Te fānaura’a i roto i te veo e te maru, nā J. Kirk Richards

20–26 nō Titema.

Noela

Tē hōro’a fāito ’ore o te Tamaiti hanahana a te Atua

’A ha’amana’o ē, te ha’api’ira’a ’evanelia faufa’a ’e te maita’i a’e nō te mau pīahi, tei roto ïa i tō rātou fare. ’A fa’aineine ai ’oe nō te ha’api’i, ’a feruri e nāhea tā ’oe piha nō te Ha’api’ira’a Sābati e nehenehe ai e ha’apūai i tā rātou tuatāpapara’a ta’ata hō’ē ’e te ’utuāfare.

Pāpa’i i te mau mana’o e tae mai

Tītau i te mana’o

Nāhea te tuatāpapara’a i « Te Mesia ora » (ChurchofJesusChrist.org) i teie hepetoma i te ha’amaita’ira’a i te mau melo o tā ’oe piha ha’api’ira’a ? E nehenehe ’oe e fa’a’ite i teie mau parau a te peresideni Jean B. Bingham, peresideni rahi nō te Sōtaiete Tauturu, ’e i muri iho, ’a ani i te mau pīahi ’ia paraparau mai nō ni’a i te mau ’itera’a mai te reira te huru tei roa’a ia rātou : « ’A tuatāpapa ai au i te orara’a ’e te mau ha’api’ira’a a Iesu Mesia ma te pāpū a’e ’e ’a pūpū ai au iā’u i te tāmau-’ā’au-ra’a i ‘Te Mesia ora’, ’ua pūai roa atu tō’u ’ā’au mēhara ’e tō’u here i tō tātou Fa’aora. Tei roto i te pereota tāta’itahi o taua parau fa’auru ra te hō’ē a’ora’a ’e ’ua ha’amaitai ho’i i tō’u māramaramara’a i tōna mau ti’ara’a hanahana ’e tāna misiōni i te tāhuti nei. Te mau mea ’o tā’u i ha’api’i mai ’e i fāri’i i roto i tō’u ’ā’au i taua taime tuatāpapara’a ra, ’ua ha’apāpū ïa ē, o Iesu mau ‘te māramarama, te ora, ’e te ti’aturira’a o te ao nei’ » (« ’Ia ’ī roa ho’i tō ’oe na ’oa’oa », Ensign ’aore rā Liahona, Novema 2017, 85).

Ha’api’i i te ha’api’ira’a tumu

« ’Aita atu e mana tei ha’aputapū hōhonu i ni’a i te mau ta’ata »

• E nehenehe te mau melo nō te piha ha’api’ira’a e tai’o i te paratarāfa mātāmua o « Te Mesia ora » ’e e fa’a’ite mai i tō rātou mau mana’o ē, nō te aha te mana ha’aputapūra’a a Iesu Mesia i hau atu i te rahi i tā te tahi atu mau ta’ata. E aha te tahi atu mau fa’ahitira’a parau i roto i « Te Mesia ora » ’o tē pāturu nei i teie parau ? ’A ani i te mau pīahi ’ia fa’a’ite mai e mea nāhea te Mesia i te ha’aputapūra’a ia rātou iho. E nehenehe te video « Why We Need a Savior » (ChurchofJesusChrist.org) e tauturu i tā ’outou ’āparaura’a.

• ’Ua tītauhia a’enei i te mau pīahi ’ia fa’ata’a i te hō’ē ta’ata nō te tahi atu ta’ere nō te aha rātou e fa’ahanahana ai i te Noela ? E nehenehe paha rātou e fa’a’ite mai i tō rātou mau ’itera’a. ’Aore rā, e nehenehe ’oe e ani i te mau pīahi ’ia feruri ē, ’ua uihia mai ia rātou teie uira’a nā te hō’ē ta’ata ’aita i mātaro i te parau nō te keretetiano. Nāhea tātou e nehenehe ai e pāhono i teie uira’a ? ’A fa’aitoito i te mau pīahi ’ia hi’o fa’ahou i « Te Mesia ora » ’e teie uira’a i roto i te ferurira’a, ’e ’a ani i te tahi pae ’ia fa’a’ite mai i tō rātou mau mana’o. ’Ei piha ha’api’ira’a, e nehenehe ato’a ’outou e tai’o i te Luka 2:10–14 ’e ’aore rā, e hīmene i te hō’ē hīmene ’o tē fa’a’ite ra i te ’oa’oa o te Noela (mai te hīmene « ’Ua Tae Mai te Mesia », Te mau hīmene, n°118) ’e ’a paraparau ē, nō te aha te fānaura’a o te Mesia e hōro’a mai ai i « te ’oa’oa rahi ». E aha tā tātou e nehenehe e rave nō te « fāri’i i [tō tātou] ari’i » ?

  

  Māramarama o te Ao, nā Howard Lyon

« ’Ia ha’amāuruuruhia te Atua nō [tāna] hōro’a fāito ’ore ».

