Tik blangket we i soem ol han blong ol defren kaen kala blong skin

Long Evri Memba we I Man mo I Klin Inaf, i kam long Emma Allebes

6–12 Disemba

Ol Toktok blong Bilif mo Ol Ofisol Toktok 1 mo 2

“Mifala I Biliv”

Wetem prea, ridim Ol Toktok blong Bilif mo Ol Ofisol Toktok 1 mo 2, mo lukaotem insperesen blong Tabu Spirit taem yu stap plan blong gat wan eksperiens we i gat mining wetem ol memba blong klas, long Sandei.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Yu save invaetem ol memba blong klas blong finisim haf sentens ia: “Mi mi glad tumas we mi ridim ol skripja long wik ia from se …”

tijing pikja bokis

Stap Tijim Doktrin

Ol Toktok blong Bilif

Ol Toktok blong Bilif oli tekem ol fandesen trutok blong gospel ia we i kambak.

• Hemia i wan wei blong helpem ol memba blong klas blong oli serem wanem we oli faenem, we i gat mining, insaed long Ol Toktok blong Bilif: Yu save raetem ol namba 1 kasem 13 long bod mo askem ol memba blong klas blong raet, long saed blong ol namba ia, wan samting we oli lanem aot long toktok blong bilif ia. ?Wanem samting defren nao ol trutok ia oli mekem insaed long rilesensip blong yumi wetem Papa mo Mama blong yumi long Heven mo Jisas Kraes? Maet ol memba blong klas oli save serem olsem wanem Ol Toktok blong Bilif oli bin helpem stadi blong olgeta long gospel, o i bin helpem olgeta blong serem gospel wetem ol narawan.

Ol Toktok blong Bilif 1:9; mo Ol Ofisol Toktok 1 mo 2

Jos Ia blong Jisas Kraes, revelesen nao i stap soem rod long hem.

• ?From wanem revelesen we i gogohed blong kam, i impoten long yumi? Invaetem ol memba blong klas blong serem ol filing blong olgeta abaot kwestin ia. Ol memba blong klas oli save toktok raon tu long wei we prinsipol ia, blong revelesen we i gogohed blong kam, i go wetem Ol Ofisol Toktok 1 mo 2. (Aotlaen blong wik ia insaed long Kam Folem Mi—Blong Wanwan Man, Woman mo Famli i givim sam risos we oli save help we oli go wetem ol revelesen ia. ?Wanem nao yumi lanem aot long Ol Ofisol Toktok 1 mo 2 abaot rol blong revelesen blong stap lidim Jos? (Luk tu long Ol Toktok blong Bilif 1:9 mo toktok blong Presiden Gordon B. Hinckley we i stap long “Sam Moa Risos”). ?Wanem nara eksampol blong revelesen we i gogohed we ol memba blong klas oli save tingting long ol? ?Olsem wanem ol revelesen ia oli lidim laef blong yumi mo oli helpem yumi blong bildimap kingdom blong Papa long Heven?

• Tingting blong invaetem ol memba blong klas blong luklukbak long Ol Ofisol Toktok 1 mo 2 mo blong oli serem wan samting aot long ol revelesen ia we i save helpem wan we i stap gat hadtaem blong akseptem wan niu jenis long polisi, revelesen, o doktrin blong Jos. ?Olsem wanem nao ol memba blong klas oli lanem blong trastem God taem oli gat hadtaem wetem wan samting insaed long Jos ia? ?Olsem wanem stadi blong olgeta long wik ia i mekem bilif blong olgeta i kam strong moa, se Lod i stap lidim Jos ia blong Hem? Ol niu tingting we oli kam long Presiden Dieter F. Uchtdorf insaed long “Sam Moa Risos” oli save givhan tu.

  Peinting blong Wilfod Wudrof

  Wilford Wudrof, i kam long H. E. Peterson

sam moa risos pikja bokis

Sam Moa Risos

“Spirit blong God i bin stap ia.”

Presiden Gordon B. Hinckley we i bin stap olsem wan memba blong Kworom blong Olgeta Twelef Aposol taem we revelesen ia we i stap long Ofisol Toktok 2 i bin kamaot. Sam yia afta, hem i bin toktok aot eksperiens ia:

“Ples i bin tabu tumas insaed long rum ia. Long mi, mi filim se oli openem wan paeplaen bitwin tabu jea long heven mo profet blong God ia we i nildaon, i prea strong wetem ol nara Brata Lida blong hem. Spirit blong God i bin stap long tetaem ia. Mo tru long paoa blong Tabu Spirit, wan pis long maen i kam long profet ia, se samting ia we hem i bin prea from i wan stret wan, se taem i kam, mo naoia blong bigfala blesing blong prishud bae i go long evri man we i klin inaf long evri ples, i nomata long laen blong hem.

“Evriwan insaed long sekol ia, tru long paoa blong Tabu Spirit, i bin save sem samting ia.

“Hem i bin wan taem we i kwaet mo naes tumas. … I no gat voes we ol sora blong hed i save harem. Be voes blong Spirit i bin talem slo wetem strong tingting long maen blong mifala mo long stret sol blong mifala” (“Priesthood Restoration,” Ensign, Oct. 1988, 70).

“Hem i nomol blong gat kwestin blong askem.”

Presiden Dieter F. Uchtdorf i bin talem olsem long olgeta we oli gat ol tu tingting abaot Jos histri o doktrin.

“Hem i oraet blong gat ol kwestin—fasin blong stap ones mo askem samting, plante taem i mekem se smol oktri i givim sut, mo i kam bigwan i kam wan bigfala tri blong save samting. I gat samfala memba blong Jos we, long wan taem, oli no tingting tumas wetem ol kwestin olsem. “Wan long ol stamba tingting blong Jos i blong fidim mo lukaotgud long sid blong fet—iven sapos samtaem, graon ia hem i sanbij mo i gat tu tingting mo i no save stret se ol samting oli olsem wanem. … Fet i blong hop from ol samting we yufala i no luk, we oli tru.

“From hemia, ol brata mo sista blong mi, ol dia fren blong mi. Plis, faswan, yu gat tu tingting long ol tu tingting blong yu bifo yu gat tu tingting long bilif blong yu. Yumi neva mas letem tu tingting i holemtaet yumi prisena, mo i holemtaet yumi blong yumi no kasem tabu lav, pis mo ol presen we oli kam tru long fet long Lod Jisas Kraes ” (“Come, Join with Us,” Ensign o Liahona, Nov. 2013, 23; luk tu long Lawrence E. Corbridge, “Stand Forever” [Brigham Young University devotional, Jan. 22, 2019], speeches.byu.edu).

Stap Kam Antap long Fasin blong Yumi blong Stap Tij

Hem i oraet nomo blong talem se, “mi no save.” I nomata se yu mas traem bes blong yu blong ansarem eni kwestin we ol memba blong klas blong yu we oli gat abaot gospel, Lod i no traem blong talem se yu yu mas save evri samting. Taem yu no save olsem wanem blong ansa long wan samting, yu talem stret. Afta, poenem rod long olgeta we oli stap lan blong luk long doktrin we Lod i talemaot, mo talem wan tru testemoni abaot wanem yu save. (Luk long Teaching in the Savior’s Way, 24.)