Ketlan Tempol, i kam long Jon McNaughton

27 Septemba–3 Oktoba

Doktrin mo Ol Kavenan 109–110

“Hem I Haos blong Yu, Wan Ples blong Tabu Fasin blong Yu”

Ol seksen 109 mo 110 oli tokbaot sam long ol taem blong Restoresen ia oli moa tabu. Meksua blong letem ol memba blong klas oli serem wanem we oli bin tingting long hem mo filim taem oli bin stap stadi long olgeta taem ia we i hapen finis.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Lod i bin talem se “nem blong haos ia [Ketlan Tempol] bae i go kasem ol kantri long narafala ples” (Doktrin mo Ol Kavenan 110:10). Yu save invaetem ol memba blong klas blong oli serem wan samting we oli faenem insaed long stadi blong olgeta we oli filim se i mas go kasem ol pipol raon long wol ia.

Stap Tijim Doktrin

Doktrin mo Ol Kavenan 109; 110:1–10

Lod i wantem blesem yumi insaed long tabu haos blong Hem.

• Blong stap stadi long seksen 109 i wan gudfala janis blong helpem ol memba blong klas blong yu blong mekem strong tingting blong hat blong olgeta blong stap wosip insaed long tempol. Yu save raetem long bod ol namba ia blong sam ves we i tokbaot ol blesing blong tempol—olsem ol ves 12–13, 22–23, 24–28, 29–32. Ol memba blong klas oli save jusum sam ves blong ridim mo tingting hevi long olgeta; oli save mekem hemia olgetawan o long grup, mo afta, talem sot long klas ol blesing we ol ves ia oli tokbaot. Ol memba we oli go long tempol finis, oli save serem olsem wanem oli bin gat eksperiens long ol blesing ia insaed long laef blong olgeta.

  Mo tu, yu save ridim o singsing tugeta “Spirit Olsem Faea” STSP, pej 28), we oli bin singsing long hem long dedikesen blong Ketlan Tempol. Ol memba blong klas oli save poenemaot ol blesing blong tempol we hym ia i tokbaot, mo serem eni eksperiens we i go wetem we oli bin gat, olsem we i stret blong serem.

• Blong stap kasem ol blesing blong tempol, plante taem i nidim sakrifaes. ?Wanem nao Doktrin mo Ol Kavenan 109:5 i tijim abaot ol sakrifaes blong ol fasfala Sent, we oli bin mekem blong bildimap Ketlan Tempol? Maet wan i save kam long klas we hem i rere finis blong tokbaot ol sakrifaes ia (luk long “A House for Our God,” Revelations in Context, 169–71). ?Wanem sakrifaes nao yumi stap mekem blong kasem ol blesing blong tempol tedei? Maet samfala memba blong klas bae oli glad blong serem ol eksperiens blong olgeta. I gat sam eksampol blong laef tedei we oli stap long ol vidio ia: “Sealed Together: The Manaus Temple Caravan” mo “Temples Are a Beacon” (ChurchofJesusChrist.org).

• Blong stadi abaot wanem oli talem abaot Sevya we i girap long ded insaed long Doktrin mo Ol Kavenan 110: 1–10 i wan gudfala wei blong bildimap fet blong yumi long Jisas Kraes. Yu save askem ol memba blong klas blong oli notem pikja we i stap long ol ves ia, mo blong oli tingting se pikja ia i tijim wanem long yumi abaot Jisas Kraes. ?Wanem nao “flat samting we oli wokem wetem gol” i ripresentem? O voes ia we i “bigwan olsem noes blong bigfala solwota we i brok long rif” i minim wanem?

  

  Insaed long Ketlan Tempol wanwan en i gat ol pulpit i stap long hem blong ol prishud lida oli yusum.

Doktrin mo Ol Kavenan 110:11–16

Ol prishud ki we yumi nidim blong mekem wok blong God i kamtru tedei, i stap finis insaed long Jos.

• Blong helpem ol memba blong klas blong andastanem ol prishud ki we Moses, Elaeas, mo Elaeja oli kam givim long Josef Smit mo Oliva Kaodri insaed long Ketlan Tempol, yu save invaetem olgeta blong ridim mo toktok raon long toktok ia we i stap long “Sam Moa Risos;” oli save mekem hemia wanwan o olsem wan grup. ?From wanem nao ol ki ia oli impoten tumas insaed long laef blong yumi naoia? Yu save askem tu long wanwan memba blong klas blong jusum wan long ol profet we oli bin givim ol ki ia—Moses, Elaeas, mo Elaeja—mo lan abaot hem aot long Bible Dictionary o Gaed long Ol Skripja. ?Wanem nao laef blong ol profet ia oli stap tijim yumi abaot ol ki. we oli bin kasem? Hemia i save lidim toktok storian insaed long klas abaot wanem Lod i wantem luk yumi mekem, naoia we ol ki ia oli stap long wol.

Sam Moa Risos

Ol ki oli givim paoa mo atoriti blong wok blong God.

Elda Quentin L. Cook i eksplenem:

“Ketlan Tempol, folem ples mo saes blong hem, i no klia tumas. Be long saed blong bigfala mining blong hem long famli blong man, i tajem man blong taem we i no save finis. Ol profet blong bifo oli bin putumbak ol prishud ki blong mekem se ol odinens blong gospel blong Jisas Kraes we i sevem man blong taem we i no save finis oli stap. Hemia i mekem se bigbigfala glad i kam long ol fetful memba.

“Olgeta ki ia, oli givim ‘paoa we i kam long heven,’ Doktrin mo Ol Kavenan 38:38 from ol tabu responsabiliti we God i givim, we bifo mo tedei, oli stap olsem fas stamba tingting blong Jos. Long gudfala dei ia long Ketlan Tempol, oli putumbak ol trifala ki ia:

“Faswan, Moses i kamkamaot mo i givim ol ki blong kam tugeta blong Isrel aot long ol fo kona blong wol ia, we i misinari wok.

“Nambatu, Elaeas i kamkamaot mo givim ol ki blong dispensesen blong gospel blong Ebraham, we insaed, i putumbak kavenan blong Ebraham [luk long Ebraham 2:8–11]. Presiden Russell M. Nelson i bin tijim se stamba tingting blong ol ki blong kavenan i blong mekem ol memba oli rere from kingdom blong God [luk long “Covenants,” Ensign o Liahona, Nov. 2011, 88]. …

“Nambatri, Elaeja i kamkamaot mo givim ol ki blong siling paoa insaed long dispensesen ia, we i wok blong famli histri mo mekem ol tempol odinens, we i mekem se Kraes i save sevem olgeta we oli laef mo olgeta we oli ded” (“Rere blong Mitim God,”   Liahona, Mei 2018, 114–15).

Stap Kam Antap long Fasin blong Yumi blong Stap Tij

Invaetem Spirit insaed long tijing blong yu. “Nambawan stamba tingting blong evri samting we wan gospel tija i mekem—evri kwestin, evri skripja, evri aktiviti—hem i blong invaetem Spirit blong bildimap fet mo blong invaetem evriwan blong kam long Kraes. … Tabu miusik, ol skripja, ol toktok blong ol profet blong lata-dei, ol fasin blong soemaot lav mo testemoni, mo ol kwaet taem blong tingting long samting, oli save invaetem Spirit blong kam stap” (Teaching in the Savior’s Way, 10).