Ti Pannakayanak iti Tanso ken Umber, ni J. Kirk Richards

Disiembre 20–26.

Paskua

Ti Awan Kapadana a Sagut ti Nasantuan nga Anak ti Dios

Laglagipem a ti kapatgan ken kasamayan a panagsursuro iti ebanghelio dagiti miembro ti klase ket maaramid iti pagtaenganda. Bayat ti panagsaganam a mangisuro, ibilangmo no kasano a mapatibkerno ti bukod ken sangapamiliaan a panagadalda.

Isuratmo dagiti Impresionmo

Yawis ti Panagbibinninglay

Kasano a ti panagadalmo iti “Ti Sibibiag a Cristo” (ChurchofJesusChrist.org) itoy a lawas ket nangbendision kadagiti miembro ti klasem? Mabalinmo nga ibinglay dagitoy a balikas manipud ken ni Presidente Jean B. Bingham, Relief Society General President, ket kalpasanna awisem dagiti miembro ti klase a mangisarita maipapan iti ania man a kapada a padpadas a napasaranda: “Bayat ti panagadalko iti biag ken pannursuro ni Jesucristo a napokpokus ken napaspasnek ‘Ti Sibibiag a Cristo’ iti panunot, dimmakkel ti panagyaman ken ayatko para iti Mangisalakantayo. Tunggal binatog dayta a naparegta a dokumento naglaon iti sermon ken nangpadur-as iti pannakaawatko maipapan kadagiti nadiosan nga akem ken naindagaan a misionna. No ania ti nasursurok ken nariknak iti daytoy a panawen ti panagadal ken panagutob mangipatalged a ni Jesus pudno nga ‘isu ti silaw, ti biag, ken ti namnama ti lubong’” (“That Your Joy Might Be Full,” Ensign wenno Liahona, Nob. 2017, 85).

Isuro ti Doktrina

“Awan ti asino man a makaited iti kasta a napnuan kaipapanan unay nga impluensia.”

• Mabalin a basaen dagiti miembro ti klase ti umuna a parapo ti “Ti Sibibiag a Cristo” ket ibinglayda dagiti kapanunotanda maipapan no apay nga ad-adda a napnuan iti kaipapanan ti impluensia ni Jesucristo ngem iti impluensia ti asino man a sabali pay a tao. Ania dagiti dadduma pay a palawag iti “Ti Sibibiag a Cristo” ti mangsuporta iti daytoy a panamati? Awisem dagiti miembro ti klase a mangibinglay no kasano a personal nga inimpluensiaanna ida. Ti video “Why We Need a Savior” (ChurchofJesusChrist.org) ti mabalin a mangsuplemento iti panangilawlawagmo.

• Nasken kadi nga ilawlawag dagiti miembro ti klase iti maysa a tao iti sabali a kultura no apay a rambakanda ti Paskua? Nalabit a mabalinda nga ibinglay dagiti padasda. Wenno mabalinda nga awisen dagiti miembro ti klase a mangipapan a dinamag kadakuada daytoy a saludsod ti maysa a tao a saan a pamiliar iti Kristianismo. Kasano koma a masungbatantayo daytoy a saludsod? Allukoyem dagiti miembro ti klase a mangrebyu iti “Ti Sibibiag a Cristo” a pampanunoten daytoy a saludsod, ken awisem ti sumagmamano a mangibinglay kadagiti kapanunotanda. Kas maysa a klase, mabalinyo pay a basaen ti Lucas 2:10–14 wenno agkanta iti maysa a himno a mangipeksa iti rag-o ti Paskua (kas iti “Joy to the World,” Hymns, num. 201) ket pagsasaritaan no apay a mangisangbay ti pannakayanak ni Cristo iti “naindaklan a rag-o.” Ania ti maaramidtayo tapno “umawat iti Ari[tayo]”?

  

  Silaw ti Lubong, ni Howard Lyon

“Agyamantayo iti Dios para iti awan kapadana a sagut[na].”

