te rabuna ae e manii ae kaotii karan te kun ae e kakaokoro

Nakoia Membwa aika Mwaane Ake a Tau, iroun Emma Allebes

Ritembwa 6–12

Taekan Te Onimaki ao Katanoata ae Kariaiakaki 1 ao 2

“Ti Kakoauaa”

Tataromwaaka ni wareka Taekan te Onimaki ao Katanoata ae Kariaiakaki 1 ao 2, ao ukora ana kairiiri te Tamnei ae e Raoiroi ngkai ko bairea te waaki ni karekean te taneiai ae manena ibukiia kaain te kiraati n te Tabati.

Korei Am Namakin

te aikaon ibukin te tibwatibwa

Kaungaa te Tibwatibwa

Ko kona ni kaoiia kaain te kiraati bwa a na kabwanina te rongorongo aei: “I kukurei bwa I wareka te koroboki ae tabu n te wiiki aei ibukina bwa …”

te aikaon ibukin te anga reirei

Reirei te Reirei

Taekan te Onimaki

Taekan Te Onimaki iai inanona boton raoi koaua n te euangkerio ae kaokaki.

• Aio te kawai ni buokiia kaain te kiraati n tibwa te bwai are a kunea ae moan te manena inanon Taekan te Onimaki: Ko kona ni korei nambwa aika 1 nakon 13 iaon te burakibooti ao tuangiia kaain te kiraati bwa a na korea irarikin te nambwa bwaai ake a reiakin aika a irekereke nakon taekan te onimaki. Tera te kaokoro ae e riki man koaua aikai n aron ara reitaki ma ara Karo ake i Karawa ao Iesu Kristo? Tao a kona kaain te kiraati n tibwaia bwa e kanga Taekan Te Onimaki ni karababa aroia ni kamatebwaia te euangkerio ke buokiia bwa a na tibwa te euangkerio ma tabeman.

Taekan te Onimaki 1:9; Katanoata ae Kariaiakaki 1 ao 2

Ana Ekaretia Iesu Kristo e kairaki man te kaotioti.

• Bukin tera ngkai e kakaawaki te kaotioti nakoira? Kaoiia kaain te kiraati bwa a na tibwa aia namakin iaon te titiraki aei. A kona naba kaain te kiraati ni maroroakinna bwa e kanga te reirei iaon te kaotioti ae e reitinako n iai irekerekena ma te Katanoata ae Kariaiakaki 1 ao 2. (Te kabwarabwara n te wiiki aei inanon Nakomai, Iriirai—Ibukiia Aomata n Tatabemaniia ao Utu e anga iango ni bwaai ni ibuobuoki nakon kaotioti aikai.) Tera ae ti reiakinna man te Katanoata ae Kariaiakaki 1 ao 2 iaon taben te kaotioti ni kaira te Ekaretia? (tara naba Taekan te Onimaki 1: 9 ao te rongorongo iroun Beretitenti Gordon B. Hinckley inanon “Bwaai ni Ibuobuoki riki Tabeua”). Baikara katooto tabeua iaon reitinakon te kaotioti ae a kona kaain te kiraati n iangoia? A kanga kaotioti aikai ni kaira aron maiura ao ni buokiira ni katea abanuean Tamara are i Karawa?

• Iangoia ni kaoiia kaain te kiraati n rinanoa Katanoata ae Kariaiakaki 1 ao 2 ao n tibwai bwaai tabeua man kaotioti aikai are e na kona ni buokiia tabeman ake e matoatoa irouia butimwaean te bitaki nakon kaetieti aika ngkai, kaotioti, ke reirein te Ekaretia. A kanga kaain te kiraati n reiakina ae a na onimaki nakon te Atua ngkana a rinanon kangaanga ni bwaai tabeua inanon te Ekaretia? E kanga aia kamatebwai n te wiiki aei ni kakorakora aia onimaki bwa te Uea bon ngaia ae e kaira Ana Ekaretia? Te nonori mai iroun Unimwaane Dieter F. Uchtdorf inanon “Bwaai n Ibuobuoki Riki Tabeua” e kona naba ni ibuobuoki.

