Yumi wetem Olgeta mo Olgeta wetem Yumi, i kam long Caitlin Connolly

1–7 Novemba

Doktrin mo Ol Kavenan 125–128

“Wan Voes blong Stap Glad blong Olgeta we Oli Laef Mo Olgeta we Oli Ded”

Tingting hevi long ol toktok blong Elda Ulisses Soares: “Bes tija i wan gudfala rol model. Blong stap tijim wan samting we yumi rili stap biliv long hem, i save mekem samting i defren long hat blong olgeta we yumi stap tijim” (“?Olsem Wanem Bae Mi Save Andastanem?” Ensign o Liahona, Mei 2019, 6).

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Ol memba blong klas oli save raetem long bod ol sentens we oli kamaot long Doktrin mo Ol Kavenan 125–28 we i bin tajem olgeta. Letem olgeta oli serem ol tingting blong olgeta abaot ol sentens ia. ?Olsem wanem nao, taem oli bin stadi long ol trutok ia, i bin jenisim aksen blong olgeta long wik ia?

Stap Tijim Doktrin

Doktrin mo Ol Kavenan 126

“Tekem gud kea long famli blong yu.”

• Wok we Brigham Yang i bin kasem blong i givim seves long hem insaed long Jos, i blong hem mo famli blong hem i mekem ol bigfala sakrifaes; ol toktok blong Lod long Brigham insaed long seksen 126 i save givim insperesen blong gat wan storian toktok raon long from wanem, samtaem, bae Lod i askem wan sakrifaes long seves blong yumi. ?Olsem wanem Lod i bin helpem yumi blong mekem ol responsabiliti blong yumi long hom, long ol koling long Jos, o long ol nara pat blong laef?

Doktrin mo Ol Kavenan 127:2–4

Yumi save dipen long Lod long ol taem we oli had.

• ?Olsem wanem nao Doktrin mo Ol Kavenan 127:2–4 i save helpem ol memba blong klas we oli filim se, olsem Josef Smit, oli stap swim long ol “dip wota”? Yu save invaetem ol memba blong klas blong ridim ol ves ia mo blong oli serem wei we bae oli talem sot fasin we Josef i bin gat taem hem i fesem ol jalenj blong hem. ?Wanem sentens long ol ves ia bae i save helpem wan we i stap gat hadtaem blong kamaot long wan hadtaem? ?Olsem wanem nao Josef i bin dipen long Lod long taem blong ol tes blong hem? ?Olsem wanem nao yumi save folem eksampol blong hem?

Doktrin mo Ol Kavenan 128

Wok blong sevem ol bubu blong yumi i wan mas long wok blong fasin we Kraes bae i sevem yumi.

• Tingting long wei we bae yu givim insperesen long ol memba blong klas blong oli tekpat long tempol mo famli histri wok. Doktrin mo Ol Kavenan 128:15–18 i save helpem olgeta blong filim se wok ia i mas hapen kwiktaem; yu save invaetem olgeta blong luklukgud insaed long ol ves ia blong faenem wan samting we i mekem se bae oli wantem moa blong go mekem baptaes blong ol bubu blong olgeta we oli ded finis. Ol kwestin olsem olgeta ia i save helpem olgeta blong tingting hevi long ol ves ia: ?From wanem yumi no save kam stret evriwan sapos yumi no gat ol dedman blong yumi? (ves 15). ?From wanem Josef Smit i singaotem se baptaes blong ol dedman i “speseli topik ia, we i gat moa glori bitim ol narafala topik we i blong gospel ia we i no gat en”? (ves 17; luk tu long toktok we i stap long “Sam Moa Risos”). Long wanem wei nao bae oli sakem wan nogud toktok long wol ia sapos i no gat “wan kaen ring blong jen o narafala samting i joenem ol bubu mo ol pikinini”? (ves18). Sapos ol memba blong klas oli nidim help blong oli statem famli histri wok blong olgeta, yu save invaetem wod tempol mo famli histri lida blong presentem olgeta long FamilySearch.org.

  Mo tu, yu save givim insperesen long olgeta wetem ol ves we oli talemaot glad ia blong mekem tempol mo famli histri wok, olsem Doktrin mo Ol Kavenan 128:19–23. Ol memba blong klas oli save ridim ol ves ia mo faenem ol sentens we oli soemaot olsem wanem Josef Smit i bin filim abaot wok blong sevem ol dedman. Afta, yu save askem olgeta blong serem ol eksperiens we oli bin gat ol semmak filing ia abaot wok ia. Sapos yu soem wan long ol vidio we oli stap long “Sam Moa Risos” i save leftemap tingting blong olgeta tu.

• From se wok ia blong sevem ol dedman i spesel nomo long Jos Ia blong Jisas Kraes Ia blong Ol Lata-dei Sent, yumi gat ol janis blong eksplenem doktrin ia long ol pipol we oli neva harem bifo. Ol memba blong klas oli save luklukgud insaed long Doktrin mo Ol Kavenan 128 blong faenem wan samting we oli save serem long wan storian wetem wan we i askem abaot baptaes blong ol dedman. ?Wanem nao doktrin ia i stap tijim yumi abaot Papa long Heven mo Jisas Kraes? Letem ol memba blong klas oli praktisim wanem bae oli talem.

  

  Blong mekem tempol seves blong ol bubu blong yumi i joenem hat blong yumi long hemia blong olgeta.

Sam Moa Risos

Ol vidio abaot famli histri wok (ChurchofJesusChrist.org).

“I Couldn’t Explain the Feeling”

“If We Put God First”

“Redeeming the Dead Redeemed Me”

“A Visit from Father”

“Connected to Eternal Families”

“Gatherers in the Kingdom”

“Including Me”

“Is Anything Too Hard for the Lord?”

“A Glorious and Wonderful Provision.”

Presiden Gordon B. Hinckley i bin talem:

“Atonmen blong Jisas long bihaf blong evriwan, i ripresentem bigfala sakrifaes ia long bihaf blong yumi. Hem i putum wan paten i stap, mo folem paten ia, Hem i kam proksi blong evri man long wol. Paten ia, we wan i save ripresentem mo tekem aksen long bihaf blong wan narawan, oli mekem nomo ol odinens ia insaed long haos blong Lod. Long ples ia, yumi mekem samting long bihaf blong olgeta we oli ded finis mo oli no kasem wan save abaot gospel. Hem i joes blong olgeta blong akseptem o blong sakemaot odinens ia we oli mekem. Oli stap long sem rod ia wetem olgeta we oli bin wokbaot long hem long wol ia. Olgeta dedman, oli kasem semfala janis olsem olgeta we oli stap laef. Bakegen, hem i wan gudfala mo bigfala rod ia we Hem we I Hae Olgeta i givim tru long revelesen ia blong Hem long profet blong Hem” (“The Great Things Which God Has Revealed,” Ensign o Liahona, May 2005, 82–83).

Stap Kam Antap long Fasin blong Yumi blong Stap Tij

Prea from ol memba blong klas blong yu. Prea mo talem nem blong olgeta we yu stap tijim, mo lukaot blong andastanem ol spesifik nid blong olgeta. Taem yu stap mekem olsem, Papa long Heven i save helpem yu blong save wanem blong tijim blong save lukluk long olgeta nid ia. (Luk long Teaching in the Savior’s Way, 6.)