Tebetembwa 27–Okitobwa 3. Reirei ao Berita Aika Tabu 109–110: ‘Aio Am Auti, Am Tabo ae Mimitong,’” Nakomai, Iriirai—Ibukin te Reirei n Tabati: Reirei ao Berita Aika Tabu 2021 (2020)
Tebetembwa 27–Okitobwa 3. Reirei ao Berita aika Tabu 109–110,” Nakomai, Iriirai—Ibukin te Reirei n Tabati: 2021
Kirtland Tembora, iroun Jon McNaughton
Tebetembwa 27–Okitobwa 3
Reirei ao Berita aika Tabu 109–110
“Aio Am Auti, Am Tabo ae Mimitong”
Mwakoro 109 ao 110 a kabwarabwarai tabeua bwaai aika moan te kakawaki ae a riki n tain Kaokan Bwaai. Kakoauaa bwa kaain te kiraati a tibwaia bwa tera aia iango ao namakin ngkai a kamatebwaia kanoan bwaai aika a riki n te tai aei.
Korei Am Namakin
Kaungaa te Tibwatibwa
E taku te Uea bwa “taekan te auti aei [te Kirtland Tembora] e na butanako nakon aaba aika ianena” (Reirei ao Berita aika Tabu 110:10). Ko kona ni kaoia kaain te kiraati bwa a na tibwaua te bwai teuana ae a reiakinna n aia kamatebwai are a namakinna bwa e riai n taekinaki nakoia aomata ni katobibia te aonaba.
Reirei te Reirei
Reirei ao Berita aika Tabu 109; 110:1–10
Te Uea e tangiria ni kakabwaiaira inanon Ana auti ae tabu.
-
Kamatebwaian mwakoro 109 bon te tai ae e tamaroa ni buokiia kaain te kiraati ni kakorakora nanoia ni kan nebonebo inanon te tembora. Ko kona ni korei iaon te burakibooti nambwan taian kibu ake a taekini kakabwaia n te tembora—n aron kiibu 12–13, 22–23, 24–28, 29–32. Kaain te kiraati a kona n rinei kiibu ake a na wareki ao ni iangoi, ibon irouia ke n te kurubu, ao ngkanne a na taekina ni kakimototoa ibukiia kaain te kiraati taian kakabwaia akana kabwarabwaraaki ni kiibu akanne. Naake a tia n nako n te tembora a kona n tibwaia bwa tera aia taneiai ae e reke n taian kakabwaia aikai inanon maiuia.
Ko kona naba ni wareka ke ni botaki n anenea “Tamnein te Atua” (Anene n Taromauri, nambwa 2), are e aneneaki n tain katabuan te Kirtland Tembora. Kaain te kiraati a kona ni katebenakoi kakabwaia n te tembora ake a kabwarabwaraaki inanon te kuna ao n tibwa te taneiai are e kaineti ma aei are a tia n rinanona ngkana e riai.
-
Karekean kakabwaia n te tembora e kainnanoa te anganano n taainako. Tera ae ti reireinaki n Reirei ao Berita aika Tabu 109:5 iaon aia anganano Aika Itiaki ake rimoa are a karaoia ni katea te Kirtland Tembora? Tao e na iai temanna ae e na roko n tauraoi ni marooro iaon anganano aikai (taraa “A House for Our God,” Revelation in Contest, 169–71). Tera te anganano ae ti karaoi ngkai bwa ti aonga ni karekei kakabwaia n te tembora? A na bae n tangiria kaain te kiraati ni kan tibwaua aia taneiai. Tabeua katooto aika ai tibwa ngkai a kuneaki inanon witeo “Sealed Toghether: The Manaus Temple Caravan” ao “Temples Are a Beacon” (ChurchofJesusChrist.org).
-
Kamatebwaian te kabwarabwara ni manga utin te Tia Kamaiu n Reirei ao Berita aika Tabu 110:1–10 bon te kawai ae e tamaroa ni katean ara onimaki iroun Iesu Kristo. Ko kona n tuangiia kaain te kiraati bwa a na tarai tein tamnei inanon kiibu aikai ao ni iangoia bwa tera ae e reiakiniira tamnei aikai iaon Iesu Kristo. Tera ae e tei ibukin “te bwai ae karaoaki man te koora”? ke te bwanaa “ai aron tangin butin te ran ae korakora”?
