13–19 nō Tītema

Te ’Utuāfare : E Poro’i i tō te Ao nei

« ’Ua riro te ’utuāfare ’ei tumu nō te ’ōpuara’a a tei Hāmani »

’A tuatāpapa ai ’oe i « Te ’Utuāfare : E poro’i i tō te ao nei » i teie hepetoma, ’a feruri i te mau parau mau e pāturu i te mau pīahi i roto i tā rātou mau tauto’ora’a nō te ha’apūai i tō rātou mau fare ’e te ’utuāfare.

Pāpa’i i te mau mana’o e tae mai

Tītau i te mana’o

Nō te fa’aitoito i te mau pīahi ’ia fa’a’ite mai i te mau mea tā rātou i ’apo mai i teie hepetoma i roto i tā rātou tuatāpapara’a i te poro’i nō te ’utuāfare, e nehenehe ’oe e ani ia rātou ’ia mā’iti i te hō’ē paratarāfa ’e ’ia pū’ohu mai i roto hō’ē noa pereota i te mea tā te reira paratarāfa e ha’api’i ra.

Ha’api’i i te ha’api’ira’a tumu

« ’Ua riro te ’utuāfare ’ei tumu nō te ’ōpuara’a a tei Hāmani »

• ’Ua mātau te ta’ata i te ’Ēkālesia nō tāna tūra’ira’a i te parau nō te ’utuāfare, ’e tē fa’a’ite nei te poro’i nō te ’utuāfare i te mau tumu i te pae nō te ha’api’ira’a tumu nō te tūra’ira’a i te reira. Nō te fa’aitoito i te hō’ē ’āparaura’a nō ni’a i te reira, e nehenehe ’oe e ani i te mau pīahi ’ia feruri ē, ’ua ani mai te hō’ē ta’ata ia rātou nō te aha te ’Ēkālesia e tūra’i rahi ai i te parau nō te ’utuāfare. E aha te mau parau mau i roto i te poro’i tā tātou e nehenehe e fa’a’ite nō te pāhono i te uira’a a te reira ta’ata ?

• Hō’ē tumu nō te faufa’a rahi o te poro’i nō te ’utuāfare nō te mea ïa ē, tē ha’apāpū fa’ahou ra te reira i te mau parau mau e pāto’ihia nei i tō tātou nei ’anotau. E aha te mau parau mau i roto i te poro’i e tauturu ia tātou ’ia ’ore ’ia hema i te mau mana’o hape nō ni’a i te ’utuāfare i roto i te ao nei i teie mahana ? Nāhea teie mau parau mau i te fa’auru i te mau mā’itira’a tā tātou e rave ? E nehenehe te fa’ahitira’a parau a Elder Dallin H. Oaks i roto i « Te tahi atu mau rāve’a tauturu » e riro ’ei tauturu i te pāhonora’a i teie uira’a.

  

  E mea tano roa ’ia utuutu te mau metua i tā rātou mau tamari’i i roto i te here ’e te parauti’a.

« E mea pāpū a’e te ’oa’oa i roto i te orara’a ’utuāfare ’ia fa’atumuhia te reira i ni’a i te mau ha’api’ira’a a te Fatu ra ’o Iesu Mesia ».

• E nehenehe te ’āparaura’a i te mau parau tumu i roto i te paratarāfa ono ’e te hitu o te poro’i nō te ’utuāfare e tauturu i te mau melo o tā ’oe piha ha’api’ira’a ’ia fāri’i i te ’oa’oa rahi a’e i roto i tō rātou aura’a ’utuāfare. E nehenehe e pāpa’i i te mau parau tumu i ni’a i te tāpura ’ere’ere ’e e ani i te mau pīahi ’ia mā’iti i te hō’ē parau tumu nō te ’āparau ’āpitipiti. E nehenehe rātou e fa’a’ohipa i te mau uira’a mai teie nō te arata’i i tā rātou mau ’āparaura’a : E aha te mau hi’ora’a nō teie parau tumu tā tātou i ’ite i roto i te orara’a ’utuāfare ? Nāhea te orara’a i teie parau tumu i te hōro’a mai i te ’oa’oa i roto i tō tātou ’utuāfare ? Nāhea te orara’a i teie parau tumu i te tauturu i te fa’ariro i te Fa’aora ’ei niu nō tō tātou orara’a ’utuāfare ? E aha te mau pāpa’ira’a mo’a e nehenehe e tauturu i tō tātou ’utuāfare ’ia hāro’aro’a maita’i a’e i teie parau tumu ? (E nehenehe te mau melo nō te piha ha’api’ira’a e ’ite i te mau pāpa’ira’a mo’a i roto i te Arata’i nō te mau pāpa’ira’a mo’a [scriptures.ChurchofJesusChrist.org]). E nehenehe ïa i nā ta’ata to’opiti e fa’a’ite i te piha ha’api’ira’a i te mau mea tā rāua i ’apo mai.

  ’A ha’apāpū ē, noa atu te huru orara’a o tō tātou ’utuāfare i teie taime, e nehenehe tātou e tūtava ’ia patu i te hō’ē ’utuāfare mure ’ore i ni’a i te niu o te Fa’aora ’e tāna ’evanelia.

« Tē ti’aoro atu nei mātou i te huira’atira… ’ia rave i teie mau rāve’a ’o tei fa’a’itehia nō te ha’amau ’e nō te ha’apūai i te ’utuāfare ».

