“11–17 Oktoba. Doktrin mo Ol Kavenan 115–120: ‘From Sakrifaes blong Hem Bae I Moa Tabu long Mi Bitim Eni Gud Wok blong Hem,’” Kam Folem Mi—Blong Sandei Skul: Doktrin mo Ol Kavenan 2021 (2020)
“11–17 Oktoba. Doktrin mo Ol Kavenan 115–120,” Kam Folem Mi—Blong Sandei Skul: 2021
Fa Wes, i kam long Al Rounds
11–17 Oktoba
Doktrin mo Ol Kavenan 115–120
“From Sakrifaes blong Hem Bae I Moa Tabu long Mi Bitim Eni Gud Wok blong Hem”
Taem yu stap rere blong tij, tingbaot se stamba gol blong yu, hem i blong helpem ol narawan blong oli bildimap fet blong olgeta long Jisas Kraes.
Raetemdaon Ol Filing mo Tingting blong Yu
Invaetem Man blong Serem Wanem Oli Gat
Bifo yu tokabaot ol prinsipol we oli stap long ol seksen 115–120 we oli gat mining long yu, askem ol memba blong klas blong oli serem wanem i gat mining long olgeta. Eksampol, yu save invaetem ol memba blong klas blong finisim haf sentens ia: “Mi mi glad tumas we mi ridim ol seksen 115–120 from se …”
Stap Tijim Doktrin
Jos Ia blong Jisas Kraes blong Ol Lata-dei Sent, hem i protektem man mo i wan ples blong stap sef long hem.
-
Ol memba blong klas oli save luklukgud insaed long mesej blong Presiden Russel M. Nelson: “Stret Nem blong Jos” ( Liahona, Nov 2018, 87–90) blong gat sam niu tingting we bae i save helpem olgeta blong andastanem ol ves 4–6. ?From wanem i impoten blong yusum stret nem blong Jos?
-
Afta we yufala i rid tugeta long Doktrin mo Ol Kavenan 115:4–6, ol memba blong klas oli save toktok raon long hao nao Jos mo ol memba blong hem oli olsem wan laet o wan flag. Yu save soem wan pikja blong wan laethaos we i stap stanap long medel blong strong win, mo askem ol memba blong klas olsem wanem pikja ia i go wetem mesej we i stap long ol ves 5–6. ?Olsem wanem nao, blong kam wanples long “Saeon mo ol stek blong hem” i mekem se yu “haed long strong win”? (Vesves 6).
PikjalaethaosYumi save saen olsem ol laet blong helpem ol narawan blong oli faenem wan sef ples insaed long Jos.
Long Lod, ol sakrifaes blong yumi oli tabu.
-
Invaetem ol memba blong klas blong traem tingting long maen blong olgeta se oli Niuwel K. Witni, o waef blong hem, Elisabet, we i gat wan stoa we i wok gud long Ketlan, be Lod i askem olgeta blong lego propeti blong olgeta mo muv i go long Misuri. Afta, oli save ridim ol ves 1–11 mo serem wan samting we Lod i talem se bae i helpem olgeta blong mekem sakrifaes ia.
-
Ol tul we man i save luk, i save helpem ol memba blong klas blong tingting long “samting we i smol tumas” we samtaem yumi kavetem tumas, mo yumi no tingting “long ol samting we oli moa impoten” (ves 8). Tingting blong soem sam samting, olsem wan drop blong wota mo wan botel wota, o wan pis joklet mo wan bigfala ful joklet. Mebi ol memba blong klas oli save tingting long sam nara eksampol. Mo tu, yu save raetem smol samting mo samting we i moa impoten long bod, mo askem ol memba blong klas blong raetem lis blong sam eksampol we yumi nidim blong “lego” (ves 5) blong save kasem ol “fulap” samting blong God (ves 7).
