wan famli

13–19 Disemba

Famli: Wan Ofisol Toktok I Go long Wol

Famli Hem I Stamba blong Plan blong Krieta

Taem yu stap stadi long “Famli: Wan Ofisol Toktok I Go long Wol” long wik ia, tingting long ol trutok we bambae i sapotem ol memba blong klas long ol hadwok blong olgeta blong mekem ol hom mo ol famli blong olgeta i kam strong moa.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Blong leftemap tingting blong ol memba blong klas blong oli serem wanem oli bin lanem long wik ia aot long stadi blong olgeta long famli ofisol toktok; yu save askem olgeta blong jusum wan paragraf, mo talem sot long wan sentens wanem we paragraf ia i stap tijim.

tijing pikja bokis

Stap Tijim Doktrin

“Famli hem i stamba blong plan blong Krieta.”

• Oli save Jos from oli tokbaot bigwan ol famli, mo famli ofisol toktok i talemaot ol risen blong doktrin we i mekem se Jos i tokbaot bigwan olgeta samting ia. Blong leftemap tingting blong toktok storian raon long hemia, yu save invaetem ol memba blong klas blong traem tingting long maen blong olgeta se wan i stap askem olgeta se from wanem Jos i tokbaot bigwan ol famli. ?Wanem trutok insaed long ofisol toktok ia bae yumi save serem blong ansarem kwestin blong man o woman ia?

• Wan risen we famli ofisol toktok i impoten tumas, i we i talem bakegen we ol trutok we man i stap agensem tedei, oli tru. ?Wanem trutok nao, insaed long ofisol toktok, i helpem yumi blong ol giaman aedia abaot ol famli oli no trikim yumi long wol blong tedei? ?Olsem wanem nao ol trutok ia oli gat paoa long ol joes we yumi mekem? Toktok we i kam long Presiden Dallin H. Oaks insaed long “Sam Moa Risos” bae i save help blong ansarem kwestin ia.

  wan famli we i stap kuk

  Ol papa mo mama oli mas lukaotem ol pikinini blong olgeta wetem lav mo stret mo gud fasin.

“Hapines insaed long famli laef i gat gudfala janis blong kamtru sapos laef insaed long famli i stanap long ol tijing blong Lod Jisas Kraes.”

• Sapos yufala i toktok raon long olgeta prinsipol we oli stap long ol paragraf sikis mo seven blong famli ofisol toktok, bae i save helpem ol memba blong klas blong yu blong faenem moa bigfala hapines insaed long ol famli rilesensip blong olgeta. Tingting blong mekem wan lis blong ol prinsipol long bod, mo invaetem ol memba blong klas blong jusum wan prinsipol blong toktok raon long hem taem oli sidaon tutu. Oli save yusum ol kwestin olsem ol kwestin ia blong lidim ol toktok storian blong olgeta: ?Wanem eksampol blong prinsipol ia yumi bin luk insaed long famli laef? ?Olsem wanem taem yumi stap laef folem prinsipol ia i lidim yumi blong gat hapines insaed long ol famli blong yumi? ?Olsem wanem nao blong stap laef folem prinsipol ia i help blong mekem Sevya i fandesen blong famli laef blong yumi? ?Wanem skripja nao i save helpem ol famli blong yumi blong andastanem prinsipol ia i gud moa? (Ol memba blong klas oli save faenem ol skripja taem oli yusum Topical Guide o Gaed long Ol Skripja [olskripja.ChurchofJesusChrist.org].) Wanwan grup i save serem wetem klas wanem we oli bin lanem.

  Talem gud se, i nomata long ol defren situesen blong famli, yumi save traehad blong bildim wan famli we i no save finis antap long fandesen blong Sevya mo gospel blong Hem.

“Mifala i askem strong long ol sitisen blong wok strong moa long ol samting ia we oli stap olsem plan blong holemtaet mo mekem famli i kam strong moa.”

• ?Olsem wanem yu save helpem ol memba blong klas blong yu blong oli andastanem responsabiliti blong olgeta blong sapotem ol trutok we oli stap insaed long famli ofisol toktok? Blong stat blong toktok raon long hemia, yufala i save toktok raon long wanem ol memba blong klas oli lanem aot long taetol blong ofisol toktok ia. ?Wanem nao i wan ofisol toktok? ?Wanem nao i mekem se Fas Presidensi mo Kworom blong Olgeta Twelef Aposol oli kwalifae blong putumaot wan ofisol toktok i go long wol long saed blong ol famli? Ol memba blong klas oli save raetem lis blong wanem we oli ting se i stamba mesej blong ofisol toktok (leftemap tingting blong olgeta blong talem ol spesifik paragraf). Afta, oli save toktok raon long ol wei blong promotem ol mesej ia insaed long ol komuniti o nesen blong olgeta. Mesej blong Sista Bonnie L. Oscarson “Defenders of the Family Proclamation” i tekem ol eksampol we yu save luklukbak tugeta olsem wan klas (Ensign o Liahona, May 2015, 14–17). Mo tu, yufala i save wajem vidio ia: “Defenders of the Faith” (ChurchofJesusChrist.org).

sam moa risos pikja bokis

Sam Moa Risos

Ol famli insaed long plan blong God.

Presiden Dallin H. Oaks i tijim:

“Ol Lata-dei Sent we oli andastanem plan blong God blong fasin blong sevem man, oli gat wan wei ia nomo blong lukluk wol, we i helpem olgeta blong luk risen blong God i putum ol komanmen, ol wei we i no jenis blong mas gat ol odinens, mo stamba rol blong Sevya blong yumi, Jisas Kraes. Atonmen blong Sevya blong yumi, i tekemaot yumi long ded, mo folem hamas yumi sakem sin, i sevem yumi long sin. Wetem lukluk ia i go long wol, ol Lata-dei Sent oli gat ol stret fas samting long laef, mo ol praktis, mo oli kasem blesing ia blong gat paoa blong stap strong tru long ol samting we oli fasfas long laef, mo ol sobodi blong laef blong wol ia.

“Gospel plan we wanwan famli i mas folem blong rere from laef we i no save finis mo fasin blong kam olsem wan god, i stap long ofisol toktok blong Jos, we i kamaot long 1995, ‘Famli: Wan Ofisol Toktok I Go long Wol.’ I tru, ol samting we hem i talem oli defren evriwan long sam loa, praktis, mo toktok blong wol tedei, we yumi stap laef long hem. Long taem tedei, ol samting we oli defren oli kamaot klia olsem, fasin blong man mo woman i stap laef tugeta be oli no mared, sem seks mared, mo lukaotem ol pikinini long ol kaen rilesensip olsem. Olgeta we oli no biliv o lukaot blong kam olsem wan god wan dei, bae ol wei blong wol i save winim olgeta, mo i save mekem se oli tekem se famli ofisol toktok i jes wan polisi toktok we bae oli save jenisim. Be, long nara saed, ol Lata-dei Sent oli talem tru se famli ofisol toktok i talem klia kaen famli rilesensip we bigfala pat blong divelopmen blong yumi we i no save finis i save hapen long hem” (“The Plan and the Proclamation,” Ensign o Liahona, Nov. 2017, 29).

Stap Kam Antap long Fasin blong Yumi blong Stap Tij

Laef folem gospel wetem ful hat blong yu. “Paoa i kam taem wan tija i mekem evri samting we hem i save mekem blong rere, be i no jes wanwan lesen ia, be blong kipim laef blong hem i stret blong hem i harem Spirit i toktok long hem” (Boyd K. Packer, Teach Ye Diligently [1975], 306).