Libeti Kalabus

Libeti Kalabus long Springtaem, i kam long Al Rounds

18–24 Oktoba

Doktrin mo Ol Kavenan 121–123

“O God, ?Yu Yu Stap Wea?”

Bes wei blong rere blong tij, hem i blong ridim ol skripja, blong tingbaot ol pipol we yu stap tijim, mo folem Spirit. Ol aktiviti long aotlaen ia oli kam sapotem insperesen we yu kasem.

Raetemdaon Ol Filing mo Tingting blong Yu

serem pikja bokis

Invaetem Man blong Serem Wanem Oli Gat

Invaetem ol memba blong klas blong jusum wan mesej aot long Doktrin mo Ol Kavenan 121–123 we oli wantem serem wetem wan we i stap safa. Givim taem long olgeta blong oli eksplenem joes blong olgeta.

tijing pikja bokis

Stap Tijim Doktrin

Doktrin mo Ol Kavenan 121:1–33; 122

Sapos yumi stap strong tru long ol tes blong yumi long stret fasin, bae God i givim praes blong yumi antap long heven.

• Maet yu save gat ol memba blong klas we oli gat ol had tes, mo oli gat ol semmak filing olsem we Josef Smit i bin gotru long hem long Doktrin mo Ol Kavenan 121:1–6. Afta we yufala i ridim ol ves ia tugeta, yu save invaetem ol memba blong klas blong faenemaot mo serem ol mesej insaed long ol ves 7–33 we oli givim hop mo kamfot long olgeta long taem blong ol tes blong olgeta. ?Hem i minim wanem blong “mekem gud blong stap strong”? (ves 8). ?Olsem wanem Sevya i helpem yumi blong mekem gud blong stap strong? ?Olsem wanem yumi helpem wanwan long yumi blong mekem gud blong stap strong?

• Blong helpem ol memba blong klas blong tekem olsem wanem ol tes oli “givim eksperiens long [yumi], mo bae i blong gud blong [yumi]” (Doktrin mo Ol Kavenan 122:7), yu save givim wan pis pepa mo askem olgeta blong raetemdaon wan tes we oli bin gotru long hem. Long nara saed blong pepa, ol memba blong klas oli save raetem ol toktok ia “eksperiens,” mo “gud.” Taem yufala i stap toktok raon tugeta long Doktrin mo Ol Kavenan 122, leftemap tingting blong ol memba blong klas blong raetem eni tingting we oli gat abaot “nara saed” blong ol tes blong olgeta: “eksperiens” o “gud” we oli bin kasem. Bae samfala memba blong klas oli filim oraet blong serem olsem wanem ol tes blong olgeta i kamaot i blong gud blong olgeta. O, oli save ridim eksperiens blong Elda Koichi Aoyagi insaed long “Stap long Rod blong Yu” (  churchofjesuschrist.org/general-conference/2015/10?lang=bis, Nov 2015).

Doktrin mo Ol Kavenan 121:34–46

Yumi mas stap stret mo gud blong yusum “ol paoa blong heven.”

• Bae i intresting blong komperem olsem wanem man i holemtaet “paoa o paoa blong lidim tingting” long wol, wetem wei we Lod i tijim blong man i holemtaet o kontrolem paoa ia o paoa blong lidim tingting (luk long seksen 121). Blong help wetem toktok ia insaed long klas, yu save mekem tu kolom long bod, wan i karem taetol Paoa blong Wol Ia mo narawan i Ol Paoa blong Heven. Ol memba blong klas oli save fulumap ol kolom ia wetem ol toktok mo ol sentens we oli kamaot long Doktrin mo Ol Kavenan 121:34–46. ?Olsem wanem nao ol ves ia oli jenisim wei we yumi luk ol responsabiliti blong yumi insaed long ol famli blong yumi, olsem ol givhan brata mo sista, o long ol nara situesen we yumi hop blong gat paoa blong lidim ol narawan blong mekem gud?

