tīfaifai te fa’a’ite ra i te mau rima ’ū rau

Nō te mau melo tane ti’amā ato’a, nā Emma Allebes

6–12 nō Tītema

Te mau Hīro’a Fa’aro’o ’e te mau Fa’a’itera’a Mana 1 ’e te 2

« Tē ti’aturi nei mātou »

’A tai’o nā roto i te pure i te mau Hīro’a Fa’aro’o ’e te mau Fa’a’itera’a Mana 1 ’e te 2, ’e ’a ’imi i te fa’aurura’a a te Vārua Maita’i ’a fa’anaho ai ’oe i te hō’ē taime ha’api’ira’a fa’ahiahia nō te mau pīahi i te sābati.

Pāpa’i i te mau mana’o e tae mai

’ītona fa’a’itera’a

Tītau i te mana’o

E nehenehe ’oe e ani i te mau mau pīahi ’ia fa’ahope i teie fa’ahitira’a parau i muri nei : « Tē ’oa’oa nei au ’ua tai’o vau i te mau pāpa’ira’a mo’a i teie hepetoma nō te mea… »

’ītona ha’api’ira’a

Ha’api’i i te ha’api’ira’a tumu

Te mau Hīro’a Fa’aro’o

Tei roto i te mau Hīro’a Fa’aro’o te mau parau mau niu o te ’evanelia tei fa’aho’ihia mai.

• Teie te hō’ē rāve’a nō te tauturu i te mau pīahi ’ia fa’a’ite mai i te mea faufa’a ta’a ’ē tā rātou i ’ite i roto i te mau Hīro’a Fa’aro’o : E nehenehe ’oe e pāpa’i i te mau nūmera 1 ē tae atu i te 13 i ni’a i te tāpura ’ere’ere, ’e e ani i te mau pīahi ’ia pāpa’i i pīha’i iho i te mau nūmera i te hō’ē mea tā rātou i ’apo mai i roto i te hīro’a fa’aro’o nō tāua nūmera ra. E aha te ta’a-’ē-ra’a tā teie mau parau mau e fa’atupu i roto i tō tātou autā’atira’a ’e tō tātou Metua i te ao ra ’e ia Iesu Mesia ? E nehenehe paha te mau pīahi e fa’a’ite mai e mea nāhea te mau Hīro’a Fa’aro’o i te ha’amaita’ira’a i tā rātou tuatāpaparaa ’evanelia ’aore rā, i te tauturura’a ia rātou ’ia fa’a’ite i te ’evanelia ia vetahi ’ē.

Hīro’a Fa’aro’o 1:9 ; mau Fa’a’itera’a Mana 1 ’e te 2

Nā te heheura’a i te arata’i i te ’Ēkālesia a Iesu Mesia.

• Nō te aha e mea faufa’a nō tātou te heheura’a tāmau ? ’A ani i te mau pīahi ’ia fa’a’ite mai i tō rātou mau mana’o nō ni’a i teie uira’a. E nehenehe ato’a te mau melo nō te piha ha’api’ira’a e ’āparau e mea nāhea te heheura’a tāmau e tū’ati ai i ni’a i te mau Fa’a’itera’a Mana 1 ’e te 2. Tē hōro’a nei (Te arata’i ha’api’ira’a nō teie hepetoma i roto i te Mai pe’e mai—nō te ta’ata hō’ē ’e te ’utuāfare i te tahi mau rāve’a tauturu e tū’ati i ni’a i teie mau heheura’a). E aha tā tātou e ha’api’i mai nei i roto i te mau Fa’a’itera’a Mana 1 ’e te 2 nō ni’a i te ’ohipa a te heheura’a i roto i te arata’ira’a i te ’Ēkālesia ? (hi’o ato’a i te mau Hīro’a Fa’aro’o 1:9 ’e te fa’ahitira’a parau a te peresideni Gordon B. Hinckley i roto i « Tē tahi atu mau rāve’a tauturu »). E aha te tahi atu mau hi’ora’a heheura’a tāmau tā te mau pīahi e nehenehe e feruri ? Nāhea teie mau heheura’a i te fa’auru i tō tātou orara’a ’e i te tauturu ia tātou ’ia patu i te bāsileia o te Metua i te ao ra ?

• E nehenehe ’oe e ani i te mau pīahi ’ia hi’ohi’o fa’ahou i te mau Fa’a’itera’a Mana 1 ’e te 2 ’e ’ia fa’a’ite mai i te hō’ē mea i roto i teie mau heheura’a ’o tē nehenehe e tauturu i te hō’ē ta’ata e fifi nei nō te fāri’i i te hō’ē tauira’a ture, hō’ē heheura’a, ’aore rā, hō’ē parau ha’api’ira’a nā te ’Ēkālesia, e ’ere i te mea maoro a’enei. Nāhea te mau pīahi i te ha’api’i mai ’ia ti’aturi i te Atua ’ia fifi ana’e rātou i ni’a i te hō’ē mea i roto i te ’Ēkālesia ? Nāhea tā rātou tuatāpapara’a i teie hepetoma i te ha’apūaira’a i tō rātou fa’aro’o ē, tē fa’atere nei te Fatu i tāna ’Ēkālesia ? E nehenehe ato’a te mau mana’o o te peresideni Dieter F. Uchtdorf i roto i « Te tahi atu mau rāve’a tauturu » e tauturu.

  hōho’a pēni nō Wilford Woodruff

  Wilford Woodruff, nā H. E. Peterson.

