Nauvu

Nauvu, Hem Ia we I Naes Tumas, i kam long Larry Winborg

25–31 Oktoba

Doktrin mo Ol Kavenan 124

“Wan Haos long Nem blong Mi”

Blong mekem se Spirit i tekem olgeta prinsipol ia long maen blong yumi stap tingbaot taem yumi stap tij (luk long Jon 14:26), faswan, yumi mas stadi wetem strong tingting mo tingting hevi long olgeta prinsipol ia.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Tingting blong stap invaetem ol memba blong klas blong oli save serem wan samting we oli bin faenem insaed long Doktrin mo Ol Kavenan 124 we i mekem olgeta oli tingting long wan gospel prinsipol long wan niu wei. ?Wanem nao oli bin ridim—olgetawan o olsem wan famli—we i bin jenisim wei we oli bin filim, tingting, o gotru long hem?

tijing pikja bokis

Stap Tijim Doktrin

Doktrin mo Ol Kavenan 124:15, 20

Lod i glad taem man i stap strong mo tru.

• Long seksen 124, Lod i presem Haeram Smit mo Joj Mila from tru fasin blong tufala. Blong helpem ol memba blong klas blong stadi moa dip long fasin ia, yu save invaetem olgeta blong ridim Doktrin mo Ol Kavenan 124:15, 20 mo tingting hevi long wanem we oli lanem, aot long ol ves ia, abaot fasin blong stap tru. ?Wanem moa yumi lanem aot long ol skripja we oli stap anda long “Stap Tru” insaed long Gaed long Ol Skripja (ol skripja.ChurchofJesusChrist.org) o long mesej blong Elda Richard J. Maynes “Winim Tras blong Lod mo blong Famli blong Yu”? (  Jeneral Konfrens Okt 2017, Churchofjesuschrist.org/general-conference/2017/10?lang=bis). Maet ol memba blong klas oli save serem ol eksampol blong ol pipol we oli save se oli gat tru fasin. ?From wanem nao, fasin ia blong stap tru, i wan fasin we man i tekem se i impoten?

Doktrin mo Ol Kavenan 124:22–24, 60–61

Lod i wantem yumi blong welkamem mo akseptem ol narawan.

• Ol memba blong klas blong yu oli save lanem wan samting aot long wanem Lod i talem abaot Nauvu Haos we i save helpem olgeta wetem wei we oli stap toktok o mekem samting wetem ol pipol we oli no ol Lata-dei Sent, o olgeta we oli go longwe long Jos. Yu save droem wan haos long bod mo invaetem ol memba blong klas blong luklukgud insaed long Doktrin mo Ol Kavenan 124:22–24, 60–61 blong faenem ol toktok we Lod i yusum blong tokbaot ol stamba tingting blong Nauvu Haos. Afta, oli save raetem ol toktok ia raon long haos. ?Olsem wanem ol toktok ia bae oli blong Jos Ia blong Jisas Kraes tu? ?Wanem nao bae yumi mekem blong krietem semmak welkam kalja ia long wod mo hom blong yumi?

Doktrin mo Ol Kavenan 124:25-45, 55

Lod i givim komanmen long yumi blong bildimap ol tempol blong mekem se yumi save kasem ol tabu odinens.

• Maet ol memba blong klas oli save traem tingting long maen blong olgeta se oli stap laef long Nauvu long 1841, mo oli stap wok long Nauvu Tempol taem wan fren i askem: “From wanem yumi stap gohed blong bildimap ol tempol ia?” ?Wanem nao bae yumi talem long fren ia? Ol memba blong klas oli save lukaotem ol aedia long Doktrin mo Ol Kavenan 124:28–30, 37–42, 55. Sapos sam memba blong klas oli no save gud long ol odinens we oli tokbaot long ol ves ia, tingting blong tokbaot moa ol stamba tingting mo ol blesing blong olgeta odinens ia. Luk long temples.ChurchofJesusChrist.org blong i save helpem yu blong save wanem we i stret blong tokbaot aotsaed long tempol, mo blong kasem sam pikja blong ol tempol we yu save soem long klas.

  Josef Smit wetem ol man long Nauvu Tempol

  Josef Smit long Nauvu Tempol, i kam long Gary E. Smith

Doktrin mo Ol Kavenan 124:45–55

Lod bae i blesem olgeta we oli stap traehad blong obei long ol komanmen blong Hem.

• Lod i bin givim komanmen long Ol Sent blong oli bildim wan tempol long Jakson Kaonti be “ol enemi blong olgeta oli bin blokem olgeta” (Doktrin mo Ol Kavenan 124:51). Long ol ves 49–55, long ples we Lod i tokbaot situesen ia, maet i gat wan mesej we i putum pis long maen blong ol pipol we oli wantem obei long ol komanmen blong God, be oli no save mekem from se i gat famli situesen o ol nara situesen. Yu save ridim ol ves ia wetem ol memba blong klas mo askem olgeta blong tingting long ol situesen we ol pipol oli no save mekem ol stret mo gud tingting blong hat blong olgeta from se situesen blong olgeta, we oli no save kontrolem, i no letem olgeta blong mekem. ?Wanem kaonsel nao yumi faenem long ol ves ia we i save helpem wan long kaen situesen olsem? ?Wanem nao ol ves ia oli stap tijim yumi long saed blong fasin blong stap obei?

Doktrin mo Ol Kavenan 124:91–92

Bae Lod i lidim yumi tru ol petriakel blesing.

• ?Bae i gud long ol memba blong klas blong yu blong oli toktok raon long ol petriak mo ol petriakel blesing? Yu save stat wetem wan invitesen blong ol memba blong klas oli ridim Doktrin mo Ol Kavenan 124:91–92, mo lukaotem wanem we Lod i singaotem Haeram Smit blong mekem. Afta, yu save raetem long bod: Wanem mo From Wanem mo invaetem ol memba blong klas blong ridim“Petriakel Blesing” (Stap Tru long Fet, 134–135) blong faenemaot wanem hem i wan petriakel blesing mo from wanem nao oli impoten tumas. ?Olsem wanem nao wan i save rere blong kasem wan petriakel blesing? Tingting blong invaetem sam pipol we oli kasem petriakel blesing blong olgeta finis blong oli serem from wanem oli talem tangkyu tumas from hemia. (Rimaenem olgeta blong no serem eni samting we i praevet tumas, o i tabu tumas we i kamaot long ol blesing ia.) ?Olsem wanem nao yumi save soem we yumi tekem petriakel blesing blong yumi i impoten mo stap holemtaet gud?

Stap Kam Antap long Fasin blong Yumi blong Stap Tij

Prea from ol memba blong klas blong yu. Prea mo talem nem blong ol pipol we yu stap tijim olgeta. Yu save prea blong andastanem ol nid blong olgeta, mo blong save wanem blong tijim blong save lukluk long olgeta nid ia. Yu save askem tu long Papa long Heven blong “mekem hat blong olgeta i rere” (Alma 16:16) blong kasem ol trutok we bae yu tijim olgeta. (Luk long Teaching in the Savior’s Way, 6.)