  te korobanna iaon Wilford Woodruff

  Wilford Woodruff, iroun H. E. Peterson

te aikaon ibukin bwaai n ibuobuoki riki tabeua

Bwaai n Ibuobuoki Riki Tabeua

“Tamnein te Atua e mena ikekei”

E beku Beretitenti Gordon B. Hinckley bwa kaain te Kooram n Abotoro n te Tengaun ma Uoman ngke te kaotioti ae e kabwarabwaraaki inanon Katanoata ae Kariaiakaki 2 e kaokaki. Tabeua te ririki imwiina e kabwarabwaraa te bwai ae e rinanona:

“Bon iai te namakin ae tabu ao ni itiaki ae namakinaki inanon te ruu. Irou, kanga bon namakinan te bwangabwanga ae e uki nako imarenan te kaintoka n uea i karawa ao te burabeti, ae katorobubua n raonaki ma Tarina ni bubutiia te Atua. Tamnein te Atua e mena ikekei. Ao man mwaakan te Tamnei ae e Raoiroi e roko nakon te burabeti te kakoaua bwa te bwai are e tataro ibukina e bon koaua, bwa e a roko te tai, ao bwa ngkai kakabwaian te nakoanibonga ae e kamimi a nang anganaki mwaane ake a kororaoi n taabo nako n aki taraaki bwa e riki maia.

“Nikabane mwaane ake a mena n te kamronron anne, man mwaakan te Tamnei ae e Raoiroi, a ataa naba te bwai anne.

“Bon te tai ae tabu man onoti.… Akea te bwanaa ae ti ongo n taningara. Ma bwanaan te Tamnei ae wirikiriki ma te koaua nakon ara iango ao nanora” (“Kaokan te Nakoanibonga,” Ensign, Okitobwa 1988, 70).

“Bon arona bwa e na iai te titiraki.”

Beretitenti Dieter F. Uchtdorf e taekina aio nakoia naake iai nano kokorakiia ibukin rongorongon te Ekaretia ke ana reirei:

“Bon arona bwa e na iai te titiraki—te koraa n te titiraki ae koaua e aki toki ni bwebwerake ao ni ikawai rake n riki bwa te aroka ae bubura n atatai. Iai tabeman membwa n te Ekaretia ae, tao n te taina ke rimwii, a tuai man kaitibo ma titiraki aika a kangaanga ke n ringa te nano. Teuana mai buakon ana boto n iango te Ekaretia bon kawakinan ao ribanaakin uaan te onimaki—e ngae ngke inanon te nanououa ao te aki koaua. Te onimaki bon kantaningaan bwaai aika aki nooraki ma a bon koaua.

“Ma ngaia ae, tariu ao maneu—raraou aika kam tangiraki—taiaoka, te moan nanououa moa ni baike ko nanououa iai imwaain ae ko nanououa n am onimaki. Ti na aki kariaia te nanououa bwa e na tau arora ao ni kararoaira man te tangira ae mai iroun te Uea, te rau, ao te bwai n tangira are e roko rinanon te onimaki iroun te Uea Iesu Kristo” (“Come, Join with Us,” Ensign ke Riaona, Nobembwa. 2013, 23; taraa naba Lawrence E. Corbridge, “Stand Forever” [Brigham Young University devotional, Tianuare. 22, 2019], speeches.byu.edu).

Kanakoraoan Ara Anga reirei

E Raoiroi ngkana ko kangai, “I aki ataia.” Ngkai ko karaoa am kabanea ni konaa ni buokiia kaain am kiraati ni kaekai titiraki ibukin te euangkerio, e aki kantaningaia te Uea bwa ko na atai bwai ni kabane. Ngkana ko aki ataa boon te titiraki, kaotia bwa ko aki ataia. Ngkanne kairiia naake ko reireiniia nakon reirei ake a kaokaki, ao kaota am koaua ni baike ko atai. (Taraa Reirei n Ana Kawai te Tia Kamaiu,24.)