• Iti “Ti Sibibiag a Cristo,” itudo dagiti Apostol iti Mangisalakan kas maysa a “sagut” a naggapu iti Nailangitan nga Amatayo. Tapno matulongan a masursuruan iti ad-adu pay kadagiti miembro ti klase maipapan iti daytoy a sagut, mabalinmo nga isurat iti pisarra ti Babaen ken ni Jesucristo, ikkannatayo ti Dios iti sagut ti … ket awisem dagiti miembro ti klase a mangisingasing kadagiti wagas a mangkumpleto iti daytoy a binatog, maibatay iti no ania ti nabasada iti “Ti Sibibiag a Cristo” ken ti palawag ni Presidente Russell M. Nelson iti “Dagiti Nainayon a Resources.” Kasano nga awatentayo dagitoy a sagut? Mabalinmo nga awisen dagiti miembro ti klase a mangpili iti maysa kadagitoy a sagut ken agtrabaho nga umawat a naan-anay iti dayta a sagut.

Dagiti Nainayon a Resources

Dagiti sagut nga idiaya ti Mangisalakan.

Iti panagsaritana iti panawen ti Paskua, inlista ni Presidente Russell M. Nelson ti uppat a sagut nga ited ti Mangisalakan iti amin a natallugod nga umawat kadagitoy:

“Umuna, inikkannakayo ken inikkannak iti awan patinggana a kabaelan nga agayat. Iraman dayta ti kabaelan nga agayat kadagiti saan a maay-ayat ken dagitay di laeng saan nga agayat kadakayo ngem dagiti pay agdama a mangparparigat ken sidadanes a mangaramat kadakayo.

“Babaen iti tulong ti Mangisalakan, masursurotayo ti agayat kas iti panagayatna. …

“ti maikadua a sagut ti Mangisalakan mangidiaya kadakayo iti kabaelan a mamakawan. Babaen ti awan patinggana a Pannubbotna, mapakawanyo dagiti nangpasakit kadakayo ken dagiti saan a pulos mangawat iti pagrebbengan iti kinaulpitda kadakayo. …

“Ti maikatlo a sagut manipud iti Mangisalakan ket ti panagbabawi. Saan a kanayon a maawatan a nasayaat daytoy a sagut. … Ti panagbabawi ket maysa a nadayag a sagut. Daytoy ti proseso a saan a kaano man pagbutngan. Daytoy ti sagutna kadatayo nga awatentayo a sirarag-o ken usaren—uray pay arakupen—iti inaldaw bayat ti panagkalikagumtayo nga agbalin nga ad-adda a kas iti Mangisalakantayo. …

“Ti maikapat a sagut manipud iti Mangisalakan ket pudno a maysa a kari ti—kari ti biag nga agnanayon. … Ti agnanayon a biag ti kita ken kalidad ti biag a nagbiagan ti Nailangitan nga Ama ken ti Ay-ayatenna nga Anak. No idiayaannatayo ti Ama iti agnanayon a biag, kunkunana nga addaan iti kaipapanan, ‘No pilienyo a suroten ti Anakko—no ti tarigagayyo ket pudno nga agbalin nga ad-adda a kas Kenkuana—ket kalpasanna iti naikeddeng a panawen mabalin nga agbiagkayo kas panagbiagmi ket idauluanyo dagiti lubong ken pagarian kas panangidaulomi.’

“Dagitoy uppat a naidumduma a sagut ti mangyegto kadatayo iti ad-adu pay a rag-o no awatentayo dagitoy. Naaramidda a posible gapu ta bimmaba ni Jehova nga umay iti daga kas maladaga a Jesus” (“Four Gifts That Jesus Christ Offers to You” [First Presidency Christmas devotional, Dec. 2, 2018], broadcasts.ChurchofJesusChrist.org).

Panangpadur-as iti Panangisurotayo

Isaganam ti bagim a naespirituan. “Ti nabileg a panangisuro iti ebanghelio ket kaipapananna ti saan laeng a panangisagana iti maysa nga adalen no di ketdi panangisagana pay iti bagbagitayo. … Dagiti epektibo a mannursuro iti ebanghelio—sakbay a panunotenda maipapan iti panangpunno iti oras ti klase—agpokusda iti panangpunno iti puspusoda iti Espiritu Santo” (Panangisuro iti Wagas ti Mangisalakan, 12).