• I roto i « Te Mesia ora » tē parau ra te mau ’āpōsetolo i te Fa’aora mai te hō’ē « hōro’a » nō ’ō mai i tō tātou Metua i te ao ra. Nō te tauturu i te mau pīahi ’ia ha’api’i hau atu nō ni’a i teie hōro’a, e nehenehe ’oe e pāpa’i i ni’a i te tāpura ’ere’ere Nā roto ia Iesu Mesia, ’ua hōro’a mai te Atua ia tātou i te hōro’a nō te… ’e ’a ani i te mau pīahi ’ia fa’a’ite mai i te mau rāve’a nō te fa’ahope i teie pereota, ’ia au i te mau mea tā rātou i tai’o i roto i « Te Mesia ora » ’e te fa’ahitira’a parau a te peresideni Russell M. Nelson i roto i «Te tahi atu mau rāve’a tauturu ». Nāhea tātou ’ia fāri’i i teie mau hōro’a ? E nehenehe ’oe e ani i te mau pīahi ’ia mā’iti i te hō’ē o teie mau hōro’a ’e ’ia ’ohipa nō te fāri’i hau atu i te reira hōro’a.

Te tahi atu mau rāve’a tauturu

Te mau hōro’a tā te Fa’aora i pūpū mai.

’A paraparau ai ’oia i te ’anotau Noela, ’ua fa’a’ite mai te peresideni Russell M. Nelson e maha hōro’a a te Fa’aora i te feiā ato’a e hina’aro e fāri’i i te reira :

« ’A tahi, ’ua hōro’a mai ’oia ia ’outou ’e iā’u nei i te ’aravihi ’ōti’a ’ore nō te here. Tei roto te ’aravihi nō te here i te feiā e ’ere i te mea au maita’i ’e te feiā ato’a ’aita e here ia ’outou, ’e tē hāmani ’ino nei ia ’outou, ’e tē punu nei ia ’outou.

« Nā roto i te tauturu a te Fa’aora, e nehenehe tātou e ha’api’i ’ia here mai tāna i here…

« Te piti o te hōro’a tā te Fa’aora e pūpū mai nei ia ’outou o te ti’ara’a ïa ’ia fa’a’ore i te hara. Nā roto i tāna tāra’ehara hope ’ore, e nehenehe tā ’outou e fa’a’ore i te hara a te feiā tei hāmani ’ino mai ia ’outou ’e ’o tē ’ore roa e fāri’i i te hōpoi’a nō tā rātou hāmani ’ino ia ’outou…

« Te toru o te hōro’a nō ’ō mai i te Fa’aora ra, ’o te tātarahapa ïa. ’Aita teie hōro’a e māramarama-maita’i-hia i te mau taime ato’a… Te tātarahapa, ’o te hō’ē ïa hōro’a nehenehe. ’O te hō’ē ïa fa’anahora’a ’eiaha roa e mata’u. E hōro’a teie ’o tē ti’a ia tātou ’ia fāri’i ma te ’oa’oa ’e ’ia fa’a’ohipa—’ia tāpe’a—i terā mahana ’e terā mahana ’a ’imi ai tātou ’ia riro hau atu mai tō tātou Fa’aora te huru…

« Te maha o te hōro’a nō ’ō mai i te Fa’aora ra, ’o te hō’ē ïa fafaura’a—e fafaura’a nō te ora mure ’ore… Te ora mure ’ore, ’o te huru orara’a ïa e orahia nei e te Metua i te ao ra ’e tāna Tamaiti Here. ’Ia pūpū ana’e mai te Metua ia tātou i te ora mure ’ore, te aura’a mau ’oia ho’i, tē parau mai nei ’oia ē, « Mai te mea ē, e fa’aoti ’oe e pe’e i tā’u Tamaiti—mai te mea ē, e hina’aro mau tō ’oe ’ia riro hau atu mai iāna te huru—e ti’a ïa ia ’oe ’ia ora mai tā māua e ora nei ’e ’ia fa’atere i ni’a i te mau ao ’e te mau bāsileia mai tā māua e nā reira nei.’

« E hōro’a mai teie nau hōro’a hō’ē roa e maha ia tātou nei i te ’oa’oa rahi atu mai te mea ē, e fāri’i tātou. E tupu te reira nō te mea ’ua fāri’i Iehova ’ia pou mai i te fenua nei ’ei ’aiū Iesu » (« E maha ō tā Iesu Mesia e hōro’a nei ia ’outou » [purera’a pae auahi nō te Noela a te Peresidenira’a Mātāmua, 2 nō Tītema 2018], broadcasts.ChurchofJesusChrist.org).

Ha’amaita’ira’a i tā tātou ha’api’ira’a

Fa’aineine ia ’oe i te pae vārua. « Te ha’api’ira’a i te ’evanelia ma te mana rahi, e ’ere noa ïa i te fa’aineinera’a i te hō’ē ha’api’ira’a, ’o te fa’aineine-ato’a-ra’a rā ia tātou iho nei… E riro ïa te mau ’orometua ’evanelia ha’api’i maita’i i te rōtahi—hou ’a feruri ai i te fa’a’īra’a i te taime nō te piha ha’api’ira’a—i ni’a i te fa’a’īra’a i tō rātou ’ā’au i te Vārua Maita » (Ha’api’ira’a mai tā te Fa’aora, 12).