae bubura i Kirtland ma a tuangaki iroun te Uea bwa a na katikui aia bwai ao ni mwaing nako Missouri. A kona ngkanne ni wareka kiibu 1–11 ao n tibwa te bwai are e taekinna te Uea are e na buokiia ni karaoa te anga nano aei.
-
Bwaai n anga reirei ake a kona n noraki e na kona ni buokiia kaain te kiraati ni iangoa are “tii te timna” are n tabetai ti mataiakina riki nakon “bwaai ake a rang kakawaki” (kibu 8). Iangoia ni kaotii bwaai n aron timtimin te ran ao te bwatoro n ran ke te amwarake te tiaokureti ao te kanre te tiaokureti. Tao a kona n iangoi tabeua riki katooto kaain te kiraati. Ko kona naba ni korea tii te timna ao bwaai aika kakawaki riki iaon te burakibooti ao titirakiniia kaain te kiraati bwa a na karinanii katotoon bwaai ake a “riai … n nako” (kibu 5) bwa ti aonga ni karekei “uaa aika mwaiti” (kibu 7).
-
Ngkana kaain te kiraati a karekei namakin n aia tai ni wareka ana taeka te Uea iaon Oliver Granger inanon kiibu 12–15, kaoiia bwa a na tibwaia. Bukin tera ara anga karea e rang tabu riki iroun te Uea nakon rikirakera?
Reirei ao Berita aika Tabu 119–20
Man kabwakaan ara kabwianibwai, ti buoka katean ao “katabuan aban Tion.”
-
Iangoa korakoran te tamnei are e na kona n roko mai irouia kaain te kiraati ngkai a tibwaa imarenaia te kakabwaia are a karekea man aia ongeaba nakon tuan te kabwianibwai. A kona naba ni wareka Reirei ao Beirta aika Tabu 119:6 ao ni marooro bwa e kanga te tua aei ni “katabua aban Tion” ao ni karika ara uoote ke mwaanga bwa “aban Tion [nakoira].” A konaa naba ni wareka Maraki 3:8–12 ni katebenakoi kakabwaia ake e beritanii te Uea man kabwakakin te kabwianibwai.
-
Ngkana iai aia titiraki kaain te kiraati bwa e kanga ni kabonganaki te kabwianibwai, ko kona ni kaoiia bwa a na wareka mwakoro 120 ao kabwarabwaraana inanon “Bwaai ni Ibuobuoki riki Tabeua.” (Unimwane David A. Bednar e anga naba te kabwarabwara ni buoka aei n “The Windows of Heaven” [Ensign ke Riaona, Nobembwa 2013, 19–20].) Ti na kanga ni buokiia tabeman ni karikirakea aia onimaki n Ana tua te Uea iaon te kabwianibwai?
Bwaai n Ibuobuoki Riki Tabeua
Te Bootaki ni Kauntira Ibukin Kabonganaakin te Kabwianibwai.
E taku Unimwaane Robert D. Hales:
“N aron are e kaokia te Uea, kabonganaakin te Kabwianibwai e rinanoaki man te bootaki ni kauntira ae e kairaki n te Moan Beretitentii, te Kooram n Abotoro n te Tengaun ma Uoman, ao te Bitiobiriki n Tararua. E kamatoa n taekinna te Uea bwa a na mwakuri te bootaki ni kauntira e kairaki ‘man oin bwanaau nakoia’ [Reirei ao Berita aika Tabu 120:1]. Te kauntira aei e aranaki bwa te Bootaki ni Kauntira Ibukin Kamanenaan te Kabwianibwai.
“E rangi ni kamiimi aron kakoauaan iran bwanaan te Uea n te kauntira aio. Kaaina ni kabane a bane n ataa ao n ira buakon babaire nikabane n te kauntira aei. Akea te moti ae e karaoaki ni karokoa a bane ni booraoi nanoia kaain te kauntira. A bane ni kabonganaaki mwaane man te kabwianibwai ibukin ana kantaninga te Ekaretia, ni ikotaki ma te warebea—tararuakiia ake akea aia bwai ao ni kainano—tembora, kateitei ao onobwai nakon auti ni bootaki, te reirei, karikiram—ni kauarerekeana, ana mwakuri te Uea. …
“… I kaota au koaua ibukin te Bootaki ni Kauntira Ibukin Kabonganaan te Kabwianibwai. I a tia ni kaaina te kauntira aei inanon 17 te ririki, ngke kaain te Bitiaoburiki n Tararua n te Ekaretia ao ngkai ngkai kaain te Kooram n Abotoro. N akea riki bukina teuana, mwanen te kabwianibwai n te Ekaretia e a tia ni kabonganaaki ibukin Ana kantanginga” (“Tithing: A Test of Faith with Eternal Blessings,” Ensign ke Riaona, Nobembwa 2002, 28).
Kanakoraoan Ara Anga reirei
Kaoiia taan reiakinaki n reireiia tabeman. “E na raoiroi ngkana a kaoaki taan kamatebwai bwa a na buokiia imarenaia ni kakaei kaekaan titiraki. Man ana kairi te Tamnei, ko kona ni iangoia ni karaoa aei e ngae ngkana ko ataa te kaeka” (Reirei n ana Kawai te Tia Kamaiu., 24).