“Ritembwa 20–26. Kiritiimati: Te Bwaintangira ae Akea Kabotauana are Natin te Atua,” Nakomai, Iriirai—Ibukin te Reirei n Tabati: Reirei ao Berita aika Tabu 2021 (2020)
“Ritembwa 20–26. Kiritiimati,” Nakomai, Iriirai—Ibukin te Reirei n Tabati: 2021
Rongorongon Bungiakin Iesu i Copper ao Umber, iroun J. Kirk Richards
Ritembwa 20–26
Kiritiimati
Te Bwaintangira ae akea Kabotauana are Natin te Atua
Uringnga bwa te tabo ae rang kakaawaki ao n oomwaka ibukiia kaain te kiraati n reiakina te euangkerio bon mwengaia. Ngkai ko katauraoi n anga reirei, iangoia bwa e na kanga am kiraati n te Reirei n Tabati ni kamatoai aia kamatebwai ibon irouia ao n te utu.
Korei Am Namakin
Kaungaa te Tibwatibwa
E kanga kamatebwaian “Te Kristo ae Maiu” (ChurchofJesusChrist.org) n te wiiki aei n kakabwaiaia kaain am kiraati? Ko kona n tibwauai taeka aikai mairoun Beretitenti Jean B. Bingham, Beretitenti ni Kabuta n te Botaki n Aine, ao imwina kaoia kaain te kiraati ni marooroakina aia atatai ae titebo ma aei: “Ngke I kamatebwaia maiun ao ana reirei Iesu Kristo ma nanou ao ni karina ‘Te Kristo ae Maiu’ n au iango, e rikirake au karabwarabwa ibukin ara Tia Kamaiu. Kibuntaeka ni kabanea n te rongorongo ae e anainano anne iai inanona te kabwarabwara ao e a tia ni karababaa au atatai n Ana beku ao ana mwakuri iaon te aba. Te bwai are I a tia n reiakinna ao n namakinna rinanon waakin te kamatebwai ao iangoakina e kamatoa bwa Iesu ni koaua “bon ootan, maiun, ao te kantannga n te aonaaba.”(“That Your Joy Might Be Full,” Ensign ke Riaona, Nobembwa. 2017, 85).
Reirei te Reirei
“Akea riki ae korakora aron kakaawakina.”
-
A kona kaain te kiraati n wareka te moan barakaraba n “Te Kristo ae Maiu” ao n tibwauai aia iango bwa bukin tera akea ae e roota aron korakoran Iesu Kristo ae kakaawaki. Tera riki taeka n “Te Kristo ae Maiu” ae boutoka te kaoti aei? Kaoia kaain te kiraati n tibwauaia bwa E kanga ni bitiia n ae onoti. Te witeo ae “Why We Need a Savior” (ChurchofJesusChrist.org) e kona n raona am marooro.
-
Iai taai ike kaain te kiraati a na kabwarabwara nakon temanna ae kaokoro ana katei bwa bukin tera ti bukamarua te Kiritimati? Tao a kona ngkanne n tibwaua aia atatai. Ke ko kona ni kaoia kaain te kiraati ni katamneia bwa a titirakinaki te titiraki anne iroun temanna ae tuai boobo ma Kiritian. A na kanga ni kaeka te titiraki aei? Kaungaia kaain te kiraati ni manga wareka “Te Kristo ae Maiu” ma te titiraki anne n aia iango, ao kaoia tabeman bwa a na tibwauai aia iango. N te kiraati, kam kona ni wareka Ruka 2:10–14 ke n anenea te kuna ae kaota kakukurein te Kiritimati (n aron “Joy to the World,” Hymns, nambwa. 201) ao n marooroakinna bwa bukin tera bungiakin Kristo e uota “te kukurei ae korakora.” Tera ae ti kona ni karaoia ni “butimwaea [ara] Uea”?
TamneiIesu KristoOtan te Aonaba, iroun Howard Lyon
“E rabwa te Atua ibukin [Ana] bwaintangira ae akea kabotauana.”
