Josef i luk papa, mama, mo brata blong hem insaed long selestial kingdom (Joseph Smith’s Vision of the Celestial Kingdom, Robert Barrett)

29 Novemba–5 Disemba.

Doktrin mo Ol Kavenan 137–138

“Visen blong Fasin blong Pemaot Ol Dedman”

Presiden Dallin H. Oaks i tijim: “Yumi evriwan i save tingting long praevet abaot ol situesen long spirit wol. … Be yumi no mas tijim wanwan long yumi o yusum olsem wan ofisol doktrin, wanem we i no standet blong ofisol doktrin” (“Gat Tras long Lod,”   Liahona, Nov 2019, 26). Meksua se ol toktok storian blong yufala oli stanap long ol skripja mo ol toktok blong ol profet.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

I gat plante doktrin trutok insaed long Doktrin mo Ol Kavenan 137–138. Invaetem ol memba blong klas blong faenem sam long ol doktrin trutok ia. Afta, spendem sam minit blong luklukbak long lis blong olgeta olsem wan klas, mo tokbaot from wanem ol trutok ia oli impoten long olgeta. ?I gat eniwan we i lanem wan samting aot long ol seksen ia we oli bin andastanem bifo?

Stap Tijim Doktrin

Doktrin mo Ol Kavenan 137; 138:32–37

Evri sol bae i gat janis blong jusum selestial glori.

• Plante long yumi i save ol pipol we oli no bin gat janis blong akseptem gospel long laef ia—wetem olgeta we oli ded taem oli pikinini. Invaetem ol memba blong klas blong serem wan trutok we oli faenem insaed long seksen 137 we i helpem olgeta blong andastanem plan blong God from wanwan long olgeta ia. ?Wanem trutok nao yumi faenem insaed long Doktrin mo Ol Kavenan 138:32–37 we i ademap save long wei we yumi andastanem plan blong God? Ol memba blong klas oli save serem olsem wanem ol trutok ia i mekem olgeta oli filim abaot Papa long Heven, plan blong Hem blong fasin blong sevem man, mo Atonmen blong Jisas Kraes. Toktok ia insaed long “Sam Moa Risos” bae i save helpem klas storian blong yufala.

Doktrin mo Ol Kavenan 138:1–11, 25–30

Blong stap ridim mo tingting hevi long ol skripja bae i mekem yumi rere blong kasem revelesen.

• Eksperiens ia we Josef F. Smit i tokbaot long Doktrin mo Ol Kavenan 138:1–11, 25–30 i helpem yumi andastanem olsem wanem yumi save mekem yumiwan i rere blong kasem revelesen. Maet ol memba blong klas oli save wok tugeta blong faenemaot wanem we oli bin lanem abaot revelesen aot long ol ves ia. Yu save askem ol memba blong klas blong serem olsem wanem, fasin blong stap ridim mo tingting hevi long ol skripja oli mekem olgeta oli rere blong kasem revelesen (luk tu long Josef Smit—Histri 1:11–12).

• Mesej blong M. Russell Ballard, “Visen blong Fasin blong Pemaot Ol Dedman,” (  Liahona, Nov 2018, 71–74) i tokbaot we Josef F. Smit “i rere long laeftaem blong hem blong rere blong kasem impoten revelesen ia [Doktrin mo Ol Kavenan 138].” Sapos ol memba blong klas blong yu oli ridim mesej blong Presiden Ballard long wik ia, leftemap tingting blong olgeta blong serem wan samting we i bin tajem tingting blong olgeta. O, yu save ridim sam pat blong mesej ia olsem wan klas. ?Wanem nao i tajem olgeta abaot laef blong Presiden Smit mo abaot fasin blong hem? ?Wanem nao yumi save lanem aot long eksampol blong hem?

  

  Josef F. Smit, i kam long Albert E. Salzbrenner

Doktrin mo Ol Kavenan 138:12–60

Wok blong fasin blong sevem man i stap gohed afta long ded.

• Blong helpem ol memba blong klas oli faenem ol trutok insaed long Doktrin mo Ol Kavenan 138:12–60, yu save givim long olgeta samfala kwestin abaot spirit wol we ansa blong olgeta i stap long ol ves ia. Eksampol: Wanem nao Sevya i bin mekem taem Hem i bin stap long spirit wol? Huia oli ol mesenja blong Lod, mo wanem nao hem i mesej blong olgeta? Ol memba blong klas oli save jusum wan o moa long wan long ol kwestin ia mo wok long ol smol grup blong oli faenem ol ansa. Afta long hemia, oli save serem wetem wanwan long olgeta ol trutok ia we oli faenem. ?Wanem samting defren nao ol trutok ia oli mekem insaed long laef blong yumi?

• ?Wanem nao bae yumi talem long wan we i askem: “Wanem i hapen taem yumi ded?” Wanem nao bae yumi serem aot long Doktrin mo Ol Kavenan 138:12–60 we i save help blong ansarem kwestin ia? (Luk tu long Alma 40:11–15).

Sam Moa Risos

God bambae i mekem wan rod i rere blong evriwan long ol pikinini blong Hem oli save akseptem gospel blong Hem.

Presiden Henry B. Eyring i bin tijim:

“Wan smol namba nomo blong ol pikinini blong God oli bin kasem, long taem blong laef blong olgeta long wol ia, wan ful save o andastaning abaot plan ia blong God, wetem raet blong yusum ol prishud odinens mo kavenan we i mekem paoa ia we i pem praes from sin, we Sevya i mekem, i wok fulwan insaed long laef blong yumi. …

“Sam bae oli luk se hemia i no stret. Oli save tekem se hemia i pruf se i no gat plan, i no gat samting blong mekem blong Lod i sevem yumi—bae oli gat filing se wan God we i stret, i gat lav, bae i no krietem wan plan we i blong wan smol namba nomo blong ol pikinini blong Hem. Ol narawan oli save talem se God i mas putum finis bifo se wijwan long ol pikinini blong Hem bae Hem i sevem, mo bae i givim gospel long olgeta, be ol narawan we oli neva harem gospel ia, bae Hem i no jusum olgeta nomo.

“Be yu mo mi i save, se from ol trutok ia we Lod i bin putumbak tru long Profet Josef Smit, plan blong God i gat moa lav mo i moa i bitim hemia. Papa blong yumi long Heven i wari blong pulum i kam tugeta mo blesem evriwan long famli blong Hem. Be Hem i save se i no evriwan bae oli jusum blong kam tugeta long wan ples; plan blong Hem i givim long wanwan long ol pikinini blong Hem, janis ia blong akseptem o sakemaot invitesen blong Hem” (“Pulum Tugeta Famli blong God,”   o churchofjesuschrist.org/general-conference/2017/04?lang=bis, Mei 2017).

Stap Kam Antap long Fasin blong Yumi blong Stap Tij

Yusum ol toktok blong ol profet. “Ol skripja mo ol toktok blong ol lata-dei profet mo aposol oli stamba blong ol trutok we yumi stap tijim. “Yusum evri janis blong givim insperesen long olgeta we yu stap tijim blong oli tanem olgeta i go long toktok blong God blong i soem rod long olgeta” (Teaching in the Savior’s Way, 21).