TamneiBwain nanon te Kirtland TemboraItabon oon te Kirtland Tembora ni kauoua iai te tabo ni kabwarabwara ibukiia taan kairiiri.
Reirei ao Berita aika Tabu 110:11–16
Kingin te nakoanibonga ake a kainanoaki ibukin katiaan ana mwakuri te Atua bon iai inanon te Ekaretia n te tai aei.
-
Ni buokiia kaain te kiraati ni mataata n taian kiing ake a anga Mote, Eritai ao Eria nakon Iotebwa Timiti ao Oliver Cowdery inanon te Kirtland Tembora, ko kona ni kaoiia bwa a na wareka ao ni maroroakina te rongorongo inanon “Bwaai ni Ibuobuoki riki Tabeua,” ibon irouia ke n te kurubu. E aera ngkai a rangi ni kakawaki kiing aikai i nanon maiura ngkai? Ko na bae naba n tuangiia kain te kiraati bwa a na rinea temanna te burabeti are e kaokii kiing aikai—Mote, Eritai, ao Eria—ao n reiakinna man te Bible Dictionary ke Bwai ni Kairi nakon Koroboki aika Tabu. Tera aron maiuiia burabeti aikai ae a reiakiniira iaon taian kiing ake a kaoki? Aio e kona ni kairiira nakon te marooro bwa tera ana kantaningaia te Uea ibukira bwa ti na karaoia ngkai a mena kiing aikai iaon te aba.
Bwaai n Ibuobuoki Riki Tabeua
Taian kiing a katauraoa te mwaaka ao te kariaia ibukin ana mwakuri te Atua.
E kabwarabwaraa Unimwaane Quentin L. Cook:
“Te Kirtland Tembora, n te tabo ao ni buburana, e aki ataaki. Ma ni kaineti ma kakawakina ae moan te korakora nakoia aomata, bon iai mwiina ae akea tokina. Burabeti ake ngkoa a kaoki kiingin te nakoanibonga ibukin otenanti ni kamaiu ae akea tokiia ibukin ana euangkerio Iesu Kristo. Aio e karika te kimwareirei ae korakoran ibukiia kaain te aro aika kakaonimaki.
“Kiing aikai a katauraoa te “mwaaka mai ieta” [Reirei ao Berita aika Tabu 38:38] ibukin mwioko aika baireaki mai i karawa are bon oin raoi te kantaninga n te Ekaretia. Ni bongin te Itita ane e tamaroa anne inanon te Kirtland Tembora, a kaokaki teniua kiing:
Te Moan, Mote e kaoti ao n anga kiingin ikotakiia Iteraera man mwakoron te aonaaba ake aua, are te mwakuri ni mitinare.
Te Kauoua, e kaoti Eritai ao n anga te kiing ibukin te euangkerio n ana tai Aberaam, ake iai inanona kaokan ana berita ae tabu Aberaam [taraa Aberaam 2:8–11]. E reirei Beretitenti Russell M. Nelson bwa te kantaninga ni kiingin te berita ae tabu bon katauraoakiia kaain te aro ibukin uean te Atua [taraa “Covenants,” Ensign ke Riaona, Nobembwa 2011, 88]. …
Te Kateniua, e kaoti Eria ao n anga kiingin te mwaaka ni kabaebae ni boong aikai, are bon te mwakuri n rongorongon te utu ao otenanti n te tembora ni karekean te kamaiuaki ibukiia aika maiu ao ake a tia ni mate” (“Katauraoi n Noora te Atua,” Ensign ke Riaona, Meei 2018, 114–15).
Kanakoraoan Ara Anga reirei
Kaoa te Tamnei inanon am anga reirei. “Te moan bwai n te kantaninga ni kabane n are e karaoia te tia reirei—titiraki ni kabane, koroboki aika tabu ni kabane, taian waaki ni kakukurei—bon kaoan te Tamnei bwa e na karikirakea te onimaki ao ni kaoiia aomata nako bwa a na nakon Kristo. … Katangitang aika tabu, koroboki aika tabu, aia taeka burabeti n taai aikai, kaotan te tangira ao te koaua, ao taai n aki kakarongoa ni iango a bane ni kona ni kaoa rokon te Tamnei” (Reirei n Ana Kawai te Tia Kamaiu,10).