• Wan wei blong toktok raon long kaonsel mo ol gudfala blesing we oli stap long Doktrin mo Ol Kavenan 121:45–46, hem i blong serem klas long ol grup mo askem wanwan grup blong stadi mo toktok raon long wan sentens we i kamaot long ol ves ia, olsem “letem klin fasin i flasem ol tingting blong yu oltaem,” o “olsem smolsmol ren blong moning i foldaon long heven i kamdaon.” Oli save lukluk i go long ol mining blong ol toktok, ridim ol skripja we oli go wetem we oli stap long futnot, mo toktok raon long wanem nao ol sentens ia oli minim long olgeta. Maet sam grup oli wantem droem ol pikja blong soemaot wanem sentens blong olgeta i talem. Invaetem wanwan grup blong serem wetem klas wanem we oli bin lanem.

Doktrin mo Ol Kavenan 122:8–9

Jisas Kraes i bin kamdaon, i go daon bitim evri samting, mo i mekem yumi kam strong moa long ol tes blong yumi.

• Blong stap andastanem se Jisas Kraes “i bin kamdaon mo i bin fesem bitim evri samting ia,” i save givim ol memba blong klas, tras ia blong tanem olgeta i go long Hem. Sam moa skripja ia, oli save help blong eksplenem wanem sentens ia i minim: Asea 53:3–4; Hibrus 2:17–18; 1 Nifae 11:16–33; Alma 7:11–13. Ol memba blong klas oli save ridim olgeta ves ia wetem ves ia tu, Doktrin mo Ol Kavenan 122:8, mo lukaotem wan samting we bae i bildimap fet blong olgeta se Jisas Kraes i save helpem olgeta long ol tes blong olgeta. Mo tu, oli save faenem insperesen insaed long ol hym abaot Sevya, olsem “Where Can I Turn for Peace?” (Hymns, no. 129).

• Toktok we i stap insaed long “Sam Moa Risos,” i givim sam moa niu tingting abaot wei we Sevya i bin kamdaon, i fesem i bitim evri samting. Maet bae yu tingting long wan wei blong soemaot se i olsem wanem taem yu stap “andanit” long wan hevi samting, i mekem se yu yu “stap long stret ples blong leftemap hevi samting ia.” ?Olsem wanem nao we, taem yu save se Sevya i bin kamdaon i fesem i bitim evri samting, i helpem yumi long taem blong tes blong yumi?

  Jisas we I Stap long Graon long Getsemane

  Jisas i andastanem ol safaring blong yumi. I No Olsem Tingting blong Mi, be Olsem Tingting blong Yu i kam long Walter Rane

sam moa risos pikja bokis

Sam Moa Risos

Kraes i kam daon i bitim evri samting.

Presiden Dallin H. Oaks i tijim: “I gat ol milian man we oli fraet long God, we oli prea long God blong Hem i tekemaot olgeta long hadtaem blong olgeta. Sevya blong yumi i talemaot se Hem i ‘kamdaon i bitim evri samting’ (D&K 88:6). Olsem we Elda Neal A. Maxwell i bin tijim: “From se Hem i bin kamdaon i fesem i bitim evri samting,” nao Hem i save andastanem we i stret evriwan mo Hemwan, ful paoa blong safaring blong ol man’ [Ensign, Nov. 1997, 23]. Yumi save talem se from se Hem i bin kamdaon bitim evri samting, Hem i stap long stret ples blong leftemap yumi, mo givim yumi paoa ia we yumi nidim blong stap strong tru long ol hadtaem blong yumi.” (“Kam Strong Moa Tru long Atonmen blong Jisas Kraes,”   churchofjesuschrist.org/general-conference/2015/10?lang=bis, Okt 2015).

Kam Antap long Fasin blong Yumi blong Stap Tij

Koling blong yu i kam tru long insperesen. Olsem wan tija, Lod i bin singaotem yu blong blesem ol pikinini blong Hem. Hem i wantem yu blong gat sakses; mekem se taem yu laef klin inaf blong kasem help blong Hem, bambae Hem i givim yu revelesen ia we yu nidim (luk long Teaching in the Savior’s Way, 5).