’ītona nō tē tahi atu mau rāve’a tauturu

Te tahi atu mau rāve’a tauturu

« Tei reira te Vārua o te Atua ».

Tē tāvini ra te peresideni Gordon B. Hinckley ’ei melo nō te pupu nō te Tino ’Ahuru ma Piti ’āpōsetolo ’a fāri’ihia ai te heheura’a i fa’a’itehia i roto i te mau Fa’a’itera’a Mana 2. E rave rahi matahiti i muri mai, ’ua fa’a’ite mai ’oia i te ’ohipa i tupu :

« E mana’o ra’a ’e te mo’a tei pārahi i roto i te piha. Nō’u nei, mai te huru ra ē, ’ua matara te hō’ē terera’a i rōpū i te terono o te ra’i ’e te peropheta o te Atua tei ni’a i tōna turi ’e tē tāparu ra, ma te ’āpitihia atu e tōna mau taea’e. Tei reira te Vārua o te Atua. ’E nā roto i te mana o te Vārua Maita’i, ’ua tae mai ra i taua peropheta ra hō’ē ha’apāpūra’a ē, ’ua ti’a te mea tāna e pure nei, ’ua tae mai taua taime ra, ’e i teienei, e ti’a ’ia hōro’ahia te mau ha’amaita’ira’a fa’ahiahia o te autahu’ara’a i te mau tāne ti’amā i te mau vāhi ato’a, noa atu te huru o te ’ōpū fēti’i.

« Hō’ē ā mea tā te mau ta’ata ato’a i roto i taua ha’amenemenera’a ra i ’ite.

« ’Ua riro taua taime ra ’ei taime nō te hau ’e te nehenehe… ’Aore hō’ē reo i fa’aro’ohia e tō mātou tari’a. Terā rā, ’ua muhumuhu mai te reo o te Vārua ma te pāpū i roto i tō mātou ferurira’a ’e i tō mātou vārua » (« Te fa’aho’ira’ahia mai te autahu’ara’a », Ensign, ’Ātopa 1988, 70).

« E peu mātarohia te ’ohipa uiui ».

Teie tā te peresideni Dieter F. Uchtdorf i parau i te feiā e fē’a’a nei te mana’o nō ni’a i te ’ā’amu ’aore rā, te ha’api’ira’a tumu a te ’Ēkālesia :

« E peu mātarohia te ’ohipa uiui—pinepine te huero o te tuatāpapara’a ti’a i te tupu ’e te hotu i roto i te tumu rā’au rahi o te hāro’aro’ara’a. I terā ’e terā taime, tē vai ra te tahi mau melo o te ’Ēkālesia ’aita rātou i ’aro i te mau uira’a pāpū ’aore rā, te mau uira’a fifi. Hō’ē o te mau ’ōpuara’a a te ’Ēkālesia ’o te fa’a’amu ïa ’e te fa’ahotu i te huero o te fa’aro’o—noa atu tei roto i te repo oneone o te mana’o tapitapi ’e te pāpū ’ore i te tahi taime. Te fa’aro’o ’o te tīa’i ïa i te mau mea ’ite-’ore-hia, ’o tē vai nei rā.

« Nō reira, e tō’u mau taea’e ’e mau tuahine here—tō’u mau hoa here—’a tapitapi nā mua i tō ’outou mau mana’o tapitapi hou ’a tapitapi ai i tō ’outou fa’aro’o. ’Eiaha roa atu tātou e vaiiho i te mana’o fē’a’a ’ia tāpe’a ia tātou ’ei mau ’āuri, ’e ’ia fa’aātea ia tātou i te here hanahana, te hau ’e te mau hōro’a ’o tē tae mai nā roto i te fa’aro’o i te Fatu ia Iesu Mesia » (« Haere mai, ’āpiti mai ia mātou », Ensign ’e ’aore rā Liahona, Novema 2013, 23 ; hi’o ato’a Lawrence E. Corbridge, « Stand Forever » [Brigham Young University devotional, 22 nō Tēnuare 2019], speeches.byu.edu).

Ha’amaita’ira’a i tā tātou ha’api’ira’a

E ’ere i te fifi ’ia parau ē : « ’Aita vau i ’ite ». ’A tāmata ai ’oe ma te maita’i roa i te tauturu i te mau pīahi ’ia pāhono i tā rātou mau uira’a nō ni’a i te ’evanelia, ’aita te Fatu e tītau nei ’ia ’ite ’oe i te mau mea ato’a. Mai te mea ē, ’aita ’oe i ’ite nāhea ’ia pāhono i te hō’ē mea, ’a fāri’i i te reira. I muri iho ’a fa’a’ite i tā ’oe mau pīahi i te parau ha’api’ira’a heheuhia mai, ’e ’a fa’a’ite i te hō’ē ’itera’a pāpū ma te ’ā’au tae nō te mau mea tā ’oe i ’ite. (Hi’o Ha’api’ira’a mai tā te Fa’aora, 24)