-
N “Te Kristo ae Maiu,” Abotoro a taekina te Tia Kamaiu bwa te “bwaintangira” mairoun Tamara are i Karawa. Ni buokiia kaain te kiraati n reiakina rik ae bati n te bwaintangira aei, ko kona ni korea iaon te burakibooti aei Rinanon Iesu Kristo, te Atua e anganira te bwaintangira n … ao kaoia kaain te kiraati ni kabwanina te kibuntaeka anne, ni kaineti ma are a warekia n “Te Kristo ae Maiu” ao ana taeka Beretitenti Russell M. Nelson n “Bwaai ni Ibuobuoki riki Tabeua.” Ti na kanga ni karekei bwaintangira aikai? Ko kona ni kaoia kaain te kiraati n rinea teuana mai buakon bwaintangira akanne ao n mwakuri n karekea riki bwaninina.
Bwaai n Ibuobuoki Riki Tabeua
Bwaintangira are anga te Tia Kamaiu.
N ana marooro n tain te Kiritimati, Beretitenti Russell M. Nelson e anga aua bwaintangira are e anga te Tia Kamaiu nakoia aomata ni kabane ake a tauraoi ni butimwaei:
“Te Moan, E anganiko ao e anganai te nano ae akea tiana n tangira. E raonaki anne ma te nano n tangiriia aika a riribaaki ao naake aki tii tangiri ngkami ma a bwainikirini ngkami ao ni kabonganai ngkami n te aro ae aki riai.
“Man ana ibuobuoki te Tia Kamaiu, ti kona n reirei n tangira n aron Ana kawai n tangira. …
“Ana kauoua ni bwaintangira te Tia Kamaiu ae anganiko bon te konabwai ni kabwarabure. Rinanon Ana Mwakuri ni Kamaiu ae akea tiana, ko kona ni kabwarai aia bure naake a tia ni kamarakiko ao n aki butimwaea bureia n aia mwakuri ae buakaka nakoim. …
“Te kateniua ni bwaintangira mairoun te Tia Kamaiu bon te rairannano. Te bwaintangira aei e aki raoi mataata te aba iai. … Te Rairannano bon te bwaintangira ae tamaroa. Bon te kawai ae ria n aki makaki. Bon te bwaintangira ibukira ae ti na karekea ma te kimwareirei ao ni kabongana—ao ni mwaneia—n te bong koraki ngkai ti ukoukoria ni katotoonga riki ara Tia Kamaiu. …
“Te kaaua ni bwaintangira mairoun ara Tia Kamaiu bon te berita—te berita n te maiu are aki toki. … Te maiu ae akea tokina bon aekan ao aron maiuia Tamara are i Karawa ao Ana Rikitemanna ae Tangiraki. Ngke e anganiira Tamara te maiu are akea tokina, Ni bon arona ao E kangai, “Ngkana ko rineia bwa ko na katotoonga Natiu—ngkana nanom bwa ko na riki raoi n ai Arona—n tokina ko na maiu n aron maiura ao n tararuai aonaaba ao aba n uea n aron ae ti karaoia.’
“Bwaintangira aika aua aika onoti aikai e na uoti nakoira kakukurei aika mwaiti ngkana ti butimwaei. A kaoti ibukina bwa Iehova e ruo nakon te aonaba bwa Iesu te ataei” (“Aua Bwaintangira aika Ko Anganaki” [Aia Taromauri ni Ka Kiritimati te Moan Beretitentii, Ritembwa. 2, 2018], broadcasts.ChurchofJesusChrist.org).
Kanakoraoan Ara Anga reirei
Katauraoiko n te maiu n tamnei. “Te anga reirei n te euangkerio ae korakora tiaki tii te katauraoi n te reirei ma katauraoara naba. … Taan reirei n te euangkerio aika korakora—imwain iangoan kanoan tain te kiraati—a kabanea nanoia ni kaonan nanoia ma te Tamnei ae Raoiroi” (Reirei n Ana Kawai te Tia Kamaiu, 12).