• Nāhea e nehenehe ai ia ’oe ’ia tauturu i te mau melo o tā ’oe piha ha’api’ira’a ’ia hāro’aro’a i tā rātou hōpoi’a ’ia turu i te mau parau mau i roto i te poro’i nō te ’utuāfare ? Nō te ha’amata i te ’āparaura’a, e tano ’ia ’āparau i te mea tā te mau pīahi i ’apo mai i roto i te upo’o parau o te poro’i. E aha te hō’ē poro’i ? E aha tei fa’ati’a i te Peresidenira’a Mātāmua ’e te ’āpo’ora’a o te Tino ’Ahuru Ma Piti ’Āpōsetolo ’ia hāmani i te hō’ē poro’i i tō te ao nō ni’a i te mau ’utuāfare ? E nehenehe te mau melo nō te piha ha’api’ira’a e tāpura i te mea tā rātou e mana’o ra e riro ’ei mau parau poro’i tumu nō te poro’i (’a fa’aitoito ia rātou ’ia fa’ahiti i te tahi mau tuha’a ta’a ’ē). I muri iho, e nehenehe rātou e ’āparau i te mau rāve’a nō te fa’ananea i teie mau parau poro’i i roto i tō rātou ’oire ’aore rā, i tō rātou fenua. I roto i te a’ora’a a te tuahine Bonnie L. Oscarson « ’Ei mau tino pāruru i te poro’i o te ’utuāfare » tē vai ra te mau hi’ora’a tā te piha ha’api’ira’a e nehenehe e hi’ohi’o ’āmui fa’ahou (Ensign ’e ’aore rā Liahona, Mē 2015, 14–17).

Te tahi atu mau rāve’a tauturu

Te mau ’utuāfare i roto i te fa’anahora’a a te Atua.

’Ua haʼapiʼi Elder Dallin H. Oaks ē :

« Te Feiā Mo’a i te mau Mahana Hope’a nei e māramarama i te fa’anahora’a nō te fa’aorara’a a te Atua, e hi’ora’a hō’ē roa tō rātou i ni’a i te ao, ’o tē tauturu ia rātou ’ia ’ite i te tumu o te mau fa’auera’a a te Atua, te nātura tāuiui ’ore o tāna mau ’ōro’a tītauhia, ’e te ti’ara’a tumu o tō tātou Fa’aora ia Iesu Mesia. Tē fa’aora nei te tāra’ehara a tō tātou Fa’aora ia tātou i te pohe ’e, mai te peu e tātarahapa tātou, e fa’aora-ato’a-hia tātou i tā tātou hara. Nā roto i te reira hi’ora’a i ni’a i te ao, e mea ta’a ’ē maita’i te mau mea mātāmua roa ’e te ravera’a a te Feiā Mo’a i te mau Mahana Hope’a nei, ’e ’ua ha’amaita’ihia rātou i te pūai nō te fa’a’oroma’i i te mau fa’a’erera’a ’e te mau māuiui o te orara’a tāhuti nei…

« ’Ua vauvauhia te fa’anahora’a ’evanelia tā te ’utuāfare tāta’itahi e ti’a ’ia pe’e ’ei fa’aineinera’a nō te ora mure ’ore ’e te fa’ateiteira’a, tei roto i te poro’i a te ’Ēkālesia nō te matahiti 1995 ‘Te ’Utuāfare : E Poro’i i tō te Ao nei.’ Te mau fa’a’itera’a i roto, e mea huru ta’a ’ē roa ïa i te mau ture, te mau ravera’a ’e te fa’atianira’a a te ao tā tātou e ora nei. I teie nei mahana, te mau ta’a-’ē-ra’a pāpū roa, ’o te fa’aeara’a ïa i te ta’ata ma te fa’aipoipo ’ore, te fa’aipoipora’a i te ta’ata nō tōna iho ’āpeni ’e te aupurura’a i te tamari’i i roto i terā huru aura’a. Rātou e ’ore e ti’aturi ’e e hia’ai i te fa’ateiteira’a ’e ’o tē ’amu’amu rahi nei i te peu a te ao, tē hi’o nei ïa rātou i teie poro’i nō ni’a i te ’utuāfare ’ei fa’ahitira’a ture e mea ti’a ’ia taui. I te tahi pae, tē ha’apāpū nei te Feiā Mo’a i te mau Mahana Hope’a nei ē, nā te poro’i nō ni’a i te ’utuāfare e fa’ata’a nei i te huru aura’a ’utuāfare i reira te tuha’a faufa’a roa a’e o tō tātou tupura’a mure ’ore e tupu ai » (« Te fa’anahora’a ’e te poro’i », Ensign ’e ’aore rā Liahona, Novema 2017, 29).

Ha’amaita’ira’a i tā tātou ha’api’ira’a

’A ora i te ’evanelia ma tō ’outou ’ā’au ato’a. « E tae mai te mana ’ia rave ana’e te hō’ē ’orometua ha’api’i i te mau mea ato’a e nehenehe iāna ’ia rave nō te fa’aineine, ’eiaha te ha’api’ira’a noa iho, te fa’atano-ato’a-ra’a rā i tōna orara’a i ni’a i te Vārua » (Boyd K. Packer, Teach Ye Diligently [1975], 306).