Nativiti long Kopa mo Amba, i kam long J. Kirk Richards

20–26 Disemba

Krismes

Presen Ia blong Tabu Pikinini blong God we I No Gat Samting I Bitim

Tingbaot se fasin blong ol memba blong klas oli lanem gospel we i moa impoten mo i wok gud moa, i hapen insaed long hom blong olgeta. Taem yu stap rere blong tij, tingting long wei we Sandei Skul Klas blong yu i save mekem famli stadi mo stadi blong wanwan i kam strong moa.

Raetemdaon Ol Filing mo Tingting blong Yu

Invaetem Man blong Serem Wanem Oli Gat

?Long wanem wei nao stadi blong “Kraes we I Laef” (ChurchofJesusChrist.org) long wik ia i blesem ol memba blong klas blong yu? Maet bae yu serem ol toktok ia we oli kam long Presiden Jean B. Bingham, Jeneral Presiden blong Rilif Sosaeti, mo invaetem ol memba blong klas blong tokbaot eni semmak eksperiens we oli bin gat: “Taem mi bin stap stadi long laef mo ol tijing blong Jisas Kraes, mo lukluk moa long olgeta mo komitim moa blong save gud long ‘Kraes we I Laef’ tangkyu mo lav blong mi long Sevya blong yumi i kam antap moa. Wanwan sentens we i kamaot long pepa ia we i kam tru long insperesen, i wan tabu tok i stap long hem mo i mekem mi andastanem gud moa ol tabu rol blong mi mo misin blong mi long wol ia. Wanem we mi bin lanem mo filim tru long taem blong stadi ia mo taem blong tingting longwan, i bin konfemem se Jisas i rili “laet ia, laef ia mo hop blong wol ia’” (“That Your Joy Might Be Full,” Ensign o Liahona, Nov. 2017, 85).

Stap Tijim Doktrin

“I no gat nara man we i save gat bigfala paoa olsem blong lidim tingting blong man.”

• Ol memba blong klas oli save ridim laod fas paragraf blong “Kraes we I Laef” mo serem ol tingting blong olgeta long risen from wanem paoa blong Jisas Kraes blong lidim ol tingting i bin moa dip mo bigwan bitim hemia blong wan narawan. ?Wanem nara toktok insaed long “Kraes we I Laef” i sapotem toktok ia? Invaetem ol memba blong klas blong serem olsem wanem Hem i bin lidim tingting blong olgetawan. Vidio ia: “Why We Need a Savior” (ChurchofJesusChrist.org) i save kam komplitim klas storian blong yufala.

• ?I bin gat wan taem we ol memba blong klas oli mas eksplenem long wan we i gat nara kalja se from wanem oli stap selebretem Krismes? Maet oli save serem ol eksperiens blong olgeta. O, yu save invaetem ol memba blong klas blong traem tingting long maen blong olgeta we wan i askem kwestin ia long hem, mo man o woman ia i no save gud long Kristin fasin. ?Hao nao bae yumi ansa long kwestin ia? Leftemap tingting blong ol memba blong klas blong luklukbak long “Kraes we I Laef” wetem kwestin ia long maen, mo invaetem samfala blong serem ol tingting blong olgeta. Olsem wan klas, yu save ridim Luk 2:10–14 o singsing wan hym we i talemaot glad ia blong Krismes taem (olsem “Joy to the World,” Hymns, no. 201) mo tokbaot from wanem taem we Kraes i bin bon i kam long wol ia, i bin tekem “bigfala glad” i kam. ?Wanem nao yumi save mekem blong welkamem King blong yumi?

  

  Laet blong Wol, long Howard Lyon

“Yumi talem tangkyu long God from presen ia [blong Hem] we i no gat samting i bitim.”

• Insaed long “Kraes we I Laef,” ol Aposol oli talem se Sevya i wan “presen” we i kam long Papa long Heven. Blong helpem ol memba blong klas blong oli lan moa abaot presen ia, yu save raetem long bod: Tru long Jisas Kraes, God i givim yumi presen ia we i … mo invaetem ol memba blong klas blong givim tingting long sam wei blong komplitim sentens ia, hemia folem wanem we oli bin ridim insaed long “Kraes we I Laef” mo folem toktok blong Presiden Russel M. Nelson we i stap long “Sam Moa Risos.” ?Olsem wanem nao yumi kasem ol presen ia? Yu save invaetem ol memba blong klas blong jusum wan long ol presen ia mo blong wok blong kasem presen ia moa fulwan.

Sam Moa Risos

Presen ia we Sevya i gat blong givim.

Taem hem i bin toktok long taem blong Krismes, Presiden Russel M. Nelson i givim lis blong fofala presen we Sevya i givim long evriwan we oli wantem blong kasem olgeta:

Faswan, Hem i givim long yu mo mi wan paoa we i no gat en blong lavem man. Hemia i tekem tu, paoa blong lavem olgeta we i no posibol blong lavem olgeta, mo olgeta we oli no lavem yu, be tu, oli stap mekem nogud long yu mo stap yusum yu nogud.

“Wetem help blong Sevya, yumi save lanem blong lavem man semmak olsem we Hem i lavem man.

“Wan seken presen we Sevya i givim long yu, i paoa ia blong fogiv. Tru long bigfala Atonmen blong Hem, yu save fogivim olgeta we oli mekem nogud long yu, mo oli neva akseptem responsabiliti ia se oli mekem nogud tumas long yu.

“Wan nambatri presen we i kam long Sevya, i fasin blong sakem sin. Presen ia, plante taem yumi no andastanem gud tumas. … Fasin blong sakem sin i wan naesfala presen we i saen. Hem i wan rod we yumi no mas fraet long hem. Hem i wan presen blong yumi kasem wetem glad, mo blong yumi yusum—iven akseptem fulwan—dei afta dei, taem yumi stap lukaot blong kam moa olsem Sevya blong yumi. …

“Wan nambafo presen we i kam long Sevya, i wan promes—wan promes blong laef we i no gat en. Laef we i no save finis, i kaen kwaliti laef ia we Papa long Heven mo Pikinini we Hem i Lavem, Tufala i gat. Taem Papa i givim yumi laef we i no save finis, Hem i stap talem stret: ‘sapos yu jusum blong folem Pikinini blong Mi—sapos wanem yu wantem i rili blong kam moa olsem Hem—nao, wetem taem, bae yu save laef olsem mitufala i laef, mo prisaed ova long ol wol mo ol kingdom, semmak olsem Mitufala.’

“Olgeta fofala spesel presen ia, bae i givim yumi, moa mo moa glad taem yumi stap akseptem olgeta. Ol presen ia oli kam from se Jehova i bin agri blong kam long wol ia olsem bebi Jisas” “Four Gifts That Jesus Christ Offers to You”[ Presidensi Krismes Divosen, 2 Dis 2018], broadcasts.ChurchofJesusChrist.org).

Stap Kam Antap long Fasin blong Yumi blong Stap Tij

Rere yuwan long saed blong spirit. Gospel tijing we i gat paoa i no minim blong jes rere long wan lesen nomo, be i minim blong mekem yumiwan i rere. … Ol gospel tija we oli tij gud—oli no tingting blong mekem samting blong fulumap taem blong klas—be oli lukluk stret blong fulumap hat blong olgetawan wetem Tabu Spirit” (Teaching in the Savior’s Way, 12).