Katej Kalabus

22–28 Novemba

Doktrin mo Ol Kavenan 135–136

“Hem I Bin Silim Misin blong Hem Mo Ol Wok blong Hem Wetem Blad blong Hemwan”

Taem yu stap ridim ol seksen 135–136, Tabu Spirit i save givim yu ol niu tingting we bae i save helpem ol memba blong klas blong yu. Ol aedia insaed long aotlaen ia oli save givim ol aedia we yu save yusum taem yu stap tij.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Hemia i wan nara wei blong invaetem ol memba blong klas blong serem ol tingting blong olgeta abaot ol seksen 135–36. Invaetem olgeta blong traem tingting long maen blong olgeta se oli save toktok long wan memba blong Jos long 1844, wan we i harem nogud long ded blong Josef Smit mo i wari se wanem bae i hapen long Jos. ?Wanem nao yumi save serem, aot long ol seksen ia, we i save helpem man o woman ia?

Stap Tijim Doktrin

Doktrin mo Ol Kavenan 135; 136:37–39

Josef mo Haeram Smit, tufala i bin silim testemoni blong tufala wetem blad blong tufala.

• ?olsem wanem ol sakrifaes ia blong Josef mo Haeram Smit oli “silim” testemoni blong tufala? Mebi ol memba blong klas oli save tingting hevi long kwestin ia taem oli luklukbak long Doktrin mo Ol Kavenan 135; 136:37–39. Afta long hemia, oli save serem ol niu tingting we oli bin kasem. Oli save serem tu ol filing blong olgeta abaot fasin ia blong Josef mo Haeram blong glad blong givim laef blong tufala from trutok. Maet bae Lod i no askem yumi blong ded from trutok ia; be ?olsem wanem nao laef blong yumi i save stap olsem wan “sil” long ol testemoni blong yumi.

Doktrin mo Ol Kavenan 135:3

Josef Smit i bin mekem moa blong sevem yumi bitim eni narawan, be i no bitim Jisas Kraes.

• ?olsem wanem yu save helpem ol memba blong klas blong andastanem wanem we Josef Smit i bin mekem blong sevem olgetawan? Yu save raetem long bod: From ol samting we Lod i talemaot tru long revelesen long Josef Smit, naoia mi … mo afta, invaetem ol memba blong klas blong oli tingting long sam wei blong finisim sentens ia. Oli save stat taem oli luklukgud insaed long Doktrin mo Ol Kavenan 135:3 blong faenem ol samting we Josef Smit i bin mekem blong helpem yumi kasem fasin blong sevem man. Tingting blong invaetem ol memba blong klas blong serem ol filing blong olgeta abaot Josef Smit mo wanem we Lod i bin talemaot tru long hem.

• Wan nara wei blong helpem ol memba blong klas blong tingbaot misin blong Josef Smit i blong invaetem olgeta blong raetem wan sot stori blong laef blong hem. Maet bae yu wantem blong tokbaot ol impoten samting we oli bin hapen, o ol impoten samting we oli bin kamtru aot long laef blong hem, blong oli save putum long laef stori ia. ?Wanem nao oli faenem insaed long Doktrin mo Ol Kavenan 135 we oli save tokbaot. ?Wanem nao oli save talem long laef stori blong olgeta blong helpem ol narawan blong mekem bilif blong olgeta long tabu misin blong Josef Smit i kam strong moa?

• Plante trutok abaot Jisas Kraes mo Atonmen blong Hem oli bin kam tru long revelesen i go long Josef Smit—ol trutok we oli bin helpem evri man mo woman blong faenem fasin blong sevem man. Blong helpem ol memba blong klas blong luksave ol kontribusen ia, yu save hangem wan pikja blong Jisas Kraes mo askem sam memba blong klas blong serem wan fevret ves abaot Jisas Kraes aot long ol skripja, we i bin kamaot tru long revelesen i go long Josef Smit: Buk blong Momon, Doktrin mo Ol Kavenan mo Perel we I Gat Bigfala Praes. ?Olsem wanem ol skripja ia oli helpem yumi andastanem mo kam kolosap moa long Sevya? ?Olsem wanem ol trutok long ol ves ia oli givhan blong sevem yumi?

Doktrin mo Ol Kavenan 136

Yumi save mekem tingting blong Lod i kamtru taem yumi stap folem kaonsel blong Hem.

• Aotlaen blong wik ia, insaed long Kam Folem Mi—Blong Wanwan Man, Woman mo Famli i talem blong ol memba oli luklukgud long kaonsel we i stap insaed long Doktrin mo Ol Kavenan 136: we i save helpem olgeta blong tanem wan tes i kam wan eksperiens long saed blong spirit. Maet bae yu askem ol memba blong klas blong serem eni kaonsel we oli faenem. Yu save askem olgeta blong luklukgud insaed long seksen ia blong lukaotem kaonsel ia we i save helpem yumi blong mekem tingting blong Lod i kamtru long taem blong yumi tedei; hemia semmak olsem i bin helpem Ol Sent long taem we oli bin wokbaot i go long Wes (ves 1).

  

  Winta Kwota, i kam long Greg Olsen

• Maet bae i wan gud samting blong klas i krietem wan posta olsem hemia we oli faenem insaed long ol magasin blong Jos abaot wan long ol ves insaed long seksen 136. Yu save mekem olgeta oli wok tutu, o wanwan; mekem olgeta oli stat blong luklukgud long ol ves ia mo faenem wan trutok we i kamaot klia long olgeta. Afta long hemia, oli save mekem wan simpol posta we i soem olsem wanem, trutok ia, we oli bin tijim long 1847, i stil save help tedei.

Sam Moa Risos

Miusik we I Go Wetem

Singsing long olgeta hym ia, o wajem ol vidio; hemia i save invaetem Tabu Spirit, o i save givim insperesen blong gat wan klas storian abaot wok blong Profet Josef Smit mo ol sakrifaes blong Ol Sent we oli bin gohed afta long hem.

“A Poor Wayfaring Man of Grief” (Hymns, no. 29). Taem hem i bin stap long Katej Kalabus, Josef Smit i bin askem long Jon Teila blong singsing hym ia.

“Presem Man Ia” (STSP, pej 56; vidio, www.thetabernaclechoir.org/videos/praise-to-the-man-mormon-tabernacle-choir). Toktok blong hym ia, oli bin raetem blong presem Josef Smit.

“Kam Kam Ol Sent” (STSP, pej 2; video, www.thetabernaclechoir.org/videos/come-come-ye-saints-mormon-tabernacle-choir).

“Faith in Every Footstep” (video, www.thetabernaclechoir.org/videos/faith-in-every-footstep).

Stap Kam Antap long Fasin blong Yumi blong Stap Tij

Testifae abaot tru doktrin. Yu save serem testemoni blong yu abaot ol trutok we oli ol doktrin truaot long lesen, be i no jes long en. Taem yu mekem olsem, Tabu Spirit bae i konfemem, insaed long hat blong olgeta we yu stap tijim, se doktrin ia i tru. (Luk long Teaching in the Savior’s Way, 21.)