-
Sapos ol memba blong klas oli gat eni tingting mo filing taem oli stap ridim ol toktok blong Lod abaot Oliva Granja long ol ves 12–15, invaetem olgeta blong serem hemia. ?From wanem ol sakrifaes blong yumi oli moa tabu long Lod bitim ol moa samting we yumi kasem?
Taem yumi pem taeting, yumi stap help blong bildimap mo “mekem graon blong Saeon i kam tabu.”
-
Traem tingting long paoa long saed blong spirit we i save kam sapos ol memba blong klas oli serem, wetem wanwan long olgeta, ol blesing we oli bin kasem from oli stap obei long loa blong taeting. Oli save ridim Doktrin mo Ol Kavenan 119:6 mo toktok raon long hao nao loa ia i save “mekem graon blong Saeon i kam tabu,” mo mekem wod o branj blong yumi “i wan graon blong Saeon blong yumi.” Oli save ridim tu long Malakae 3:8–12 blong faenemaot ol blesing we Lod i promesem taem wan i pem taeting.
-
Sapos ol memba blong klas oli gat ol kwestin abaot hao oli stap yusum taeting, yu save invaetem olgeta blong ridim seksen 120 mo hao oli eksplenem hemia long “Sam Moa Risos.” (Elda David A. Bednar i tokbaot gud hemia tu long “Ol Windo blong Heven” [ churchofjesuschrist.org/general-conference/2013/10?lang=bis, Okt 2013].) ?Olsem wanem yumi save helpem ol narawan blong oli gat moa fet long loa ia blong Lod long saed blong taeting?
Sam Moa Risos
Kaonsel we I Lukaotem Mane blong Taeting
Elda Robert D. Hales i bin talem:
“Olsem we Lod i talemaot tru long revelesen, fasin blong yusum taeting, wan kaonsel i disaed long hem; insaed long kaonsel ia i gat Fas Presidensi, Kworom blong Olgeta Twelef Aposol, mo Prisaeding Bisoprik. Lod i talemaot stret se wok blong kaonsel ia, bae i kamaot ‘tru long voes blong mi i go long olgeta’ [Doktrin mo Ol Kavenan 120:1]. Kaonsel ia, oli singaotem Kaonsel we I Lukaotem Mane blong Taeting
“Hem i gud tumas blong witnesem kaonsel ia i stap mekem folem voes blong Lod. Wanwan memba i save gud finis wanem i stap, mo i tekpat long evri desisen blong kaonsel. I no gat wan desisen we oli mekem kasem we ful kaonsel i agri long hem. Evri mane blong taeting, oli spendem from ol stamba tingting blong Jos, wetem hemia blong gudlaef—blong kea long olgeta we oli pua mo olgeta we oli stap long nid—ol tempol, ol bilding, mo blong lukaot gud long ol mitinghaos, edukesen, kurikulom—long sot toktok, wok blong Lod. …
“ … mi talem testemoni blong mi abaot Kaonsel we I Lukaotem Mane blong Taeting. Mi bin sidaon long kaonsel ia blong 17 yia, olsem Prisaeding Bisop blong Jos mo naoia olsem wan memba blong Kworom blong Olgeta Twelef Aposol. Evri, evri taem, oli bin yusum mane blong taeting blong Jos ia long ol stret stamba tingting blong Hem” (“Tithing: A Test of Faith with Eternal Blessings,” Ensign o Liahona, Nov. 2002, 28).
Stap Kam Antap long Fasin blong Yumi blong Stap Tij
Invaetem olgeta we oli stap lanem samting blong oli stap tijim wanwan long olgeta bakegen. “Maet bae i stret blong invaetem olgeta we oli stap lan blong oli helhelpem wanwan long olgeta blong oli faenem ol ansa long ol kwestin blong olgeta bakegen. Taem we Spirit i talem long yu, yu save disaed blong mekem hemia iven sapos yu filim se yu save ansa blong hem” (Teaching in the Savior’s Way, 24).