4–10 Oktoba

Doktrin mo Ol Kavenan 111–114

“Bae Mi Givim Oda long Evri Samting blong Gud blong Yufala”

Taem yufala i stap ridim Doktrin mo Ol Kavenan 111–114, tingting long ol trutok long saed blong spirit we Lod i wantem ol memba blong klas blong yu oli andastanem. Tabu Spirit bae i help blong lidim yu blong save wanem prinsipol blong lukluk long hem nomo.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

Tingting blong droem wan bokis blong ol rij samting, antap long bod. Ol memba blong klas oli save raetem long bod ol ves we oli kamaot long ol seksen 111–14 oli mas faenem wan samting we oli tekem se i “ol rij samting” (Doktrin mo Ol Kavenan 111:2). Askem samfala memba blong oli serem wanem we oli faenem we i impoten tumas insaed long ol ves ia.

Stap Tijim Doktrin

Doktrin mo Ol Kavenan 111

Lod i save “givim oda long evri samting blong gud blong” [yumi].

• Kaonsel blong Lod insaed long Doktrin mo Ol Kavenan 111 i save helpem ol memba blong klas blong yu taem oli stap wari long saed blong ol samting blong laef ia o ol samting long saed blong spirit, hemia semmak olsem i bin helpem Josef Smit wetem ol wari blong hem long saed blong Saeon. Yu save statem wan storian abaot seksen ia taem yu invaetem ol memba blong klas blong mekem wan lis, antap long bod, blong ol samting we olgeta, o ol pipol we oli save olgeta, oli stap wari long hem. Afta, wetem ol wari ia long maen, oli save luklukgud insaed long seksen 111 blong faenem sam kaonsel mo kamfot we Lod i givim blong helpem yumi. Ol memba blong klas oli save serem olsem wanem Sevya i bin helpem olgeta taem oli bin putum fet blong olgeta long Hem.

• Maet ol memba blong klas oli bin gat sam eksperiens olsem hemia blong Josef—taem we oli bin filim we Lod i akseptem olgeta i nomata ol “krangke” blong olgeta (Doktrin mo Ol Kavenan 111:1). ?Olsem wanem ol eksperiens blong olgeta oli stap olsem eksampol blong ol trutok we oli tijim insaed long Doktrin mo Ol Kavenan 111? Eksampol: ?wetaem nao oli bin filim se Lod i bin givim oda long evri samting blong gud blong olgeta? (ves 11). ?Wanem nao ol eksperiens ia oli tijim olgeta abaot Sevya mo abaot olgetawan bakegen?

Doktrin mo Ol Kavenan 112:3–15, 22

Lod bae i lidim olgeta we oli gat tingting we i stap daon mo stap lukaotem wanem Hem i wantem.

• Blong helpem ol memba blong klas blong toktok raon long wanem seksen 112 i stap tijim abaot fasin blong putum tingting i stap daon, tingting blong serem klas long trifala grup. Givim, long wanwan grup, wan long ol kwestin ia blong oli tingting hevi long hem taem oli stap luklukbak long ol ves 3–15 mo 22: ?Wanem hem i fasin blong putum tingting i stap daon? ?Olsem wanem nao yumi save gat moa tingting i stap daon? ?Wanem blesing nao Lod i promesem long olgeta we oli gat tingting i stap daon? Givim taem long klas blong oli serem ol ansa blong olgeta. Ol grup ia oli save kasem moa niu tingting sapos oli ridim toktok blong Elda Quentin L. Cook insaed long “Sam Moa Risos,’ o seksen ia we taetol blong hem i “Fasin blong Putum Tingting I Stap Daon” insaed long Prijim Gospel blong Mi (ol pej 126–27). ?From wanem fasin blong putum tingting i stap daon i wan mas blong mekem wok ia blong Lod?

  

  Sapos yumi gat tingting i stap daon, bae Lod i lidim yumi mo i ansarem ol prea blong yumi.

Doktrin mo Ol Kavenan 112:12–26

Olgeta we oli rili jenisim laef blong olgeta, oli kam blong save Jisas Kraes.

• Wanem i bin hapen we i luk samfala Aposol, long 1837, oli bin tanem olgeta agensem Profet, i wan gudfala samting we i mekem yumi tingbaot se, i nomata wanem koling yumi gat o hamas yumi save abaot gospel, wanwan, long wanwan laef blong yumiwan, i mas mekemsua se yumi jenisim laef tru. Sapos klas blong yu i ridim kaonsel we Lod i bin givim long Tomas B. Mars blong helpem hem blong mekem Kworom blong Olgeta Twelef Aposol i kam wan, i save givim sam niu tingting long saed blong mining blong fasin blong jenisim laef. Maet ol memba blong klas blong yu oli save ridim Doktrin mo Ol Kavenan 112:12-26 wetem wan memba blong famli o wan fren i stap long maen blong hem—wan we maet i gat hadtaem wetem fet blong hem. ?Wanem trutok we i stap insaed long ol ves ia we ol memba blong klas oli save tokbaot gud, we bae i helpem man o woman ia blong kam blong jenisim laef blong hem fulwan? Givim taem long ol memba blong klas blong oli tingting hevi long wanem oli save mekem blong mekem se olgeta tu oli jenisim laef blong olgeta i go long Lod.

Sam Moa Risos

Fasin ia blong Kraes, blong gat tingting i stap daon.

Elda Quentin L. Cook i tijim:

“Sore tumas, long taem tedei, long evri pat blong sosaeti, yumi luk se man i tekem se hemwan i impoten, o i hae, mo man i nomo tekem se fasin blong gat tingting i stap daon mo fasin blong stap akaontebol long God i impoten. Plante long sosaeti, i lusum angka blong hem mo i no andastanem from wanem yumi stap long wol ia. Tru fasin blong gat tingting i stap daon, we i wan mas blong mekem stamba tingting we Lod i gat long yumi, i nomo kamaot evri taem.

“Hem i impoten blong andastanem hamas nao fasin blong Kraes blong gat tingting i stap daon, stret mogud fasin blong Hem, fasin mo waes blong Hem, oli stap olsem eksampol insaed long ol skripja. Hem i no waes nating blong no tingting hevi long nid ia blong gogohed blong traehad blong kasem ol kwaliti mo fasin ia olsem hemia blong Kraes long evri dei, speseli hemia blong gat tingting i stap daon. …

“Long 23 Julae 1837, Profet Josef i mit wetem Elda Tomas B. Mars, Presiden blong Kworom blong Olgeta Twelef. Oli luk gud se Elda Mars i no glad se Profet i bin singaotem tu memba blong kworom blong hem blong go long Inglan mo i no toktok wetem hem fastaem. Taem we Josef i mit wetem Elda Mars, eni filing we i harem nogud i go long saed, mo Profet i kasem wan bigfala revelesen. Naoia, hem i namba 112 seksen blong Doktrin mo Ol Kavenan. Hem i givim bigfala daereksen we i kam long heven long saed blong fasin blong gat tingting i stap daon mo long saed blong misinari wok; Ves 10 i rid olsem:, ‘Putum tingting blong yu i stap daon; mo Lod, God blong yu, bae i tekem han blong yu mo lidim yu, mo givim ansa long ol prea blong yu’ [Doktrin mo Ol Kavenan 112:10; oli ademap italik]” (“Evri Dei Ia we I No Save Finis,”  https://www.churchofjesuschrist.org/general-conference/2017/10?lang=bis, Okt 2017).

Stap Kam Antap long Fasin blong Yumi blong Stap Tij

Lukluk nomo long ol pipol. “Wei we yu tritim ol pipol, i impoten i semmak nomo long wanem yu stap tijim olgeta. Samtaem, yumi tingting tumas blong presentem wan lesen we i save stopem yumi blong talemaot lav blong yumi long olgeta we yumi stap tijim olgeta. … Tingting long wei we bae yu lukluk nomo long wanem we i impoten moa” (Teaching in the Savior’s Way, 6).